Umugaba Mukuru w’Ingabo z’u Rwanda akaba n’Umuyobozi w’Icyubahiro Wungirije wa APR FC, Gen. Mubarakh Muganga, yasabye abakinnyi bayo gushimisha Abanyarwanda batsinda Zamalek SC yo mu Misiri.

Mu ijoro ryo ku wa Kane, tariki ya 15 Ukwakira 2026, ni bwo Gen Mubarakh Muganga ari kumwe n’Umugaba Mukuru w’Inkeragutabara, Gen Maj Alex Kagame, basuye abakinnyi b’Ikipe y’Ingabo z’Igihugu, mu myitozo ya nyuma yitegura umukino ubanza w’ijonjora rya kabiri rya CAF Champions League bafitanye na Zamalek SC yo mu Misiri. 

Mu butumwa yageneye abagize iyi kipe yongeye kubasaba kwitwara neza nkuko babikoze mu mukino wa CAF Champions League baherukaga gusezereramo FC Les Aigles du Congo yo muri RDC. 

Yagize ati: “Twese tubafitiye icyizere nk’icyo twari tubafitiye mbere yo gusezerera iriya kipe mwahuye na yo (Les Aigles du Congo) no kuri uyu mukino twiteguye ko muzitwara neza, hano hanze buri wese yiteguye kubashyigikira namwe tubitezeho kubigenza nkuko byagenze ubushize.”

Gen. Muganga yasabye abagize iyi kipe gushimisha Abanyarwanda batsinda iyi kipe yo Misiri. Yagize ati: “Mufite byinshi mwakosoye mu mikino yagiye itambuka kandi byatanze umusaruro, ibyo tubitezeho ejo ni ugushimisha Abanyarwanda aho bari hose kandi na bo biteguye kubatera ingabo mu bitugu, ibindi byacu bitureba nk’ubuyobozi nyuma y’Umukino muzi aho duhigurira no kuri iyi nshuro ni ko bizagenda.”

Maj. Gen. Alex Kagame wayoboye APR F.C. ubwo yasezereraga Zamalek mu mwaka wa 2004, yabwiye abakinnyi ko nta kindi gitanga intsinzi atari ugushyira hamwe bakumva ibyo umutoza ababwira ndetse no guhuza ibitekerezo.

Yagize ati: “Ntimugire ngo hari ikindi gitanga intsinzi ni ugushyira hamwe nk’ikipe ukaba uzi aho mugenzi wanjye ananiwe ndamufasha kandi bitanga umusaruro ugaragara, hagati yanyu muganire muhane ibitekerezo ahasigaye musenyere umugozi umwe kandi twese tubari inyuma.”

APR FC na Zamalek SC zirahurira kuri Stade Amahoro kuri uyu wa Gatanu, tariki ya 16 Ukwakira 2026 saa kumi n’ebyiri z’umugoroba.

Umukino wo kwishyura uzabera i Cairo mu Misiri tariki ya 24 Ukwakira 2026. Ikipe izakomeza hagati y’impande zombi izahita ikatisha itike yo gukina imikino y’amatsinda y’iri rushanwa rihuza amakipe yabaye aya mbere iwayo.

Ba uwa mbere mu kumenya amakuru agezweho!!!