Gatsibo: Hagaragajwe uruhare rw’ibiganiro mpaka ku ihame ry’uburinganire
Imibereho

Gatsibo: Hagaragajwe uruhare rw’ibiganiro mpaka ku ihame ry’uburinganire

Imvaho Nshya

October 3, 2023

Ubuyobozi bw’Umuryango w’Urubyiruko utari uwa Leta (CVA- Rwanda) ufite intego yo kubaka ubushobozi bw’urubyiruko mu bijyanye n’imiyoborere, butangaza ko ibiganiro mpaka bifasha kuzamura imyumvire ku ihame ry’uburinganire n’ubwuzuzanye.

Byagarutsweho na Ahishakiye Patrick, Umuyobozi wungirije wa CVA- Rwanda, ubwo hahurizwaga hamwe abanyeshuri hafi 1,495 bo mu bigo bitanu mu Karere ka Gatsibo mu Ntara y’Iburasirazuba.

Mu mpera z’Icyumweru gishize, irushanwa rishingiye ku biganiro mpaka ryahuje ibigo by’amashuri; G.S Rwikiniro, G.S Rwimitereri, Umutara Polytechnique Nyagatare, Kiziguro Secondary School na TTC Kabarore.

Ishuri ryisumbuye rya Kiziguro ni ryo ryaje ku isonga, rikurikirwa na TTC Kabarore ndetse na Umutara Polytechnique Nyagatare. 

Insanganyamatsiko igira iti: “Birakwiye ko urubyiruko rwafata iya mbere mu guteza imbere uburinganire”.

Ahishakiye asobanura ko uburyo bw’ibiganiro mpaka byubaka ari uburyo ngaruka mwaka mu bigo by’amashuri CVA Rwanda ikoreramo byose, hagamijwe kongerera ubushobozi urubyiruko kugira ngo rube umusemburo w’impundika aho rutuye, igihe rwasubiye mu miryango n’igihe ruri ku ishuri.

Yagize ati: “Nibura buri wese nadufasha guhindura imyumvire y’abamukikije, twizera ko nta kabuza tuzagera ku ihame ry’uburinganire bikozwe n’urubyiruko ndetse duhereye kubari mu mashuri kuko nabo ni amaboko y’igihugu”.

Asobanura ko ibiganiro mpaka ari uburyo bwo gukomeza kumvikanisha ihame ry’uburinganire bahereye mu rubyiruko rw’abanyeshuri.

Ati: “Bizatuma ibibazo by’ihohoterwa, guhezwa inyuma, no kwitinya bikigaragara cyane cyane k’umwana w’umukobwa bihagarara burundu, bigizwemo uruhare n’urubyiruko rw’abahungu n’abakobwa”.

Mu bitabiriye ibiganiro bagarutse ku mbogamizi z’urubyuruko mu rugendo rwo kwimakaza ihame ry’uburinganire n’ubwuzuzanye bifitanye isano n’amahame n’imigenzo umuryango nyarwanda washyizeho.

Urugero rutangwa ni urw’imigani ya kinyarwanda igira iti ‘Nta mwana usya aravoma, Na nyina w’undi abyara umuhungu, Ntawe useka umukori ahetse umukobwa, Ukandagira agahungu ntahonyora n’indi migani.

Ibi byerekana ko hari icyuho cy’ubwuzanye n’uburinganire biterwa no kudahabwa oumwanya urubyiruko, gutinya gutanga ibitekerezo, kurangazwa n’ibigezweho umuntu akigira ntibideba n’ibindi.

Nshuti wiga mu mwaka wa Gatandatu mu ishuri ryisumbuye rya Kiziguro, yabwiye Imvaho Nshya ko umwaka ushize batitwaye neza mu gutanga ibitekerezo mu biganiro mpaka aho baje ku mwanya wa Kabiri, akishimira ko bashoboye guhiga ibindi bigo by’amashuri byitabiriye ibiganiro mpaka.

Akomeza agaragaza ko ihame ry’uburinganire n’ubwuzuzanye ku ishuri yigaho ryubahirizwa kuko ngo ibyo umwana w’umuhungu yakora n’umukobwa yabikora.

Ati: “Umuhungu ibyo yakora n’umukobwa yabishobora kandi mu kigo cyacu ihame ry’uburinganira rirakurikizwa. Icya mbere turigana, tugira uburenganzira bungana mu isomero ry’ishuri (Library), dufatira amafungura hamwe kandi ku masaha amwe. Nta muntu n’umwe baheza inyuma ngo ni uko ari umuhungu cyangwa umukobwa”.

Ufitihirwe Rosine Gentille na we wiga i Kiziguro mu mwaka wa Gatandatu; Imibare, ubugenge n’Ubumenyi bw’Isi (MPG), ahamya ko ihame ry’uburinganire rishoboka kandi ko ryagerwaho.

Yagize ati: “Nkatwe urubyiruko dukomeje kugira iyo myumvire tukishyiramo icyo kizere ko bishoboka kandi tukabiharanira, byashoboka kuko ni twe benshi ukurikije ubushakashatsi bwakozwe. Imibare yagaragajwe ifite icyo ivuze ku kuba twagera ku ihame ry’uburinganire mu gihe twaba dukoreye hamwe”.

Padiri Theophile Twagirayezu, Umuyobozi w’Ishuri ryisumbuye rya Kiziguro, avuga ko ibiganiro mpaka byabaye byagaragaje ubushobozi bw’umwana w’umukobwa.

Ati: “Kuba kino kigo cyashoboye kwitwara neza, biraha icyizere gikomeye abana b’abakobwa, atari aba hano gusa n’abandi bose bo mu gihugu, bikagaragaza ko umwana w’umukobwa na we ashoboye nka musaza we”.

Ashimangira ko hashize igihe bafite umuco n’akamenyero keza k’ibiganiro mpaka mu kuzamura ibitekerezo mu kuganira no kugaraza impano zabo.

Agaragaza kandi ko ibiganiro mpaka bigamije kuzamura ibitekerezo bishya kandi ibyo bitekerezo bakabitsimbararaho n’abandi bakaba babifatiraho amasomo.

Kalisa Denis, umwe mu bari bagize akanama nkemuramaka, yabwiye Imvaho Nshya ko abanyeshuri ihame ry’uburinganire n’ubwuzuzanye baryumva kandi ko uruhare rwabo abona biteguye kurutanga.

Agira ati: “Ikigaragara ni uko abanyeshuri ihame ry’uburinganire baryumva kandi bararishaka. Ibi biganiro mpaka byatugaragarije ko babizi, babyumva kandi biteguye kubishyira mu bikorwa.

Iyo abanyeshuri baganira hagati yabo, icya mbere babasha kumva icyo bari kuganira, ikindi baranatinyuka bakamenya kuvugira mu ruhame no kuba bahagarara ku bitekerezo byabo”.

Leta y’u Rwanda yashyize imbaraga nyinshi mu guteza imbere ihame ry’uburinganire no kurwanya ihohoterwa rishingiye ku gitsina nk’inzira yo kugera ku iterambere rirambye, kubahiriza uburenganzira bwa muntu no gushimangira imiyoborere myiza.

KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA