Guhabwa ifunguro ni uburenganzira bw’ibanze bw’umwana- MINEDUC
Amakuru

Guhabwa ifunguro ni uburenganzira bw’ibanze bw’umwana- MINEDUC

NTAWITONDA JEAN CLAUDE

February 28, 2022

Minisiteri y’Uburezi (MINEDUC) iratangaza ko gufatira ifunguro ku ishuri bigira uruhare mu kongera umubare w’abana bataye ishuri, ubusabane hagati y’abana ndetse n’imitsindire yabo ngo iriyongera.

Byagarutsweho na Twagirayezu Gaspard, Umunyamabanga wa Leta muri MINEDUC ushinzwe amashuri abanza n’ayisumbuye, ubwo hatangizwaga icyumweru cyahiriwe gufatira ifunguro ku ishuri.

Ni umuhango wabereye kuri G.S Ayabaraya mu Murenge wa Masaka mu Karere ka Kicukiro mu Mujyi wa Kigali kuri uyu wa Mbere tailki 28 Gashyantare 2022.

Twagirayezu, Umunyamabanga wa Leta muri MINEDUC ushinzwe amashuri abanza n’ayisumbuye, yagaragaje ko ari inshingano z’ababyeyi kubonera abana amafunguro ku ishuri.

Akomeza agira ati: “Guhabwa ifunguro ni uburenganzira bw’ibanze bw’umwana. Ni inshingano z’ababyeyi kugira uruhare mu kubonera abana amafunguro ku ishuri”.

Rukebanuka Adalbert, Umuyobozi Nshingwabikorwa wungirije w’Akarere ka Kicukiro, avuga ko gahunda yo gufatira ifunguro mu Karere ka Kicukiro ikorerwa mu bigo 44.

Asobanura ko gufatira ifunguro ku ishuri byatumye abana bagaruka ku ishuri.

Ati: “Mu Murenge wa Masaka by’umwihariko, abana bari barataye ishuri bose baragarutse”.

Muhima, Umuyobozi w’ishuri rya G.S Ayabaraya, avuga ko uretse ubuzima bwiza bw’umwana wariye, ngo aniga neza kandi agatsinda.

Akomeza avuga ati: “Iyi gahunda itaratangira ntabwo abana bigaga neza. Mu myaka ishize nta mwana warenzaga amanota 80% ariko uyu mwaka abana batsindiye kuri 95.5% kuva batangiye kurira ku ishuri”.

Umunyamabanga wa Leta muri MINEDUC, Twagirayezu Gaspard, yagaragaje ko gufatira ifunguro ku ishuri bifasha imyigire y’umwana

Ashimangira ko abana 86 biga mu mwaka wa Gatandatu, iyi gahunda itangira ababyeyi babo 54 bahise bemera iyi gahunda.

Mugabo Innocent, wiga mu mwaka wa Gatandatu w’amashuri abanza kuri G.S Ayabaraya avuga ko gufatira amafunguro ku ishuri bituma adakererwa ku buryo yananirwa kwiga neza.

Ati: “Kuva natangira kurya ku kigo byatumye ntangira gutsinda kurusha uko natsindaga ntaha”.

Mukankundimfura Vestine, urerera muri G.S Ayabaraya, avuga ko kuba abana barira ku ishuri bibafasha kuruhuka bityo bigatuma badatsindwa ahubwo bagatsinda.

Ati: “Ababyeyi hari igihe baba bagiye gukora umwana yataha saa sita agasanga ababyeyi babuze umwanya wo guteka bityo umwana agakererwa ku ishuri ariko iyo yaririye ku ishuri bimufasha kwiga neza”.

Twahirwa Sylvère, umubyeyi urerera muri G.S Ayabaraya, avuga ko afite abana biga muri iri shuri akaba yaraganirijwe ko abana bafatira amafunguro ku ishuri batsinda bityo akiyemeza kugira uruhare mu kubonera abana amafunguro.

Edith Heines, Umuyobozi w’Ishami ry’Umuryango w’Abibumbye rishinzwe Ibiribwa (PAM/WFP) mu Rwanda, avuga ko gufatira ifunguro ku ishuri bigira umusaruro mwiza ku burezi bw’umwana.

Ati: “Gahunda yo gufatira ifunguro ku ishuri ni umwanya mwiza wo kubaka uburezi burambye. Tuzakomeza gufatanya na Leta y’u Rwanda muri iyi gahunda”.

Umunsi Nyafurika wahariwe gufatira ifunguro ku ishuri uba taliki ya 01 Werurwe buri mwaka. Biteganyijwe ko icyumweru cyahariwe gufatira ifunguro ku ishuri kizasoza taliki 03 Werurwe 2022, kigasoreza mu ntara y’Amajyepfo mu Karere ka Nyaruguru.

Insanganyamatsiko y’uyu mwaka igira iti: “Imirire no kuzamura ubushobozi bwa muntu muri Afurika binyuze mu kongera ibishorwa muri gahunda yo kugaburira abanyeshuri”.  

Abana bishimira gufatira ifunguro ku ishuri

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA