Gicumbi: Amakimbirane yo mu muryango, intandaro y’inda ziterwa abangavu
Imibereho

Gicumbi: Amakimbirane yo mu muryango, intandaro y’inda ziterwa abangavu

Imvaho Nshya

October 16, 2023

Abatuye mu Karere ka Gicumbi mu Murenge wa Rubaya mu Kagari ka Muguramo bavuga ko kugeza ubu ikibazo kibugarije ari inda ziterwa abangavu, bakavuga ko amakimbirane yo mu miryango.

Akarere kavuga ko amakimbirane no kutumvikana bikigaragara mu miryango yo muri kano gace ari imbogamizi ikomeye, ituma abana bataganirizwa bagahura n’ibishuko bibaganisha ku guterwa inda zitateguwe.

Umuturage wo mu Murenge wa Rubaya Akagari ka Muguramo, Ringuyeneza Francine yatangarije Imvaho Nshya ko ikibazo cy’inda ziterwa abangavu gihangayikishije cyane.

Ati: “Abagore bo mu Rubaya ntitukibyaragura ahubwo ababyara ni abakobwa babyarira iwabo, barabyara no kurusha abagore bari mu ngo! Impamvu ibitera n’ubushobozi budahagije, ugasanga babashukishije amafaranga bakiroha mu ngeso mbi”.

Mukaneza Joselyne na we avuga ko abangavu baterwa inda ari ikibazo gikomeye cyane muri aka gace.

Yagize ati: “Abana barananiranye rwose usanga umwana w’imyaka 12, cyangwa 14 atwite ukabona ni ikibazo gikomeye, iyo umwana yashatse kukunanira arakunanira”.

Aha ni ho bahera basaba ko bahabwa ibigo by’urubyiruko byigisha ubuzima bw’imyororokere dore ko usanga ushaka gusobanukirwa ibijyanye n’ubuzima bw’imyororokere ajya ku kigo nderabuzima.

Bagasaba ko babonye ibigo by’urubyiruko byigisha ubuzima bw’imyororokere basobanukirwa uburyo bwo kwirinda.

Ati: “Inaha nta bigo bihari byigisha ubuzima bw’imyororokere kereka wenda nk’iyo bagiye kwa muganga, wenda hakagira nk’ubibabwira. Tubonye ibyo bigo byadufasha kuko urubyiruko rwamenya ibijyanye n’ubuzima bw’imyororokere ndetse n’uburyo rugomba kwitwara”.

Umuyobozi w’agateganyo w’Akarere ka Gicumbi Uwera Parfaite avuga ko amakimbirane yo mu muryango atiza umurindi abangavu baterwa inda.

Ati: “Amakimbirane, kutumvikana kw’ababyeyi bituma batita ku mwana akiri muto ariko no mu gihe cy’ubugimbi aba akeneye kwitabwaho kuko hari ikintu aba akeneye, rero iyo aba mu muryango uhoramo intonganya, ukennye akifuza ikintu runaka akakibura ni ho hazamo kumushuka”.

Avuga ko hakenewe gushyirwa imbaraga mu bukangurambaga bwo kurinda umwana w’umwangavu haba ku muryango ndetse no ku babikora cyane ko usanga ari abasore n’abagabo babatera inda, akavuga ko bakwiye kwigishwa kugira ngo basigasire umwangavu kuko ari we mugore w’ejo uzarerera u Rwanda.

Muri Werurwe 2023 aka Karere katangaje ko gafite abakobwa 566 bari hagati y’imyaka 14 na 19 bashatse abagabo bataruzuza imyaka y’ubukure.

Raporo y’Intara y’Amajyaruguru ya 2022 ari nayo Akarere ka Gicumbi gaherereyemo, igaragaza ko abangavu 1 056 batewe inda aho 307 bonyine ari bo bagejeje ibirego mu butabera.

Iyi raporo yanagaragaje ko mu bibazo byugarije umuryango hari ingo 5 219 zibana mu makimbirane, izibana zitarasezeranye 17 523 n’abana 647 baba mu bigo binyuranye by’inzererezi.

Minisiteri y’Uburinganire n’Iterambere ry’Umuryango (Migeprof) yo yatangaje ko kuva muri Nyakanga kugera mu Ukuboza 2022, abakobwa ibihumbi 13 bari munsi y’imyaka 19 ari bo batewe inda imburagihe mu Rwanda.

Ibihumbi 23 bari munsi y’imyaka 18 ni bo batewe inda mu mwaka wa 2021, aho mu 2019 hari abana barenga ibihumbi 23, mu 2020 imibare yaragabanyutse igera ku bihumbi 19 ariko yongera kuzamuka muri 2021 igera ku bihumbi 23.

KAMALIZA AGNES

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA