Ethiopia n’u Rwanda birashaka kwagura ubufatanye mu buzima
Amakuru

Ethiopia n’u Rwanda birashaka kwagura ubufatanye mu buzima

NTAWITONDA JEAN CLAUDE

June 8, 2022

Leta y’u Rwanda n’iya Ethiopia byatangiye kugenzura amahirwe atandukanye ari mu bufatanye bw’ibihugu byombi mu rwego rw’ubuzima.

Byagarutsweho ku wa Kabiri taliki ya 7 Kamena 2022, mu ruzinduko Minisitiri w’Ubuzima Dr. Ngamije yagiriye i Addis Ababa muri Ethiopia, ubwo yakirwaga na Minisitiri w’Ubuzima w’icyo Gihugu Dr. Lia Tadesse.

Minisitiri Dr. Ngamije na Dr. Lia Tadesse basangiye ibitekerezo bijyanye n’ubunararibonye bwa buri gihugu mu rwego rw’ubuzima bwagira uruhare mu kwimakaza ubufatanye busanzwe hagati y’ibihugu byombi binyuze mu guteza imbere urwego rw’ubuzima.

Minisitiri Dr. Ngamije n’itsinda ryamuherekeje basuye Ishuri Rikuru ry’Ubuvuzi ry’Ibitaro byitiriwe Mutagatifu Pawulo riherereye i Addis Ababa, aho basobanuriwe amasomo y’ubuvuzi ndetse na serivisi bihatangirwa, ndetse bakomereza ku Kigo Nderabuzima cya Biyo no ku Ivuriro ry’Ingoboka rya Dibandiba biherereye ahitwa Lumi Woreda, muri Zone y’Uburasirazuba ya Shoa (East Shoa Zone).

U Rwanda na Ethiopia bisanzwe bifitanye umubano n’imikoranire bihamye mu nzego zirimo urw’ubuhinzi, ubucuruzi, uburezi n’izindi. Ibyo bihugu kandi bisanzwe bikorana bya hafi mu bijyanye no guhererekanya ubumenyi mu bya gisirikare binyuze mu mahugurwa n’imyitozo ya gisirikare.

U Rwanda na Ethiopia byasinyanye amasezerano y’ubufatanye mu gutanga serivisi z’ingendo zo mu kirere, kuri ubu ibigo by’ubwikorezi bwo mu kirere RwandAir na Ethiopian Airlines bikaba bihuza ibihugu byombi n’Isi yose.

Leta y’u Rwanda imaranye igihe umushinga wo gukura muri Ethiopia ingufu z’umuriro w’amashanyarazi zigera kuri Megawatt 400.

Ikindi kandi u Rwanda rwagiye rushyigikira urugendo rwa Politiki muri Ethiopia nk’igihugu cyagiye kirangwa n’intambara n’amacakubiri mu bihe bitandukanye, rushishikariza icyo gihugu kunga ubumwe bw’abaturage binyuze mu mahoro n’ubwumvikane.

Guhera muri Nzeri 1978 ni bwo u Rwanda rwafunguye Ambasade yarwo i Addis Ababa, mu gihe Ethiopia yo yafunguye Ambasade mu Mujyi wa Kigali muri Mata 2017.  

Gusa ibihugu byombi byasinyanye amasezerano yo kuzahura umubano nyuma ya Jenoside yakorewe Abatutsi mu mpera z’ukwezi kwa Kamena 2012, yibandaga ku ngingo zirimo guteza imbere ibikorwa by’ingufu z’amashanyarazi, ubuhinzi, ibikorwa byo mu mazi, imari n’itumanaho no guhana amakuru.

Mu mwaka wa 2009, Perezida wa Repubulika y’u Rwanda Paul Kagame yahaye uwari Minisitiri w’Intebe wa Ethiopia Meles Zenawi, umudali witwa “Uruti” kubera uruhare yagize mu rugamba rwo kubohora Igihugu ndetse n’uwitwa “Umurinzi” uhabwa abagize uruhare mu kurwanya Jenoside.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA