Gabon: Umugore wa Ali Bongo Odimba wahiritswe ku butegetsi yafunzwe
Mu Mahanga

Gabon: Umugore wa Ali Bongo Odimba wahiritswe ku butegetsi yafunzwe

Imvaho Nshya

October 12, 2023

Kuri uyu  wa Kane, umunyamategeko w’umugore w’uwahoze ari  Perezida wa Gabon Ali Bongo Ondimba, Sylvia Bongo Ondimba Valentin, yavuze ko yafunzwe akekwaho kunyereza umutungo no gukoresha inyandiko mpimbano.

Ni nyuma y’uko umugabo we ahiritswe ku butegetsi n’abayobozi b’ingabo z’igihugu mu mpera za Kanama, hashize amasaha make bitangajwe ko yatsinze amatora y’Umukuru w’Igihugu.

Umwunganizi we François Zimeray, yatangaje  ko “yamaganye inzira zitemewe, igitugu no kutagira demokarasi” nyuma yo gufungwa kwa Sylvia Bongo Odimba.

Ati: “Twamaganye ubu buryo butemewe ,hariho itandukaniro hagati y’ubutabera n’ibikorwa bidahwitse, hagati y’amategeko no kwihorera.”

Sylvia Bongo Ondimba Valentin afungiye mu Murwa Mukuru Libreville, akekwaho kuba yaranyereje umutungo wa Leta n’inyandiko mpimbano. 

Ababashyize mu majwi bavuga ko uwahoze ari Umukuru w’Igihugu n’abambari be babeshye ibyavuye mu matora, bagashinja Sylvia Bongo n’umuhungu we Nourredin Bongo Valentin, kuba baragize igikoresho uwahoze ari Perezida urwaye indwara ya stroke kuva mu mwaka wa 2018.

Bavugwa ko bombi mu myaka itanu ishize bakoresheje nabi amafaranga ya Leta.

Nourredin Bongo Valentin uregwa ruswa hamwe na nyina, bafunzwe kuva se yahirikwa ku butegetsi n’abasirikare.

Bongo w’imyaka 64, yayoboye igihugu cya Gabon kuva mu mwaka wa 2009 aho yatowe  nyuma yuko se Omar Bongo wayoboye Gabon hafi imyaka 42 apfuye.

Banki y’Isi ivuga ko Gabon ari igihugu cya gatatu mu bikungahaye muri  Afurika ariko  umuturage  umwe muri  batatu aba ari munsi y’umurongo w’ubukene.

KAMALIZA AGNES

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA