Gen Kabarebe yakomoje ku butwari bwo kutihorera n’imbaraga zo kutibagirwa
Amakuru

Gen Kabarebe yakomoje ku butwari bwo kutihorera n’imbaraga zo kutibagirwa

NTAWITONDA JEAN CLAUDE

April 12, 2022

Umujyanama wihariye wa Perezida wa Repubulika mu by’umutekano, Gen Kabarebe James, yakomoje ku bukana bwa Jenoside yakorewe Abatutsi mu 1994, avuga ko uko imyaka ishira ari ko bugenda bwiyongera kubera uburemere bwabyo.

Yakomoje kuri ibi, mu kiganiro cyahuje ibigo bya Leta birimo Komisiyo y’Igihugu y’Amatora (NEC), Ikigo k’Imisoro n’Amahoro (RRA) n’Umugenzuzi Mukuru w’Imari ya Leta (OAG) kuri uyu wa Kabiri taliki 12 Mata 2022, muri gahunda zo kwibuka Jenoside yakorewe Abatutsi.

Gen Kabarebe James, Umujyanama wihariye wa Perezida mu by’umutekano (uwa kabiri uhereye iburyo), Komiseri Mukuru wa RRA, Bizimana Ruganintwari Pascal (ubanza iburyo), Perezida wa NEC, Prof Kalisa Mbanda (uwa 3 iburyo) na Kamuhire Alex uyobora OAG (ubanza ibumoso)

Avuga ko kubera ubukana Jenoside yakorewe Abatutsi yakoranywe ko hari ubuhamya bwinshi cyane bwa Jenoside butazigera buvugwa.

Atanga urugero rw’Abarokotse Jenoside bataragira imbaraga zo kuvuga ubuhamya bwabo kubera kutagira umutima ukomeye wo kuvuga ibyo babonye kandi bibi cyane.

Asobanura ko Jenoside yateguwe kuko ngo mu bantu bakoranaga mu kigo kimwe, havagamo abakora urutonde rw’abazicwa.

Avuga ko hari igihe abantu bibeshya bakavuga amateka uko atari.

Ati “Uwatumye u Rwanda rubaho nyuma ya Jenoside ni umuntu umwe gusa watumye u Rwanda rumera uku rumeze […]”

Avuga ko hari umunyamakuru w’umunyamahanga waje abaza Perezida Paul Kagame niba mu basirikare ayoboye harimo abiciwe muri Jenoside yakorewe Abatutsi, hafi ya bose bamanika ukuboko.

Yamubajije uko yashoboye kuyobora abasirikare bafite ababo bishwe ariko ntibagire umutima wo kwihorera.

Gen Kabarebe yagize ati “Yamusubije ko ibyo turwanira ari uguhindura igihugu ntitumere nk’abo turwana na bo.

Nta muntu n’umwe washoboraga gutanga ayo mabwiriza atari umuntu umwe! Ko twese twari abayobozi b’ingabo, ni nde warikubishobora?

Icyo ni cyo cyakijije iki gihugu, kubera ko ubukana n’ubugome byakoreshwaga mu kwica, byakomokaga ku myaka myinshi cyane, ibyo byose uko Leta zagiyeho, zagiye zigisha urwango, inyenzi, inzoka,….”.

Jenoside yagiye gukorwa Abatutsi batakiri abantu na bo ubwabo baramaze kubyakira ko bagomba kwicwa.

Ati “Iyo byageze aho, bamwe bumva ko kwica ari uburenganzira bwabo, abagomba kwicwa na bo bishyizemo ko ari uko bigomba kumera ….”

Akomeza agira ati “Icyo ntazibagirwa, mu gihe nk’iki ni igihe twari ku Kagera tugiye guhura n’itsinda rya Tanzaniya.

Njye nabonye umugore bamwishe bamushyize ku gisongo bongeraho akandi kana, bashyiraho n’aka gatatu ngira ngo bari nka 4.

Nonese uwabishe ko yari afite imbunda n’umuhoro, kubica ukabashyira ku gisongo, … urica ukongera ukica?”.

Nubwo ibikomere bihari abantu bajye bazirikana imbaraga byasabye.

Ati “Kutibagirwa ni zo mbaraga zacu”.

Gen Kabarebe avuga ko kwibagirwa amateka ya Jenoside ari ryo kosa rikomeye.

Ati “Kwibagirwa amateka yacu, ni ryo kosa rikomeye Abanyarwanda dushobora gukora nyuma ya Jenoside yakorewe Abatutsi mu 1994, kuko kwibagirwa bishobora gutuma twongera kwisanga mu mateka mabi twanyuzemo”.

Ahamya ko Jenoside yakozwe n’abantu benshi cyane kuko ngo buri rugo rwari rufite abagomba kurwica, nta musozi n’umwe utaruriho interahamwe.

Interahamwe zatangiye kwigishwa mu 1992 kandi buri Komini itanga interahamwe 600.

Umusirikare w’Inkotanyi wamusabaga ibintu bikomeye kandi akabikora kugira ngo Jenoside ihagarare kandi harokorwe abicwaga.

Avuga ko kurokora Abatutsi i Nyamirambo bakabanyuza mu Gatenga, Gikondo bakagezwa kuri CND ari ko bagenda bahura n’interahamwe zikomeye n’abajepe bari hafi aho, byasabaga Inkotanyi ubwitange bukomeye.

Ati “Si uko twari dufite imbunda zikomeye z’ibitangaza, byasabaga kuguma mu murongo kubera wa muco twatojwe no kubahiriza amabwiriza”.

Ubumwe bw’Abanyarwanda bwatangiye ku italiki 04 Nyakanga 1994 ubwo hari abasirikare batashoboye guhunga, abatakaye inyuma, n’abafashwe bagera ku 1,500 bishyize mu maboko RPA barakorana.

Aba Komiseri bungirije muri RRA ni bamwe mu bakurikiye ikiganiro cyatanzwe na Gen Kabarebe (Foto RRA)

Ati “Ba basirikare 1500 bamaze kwakirwa ni ho twabonye ko ubumwe bw’Abanyarwanda bushoboka”.

Gen Kabarebe avuga ko uko Jenoside yakorerwaga Abatutsi, ko iyo Inkotanyi zabonaga ibyo, zabonaga imbaraga zirenze kugira ngo zishobore kurokora abasigaye.

Ati “RPF na RPA byaziye igihe, ibyari byo byose Jenoside yari kuzaba mu buryo ubwo ari bwo bwose.

Kuba harabonetse umuyobozi udasanzwe, udakangwa n’ikintu gikangitse cyane, kugira ububasha bwo kumvisha abasirikare bafite imbunda, ni ukuvuga ngo umuntu runaka yaziye igihe.

Perezida Paul Kagame yagobotoye ikintu kitagobotoka, kuvuga ngo mufate aba basirikare ba Leta ukabazana tukabigisha barangiza bakanatuyobora, ngo bayobore ba bana basanze ababo bashize kandi bakayoboka bagakorana na bo”.

Perezida wa Komisiyo y’Igihugu y’Amatora, Prof  Kalisa Mbanda, ahamya ko yagiye gusura Inkotanyi ku Mulindi akahabona abasirikare benshi b’abahutu ariko akabanza kugira ubwoba.

Avuga ko yahumurijwe akabwirwa ko igihugu kizabohorwa n’Abanyarwanda ko atari ubwoko runaka buzakibohora.

Agaragaza ko yiboneye ibitandukanye n’ibyo Leta yababwiraga.

Avuga ko imiyoborere mibi ari yo yagejeje u Rwanda mu icuraburindi no kugeza Jenoside ishyizwe mu bikorwa.

Ati “Yaba umututsi, umuhutu n’umutwa nta muntu n’umwe wungukiye muri Jenoside yakorewe Abatutsi”.

Komiseri Mukuru wa RRA, Bizimana Ruganintwari Pascal, avuga ko Abanyarwanda bafite icyizere cyo kubaho.

Ati “Abahagaritse Jenoside baracyahari turi kumwe na bo ntabwo bizongera kubaho”.

Avuga ko inyigisho yo mu kiganiro cyatanzwe na Gen Kabarebe abagikurikiye bakwiye kumva ko ari urumuri rutuma umuntu agira icyizere.

Ati “Abahagaritse Jenoside dukwiye kubafatiraho urugero”.

Umugenzuzi Mukuru w’Imari ya Leta, Kamuhire Alex, avuga ko mu mashuri n’ahandi habaga hari ivangura kandi ko byari bizwi ko Abatutsi bazapfa.

Akomeza avuga ati “Kuba uyu munsi twunamira abacu navuga ko ari amahirwe twagiriwe, hejuru y’ibyo byose kuba twibuka hari uwahisemo ko biba”.

Ahamya ko iyo ataba Perezida Paul Kagame ngo afate umwanya wo kubohora igihugu, uyu munsi nta muntu ngo wari kuba atanga ubuhamya.

Avuga ko Leta yariho yashyiraga imbaraga nyinshi mu kwigisha ko Umututsi ari mubi, bikaba byaraganishaga ku itegurwa rya Jenoside.

Abakozi ba NEC, RRA na OAG bashima Ubuyobozi Bukuru bw’Igihugu bwashyizeho umwanya wo kujya hibukwa Abatutsi bazize Jenoside yakorewe Abatutsi (Foto RRA)

 

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA