Gisagara: Bahangayikishijwe n’umunuko n’amasazi ava mu kimpoteri cy’isoko

Gisagara: Bahangayikishijwe n’umunuko n’amasazi ava mu kimpoteri cy’isoko

Imvaho Nshya

October 24, 2023

Bamwe mu baturage batuye mu Karere ka Gisagara mu Murenge wa Ndora mu Kagali ka Gisagara baravuga ko bahagayikishijwe n’umunuko n’amasazi ava mu kimpoteri kiri inyuma y’isoko kandi hanatuwe n’abaturage bakemeza ko bafite impungenge ku buzima bwabo.

Batangarije Imvaho Nshya ko ubuyobozi bukwiye gushaka ahashyirwa ikimpoteri cyajya gishyirwamo imyanda icyo kikavanwa mu baturage.

Ndayisaba David atuye hafi y’iki kimpoteri avuga ko iki kintu kiswe ikimpoteri kibangamiye abaturage kuko kijugunwamo imisatsi, ibishishwa by’ibitoki byatekewe mu maresitora n’ibindi bitandukanye bigateza umwanda ukabije utakagombye.

Yagize ati: “Njyewe ndahaturiye ariko kiratubangamiye kuko kijugunwamo imyanda ibonetse yose harimo imisatsi iva mu nzu bogosheramo bakanayihatwikira ukongeraho imyanda iva mu maresitora atandukanye ibi byose biraza bigakora umwanda mubi watugiraho ingaruka tutarebye neza”.

Umuhire Esperence avuga ko bibabaje kubona ahantu hanyurwa n’abantu benshi harimo n’abayobozi bashobora kuba batumva uyu munuko uhora aha iyo imvura ihitutse kandi hano hakunda kuba hari abana bashakamo ibyo kurya bishobora kubambura ubuzima kandi n’abahaturiye na bo ntiborohewe.

Ati: “Birababaje cyane kubona aho hantu hahora hanyurwa n’abantu benshi barimo n’abayobozi kuko si kure y’Akarere ariko ubanza batumva umunuko uzamuka iyo imvura ihitutse, gusa hahoramo abana bato bushakiramo ibyo kurya ndetse harimo n’abaturage birirwamo bashakamo amakara yo gutekesha ariko ubuzima bwacu nk’abahatuye buri mu kaga mu gihe byakomeza gutya”.

Uwimana Stanislas avuga ko bibabaje kubona ahantu hamwenwa imyanda mu baturage bahazengurutse ndetse hakaba n’ibagiro hari umwanda ungana gutya hakunze kuba ibisazi bitumuka bikajya muri za resitira zitari kure ndetse no mu baturage rwose bakwiye kukimurira ahandi hatanga umutuzo ku baturage.

Yagize ati: “Biratubabaje kubona ahantu nkaha hamenwa imyanda kandi hazengurutse abaturage hegereye isoko n’ibagiro ry’amatungo hakagaragara umwanda ungana gutya havamo amasazi adutera mu ngo ndetse n’inzu zicuruza ibyo kurya no kunywa tugasaba ko cyakwimurwa kikajya kure yaho dutuye”.

Ishimwe Epiphanie avuga ko ubuyobozi bukwiye kubatabara bukimura iki kimpoteri kuko kibangamiye imibereho myiza y’abagituriye kuko bashobora kuzandura indwara z’ibyorezo.

Ati: “Twebwe turasaba ubuyobozi bwacu kudufasha bakimura iki kimpoteri kuko kibangamiye imibereho myiza y’abaturage bagituriye bashobora kucyanduriraho indwara zanavamo ibyorezo bikomeye byagira ingaruka ku baturage”.

Umuyobozi w’Akarere ka Gisagara, Rutaburingoga Jerome avuga ko iki kibazo kizwi ariko mu cyumweru kimwe iki kimpoteri kiba cyashakiwe aho kimurirwa kugira ngo babungabunge imibereho myiza y’abaturage kuko nkuko babigaragaza kirababangamiye.

Yagize ati: “Ni byo iki kibazo turakizi ariko twafashe umwanzuro w’uko iki kimpoteri kigomba kwimurwa kugira ngo habungwabungwe ubuzima bw’abahatuye kukp ntabwo twakemera ko abaturage barwara indwara zikomoka ku mwanda kandi dukeneye isuku kuri bose”.

Akomeza yibutsa abaturage ko bakwiye gukomeza kugira isuku aho batuye bityo bakaba bagiye no gukorana na Kompanyi izabakusanyiriza imyanda kandi ikayirobanura kugira ngo hagire ibyongera gukoreshwa.

Asaba abaturage kwirinda kumena aho babonye imyanda kuko ejo yabakururira ibibazo bitandukanye birimo indwara z’ibyorezo.

Ikibazo cy’ibimpoteri usanga giteza ibibazo henshi mu Turere tugize Ntara y’Amajyepfo aho usanga Akarere ka Ruhango n’Aka Huye bafite ibimpoteri bipfa gukanyakanya bikakira imyanda Uturere tundi usanga twishyiriraho ahantu hasanzwe hamenwa imyanda akenshi unasanga kuyikusanya biba bigoye kuko iba ivangavanze.

AKIMANA JEAN DE DIEU

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA