Gatsibo: Impunzi za Nyabiheke n’abaturiye inkambi barishimira ibikorwa remezo bahawe n’umushinga Jya Mbere
Amakuru

Gatsibo: Impunzi za Nyabiheke n’abaturiye inkambi barishimira ibikorwa remezo bahawe n’umushinga Jya Mbere

NTAWITONDA JEAN CLAUDE

May 28, 2023

Impunzi z’abanyekongo zisaga ibihumbi 12 zituye mu nkambi ya Nyabiheke iherereye mu murenge wa Gatsibo mu karere ka Gatsibo mu ntara y’Iburasirazuba ziravuga ko nyuma y’aho baboneye umushinga ‘Jya Mbere’ uterwa inkunga na Banki y’Isi, ugashyirwa mu bikorwa na Minisiteri Ishinzwe Ibikorwa by’Ubutabazi (MINEMA), bafite ibikorwa remezo.

Umushinga Jya Mbere ugamije kwegereza impunzi n’abanyarwanda batuye mu turere 6 turimo inkambi z’impunzi serivisi z’ibanze nk’ibigo by’imari, amasoko, imihanda, amazi, amavuriro n’amashuri kugira ngo zibafashe kwiteza imbere.

Uyu mushinga kandi unagamije imibanire n’iterambere ry’impunzi n’abanyarwanda.

Nyiramutuzo Jeanne utuye mu nkambi ya Nyabiheke yahamirije Imvaho Nshya ko mbere bagiraga ikibazo cy’amazi ariko ngo ubu bavoma bisanzuye.

Akomeza avuga ko kera nta mazi babonaga kuko ngo bajyaga kuvoma amazi mu bishanga ariko ngo amazi bahawe yarabafashije.

Yagize ati “Kera habaga hari abantu benshi hakabaho ubwo bataha nta mazi babonye. Aho Jya Mbere iduhereye amazi turavoma twisanzuye”.

Mutesi Zerah utuye muri Karitsiye ya 3 C 34 ni umunyarwandakazi washatse mu nkambi ya Nyabiheke, we avuga ko hari igihe amazi abura bitewe n’icyuma kiyazamura mu kabande ariko ko ayo bahawe n’umushinga Jya Mbere atajya apfa kubura.

Agaragaza ko imbogamizi bagihura na zo, ari iz’uko bayavoma mu isaha imwe bakongera bakayafunga batavomye, bigatuma bajya kuvoma mu gishanga.

Ku rundi ruhande akomeza avuga ati “Kuva umushinga Jya Mbere waza nta kibazo cy’amazi tukigira”.

Ubuyobozi bwa World Vision bukorera mu nkambi ya Nyabiheke buvuga ko hari uburyo bubiri (Système) impunzi zigezwaho amazi.

Buvuga ko hari amazi avanwa mu kabande n’andi atangwa n’Ikigo gishinzwe Isuku n’Isukura WASAC.

Imvaho Nshya yamenye ko iyo ayo mu kabande akamye mu gihe cy’izuba, hiyambazwa amazi ya WASAC, aho ku munsi hatangwa amazi angana na metero kibe 60.

Impunzi mu nkambi ya Nyabiheke ntikizigira ikibazo cy’amazi

 “Jya Mbere”  muri gahunda z’uburezi

Umushinga Jya Mbere washoboye kubaka ibyumba by’amashuri 22, ubwiherero 12 n’ubundi bugenewe abantu bafite ubumuga muri G.S Nyabicwamba riherereye mu murenge wa Gatsibo.

Muri ibi byumba by’amashuri harimo ibyumba 14 bigeretse. Kubaka ibyumba by’amashuri byatwaye miliyoni 393.

Munyurangabo Patrick, Umuyobozi wa G.S Nyabicwamba, avuga ko mbere bari bafite ikibazo cy’ubucucike.

Umubare munini w’abanyeshuri biga muri G.S Nyabicwamba uva mu nkambi ya Nyabiheke kuko mu banyeshuri 2765 bahiga, abanyeshuri 2457 ari abo mu nkambi mu gihe abandi 308 ari abaturiye inkambi.

Ubuyobozi bw’ishuri buhamya ko haje ‘Jya Mbere’ ikabubakira ibyumba by’amashuri.

Yagize ati “Kugeza ubu nta kibazo cy’ubucucike dufite. Mbere abana bigaga mu gitondo abandi bakiga nyuma ya saa sita. Ubu abanyeshuri biga mu gitondo na nyuma ya saa sita kuko nta kibazo cy’ubucucike tugifite”.

Ibi kandi binashimangirwa na Niwemfura Jean Pierre, umwarimu wigisha muri G.S Nyabicwamba.

Umushinga Jya Mbere wubatse ibyumba by’amashuri muri G.S Nyabicwamba byatwaye asaga miliyoni 300

Agaragaza ko mbere hatarongerwa ibyumba by’amashuri hari ikibazo cy’ubucucike kuko ngo ishuri wasangaga ryigwamo n’abanyeshuri basaga 50.

Ati “Kubigisha wasangaga bikomeye cyane ariko aho amashuri yubakiwe ubu ni ingirakamaro cyane. Abanyeshuri ubigisha bisanzuye, urabigisha ukabona barumva cyane ariko mbere hari ubucucike bwinshi”.

Kugeza ubu ishuri rifite abanyeshuri benshi, ni irifite abanyeshuri 45 no munsi yaho gato nkuko abarezi bigisha muri G.S Nyabicwamba babivuga.

Nizeyimana Deliphin wiga mu mwaka wa 6 w’amashuri abanza mu ishuri rya Nyabicwamba avuye mu nkambi ya Nyabiheke, avuga ko mbere bigaga nabi ariko ubu bakaba biga neza.

Ati” Mbere twigaga nabi, tukiga igitondo tukazongera kwiga ikigoroba ku munsi ukurikiyeho. Ubu twishimira ko twiga igitondo n’ikigoroba”.

Umushinga Jya Mbere muri buvuzi

Uwangabe Charlotte, Umuyobozi w’ikigo nderabuzima cya Ngarama giherereye mu murenge wa Ngarama, avuga ko Jya Mbere yaguze ibikoresho byifashishwa kwa muganga nk’ibitanda, intebe, utubati, imashini zimesa, imashini itanga umwuka ifata ibipimo by’umugore utwite. 

Ibitanda 40, matera 80 n’ibindi bikoresho byatanzwe n’umushinga Jya Mbere mu rwego rw’ubuvuzi, bifite agaciro ka miliyoni 255.

Mbere, mu kigo nderabuzima cya Ngarama nta bikoresho bagiraga bigatuma kigira ikibazo cy’ubucucike.

Uwangabe ati “Kutagira ibikoresho byatumaga dutanga taransiferi (Transfer) kubera kubura ibikoresho”.

Ikigo nderabuzima cya Ngarama gitangaza ko cyakira impunzi 10 ku munsi zituye mu giturage ariko kikishyuza inkambi.

Ikigo nderabuzima cya Ngarama cyahawe ibikoresho n’umushinga Jya Mbere

Nankunda Jolly, Umunyamabanga Nshingwabikorwa w’akarere ka Gatsibo, atangaza ko akarere kamaze kwinjiza miliyari 7 ava mu mushinga Jya Mbere, hakaba hamaze gukoreshwa miliyari 2.

Nankunda Jolly, Umunyamabanga Nshingwabikorwa w’akarere ka Gatsibo asaba impunzi n’abanyarwanda muri Gatsibo gufata neza ibikorwa remezo bahawe

Yavuze ko mu mafaranga asigaye hari byinshi azafasha mu iterambere ry’impunzi n’abanyarwanda batuye mu karere ka Gatsibo.

Hazavugururwa ibitaro bya Ngarama

Ashimangira ko umushinga Jya Mbere wahinduye ubuzima bw’abaturage n’impunzi.

Akomeza avuga ko uwavomaga kure kuri ubu avoma hafi. Ati “Igihe yakoresha ajya kuvoma cyaragabanutse”.

Avuga ko ibikoresho byashyizwe muri serivisi z’ubuzima zabaye nziza, ubu abarwayi bakaba babona serivisi nziza.

Abanyeshuri basaga 2000 biga muri G.S Nyabicwamba, abagera kuri 89% ni impunzi zo mu nkambi ya Nyabiheke. Kongera umubare w’ibyumba by’amashuri, ubuyobozi bw’akarere ka Gatsibo buvuga ko byagize uruhare mu kugabanya ingendo abana bakoraga bajya ku ishuri.

Nankunda, Umunyamabanga Nshingwabikorwa w’akarere ka Gatsibo, agira ati “Umunyeshuri wakoze urugendo rurerure yageraga ku ishuri yarushye bityo ntakurikire amasomo neza, Jya Mbere ni igisubizo ku mpunzi n’abaturage ba Gatsibo”.

Ubuyobozi bwa Gatsibo busaba abaturage n’impunzi gufata neza ibikorwa remezo bahawe kuko ngo amazi ni bo bayavoma ikindi kandi amashuri ni abana babo bayigiramo.

Umushinga Jya Mbere watangiye mu 2019 uzarangira mu 2026 utwaye amafaranga asaga miliyari 80.

Igice cya mbere cy’umushinga Jya Mbere, kizashyirwa mu bikorwa n’uturere 6 dufite inkambi zicumbikiye impunzi.

Igice cya kabiri kizashyirwa mu bikorwa na Banki Nyarwanda Itsura Aajyambere (BRD) naho igice cya gatatu n’icya kane bishyirwe mu bikorwa na Minisiteri Ishinzwe Ibikorwa by’Ubutabazi MINEMA.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA