Habimana yakoze ‘Software’ yo gushaka ibisubizo ku bana bata ishuri
Ikoranabuhanga

Habimana yakoze ‘Software’ yo gushaka ibisubizo ku bana bata ishuri

AKIMANA JEAN DE DIEU

January 17, 2024

Umugabo witwa Habimana Fabrice w’Imyaka 28 utuye mu Karere ka Muhanga mu Murenge wa Shyogwe, mu Kagali ka Mubuga usanzwe akora imishinga y’Ikoranabuhanga agamije gushaka ibisubizo by’ibibazo bitandukanye aravuga ko “Zero Absenteism Software” yayikoze agamije kugabanya ibibazo birimo umubare w’abana bata ishuri.

Mu kiganiro yahaye Imvaho Nshya avuga ko afite inyota yo gukora byinshi akoresheje ikoranabuhanga kandi rigatanga akazi ku bakiri bato ari nako rizana igisubizo mu bibazo bitandukanye bibangamiye imibereho myiza y’Abaturage.

Avuga ko gahunda ya “Zero Absentism Software” izafasha abayobozi bomu Nzego z’ibanze zizaba zifite uburenganzira bwo kumenya niba umwana wagombaga kujya ku ishuri yagiyeyo no kumenya impamvu atajya ku ishuri.

Habimana ati: “Iyi Software izasha abayobozi bo mu Nzego z’ibanze zizagira uburenganzira bwo kumenya niba umwana wagombaga kujya ku ishuri yagezeyo akaba yize ndetse no kumenya n’impamvu atagiye kwiga”.

Akomeza avuga ko iri koranabuhanga rizaba rifite umwihariko ko rizajya rigaragaza umubare w’Abanyeshuri bitabiriye ishuri mu Murenge, mu Karere ndetse no ku rwego rw’Igihugu bakamenya amakuru azafasha gukurikirana neza abatageze ku ishuri.

Habimana Fabrice

Yagize Ati”Iri koranabuhanga nakoze rizaba rifite umwihariko wuko rizajya rigaragaza umubare w’abanyeshuri bitabiriye ishuri ku rwego rw’Umudugudu, Akagali, Umurenge, Akarere ndetse na Minisiteri y’Uburezi bakajya bamenya neza uko abana bitabiriye ishuri kuri uwo munsi mu gihugu cyose”.

Yongeyeho ko atekereza gukora iyi “Software” yatekereje cyane ku mibare y’abanyeshuri batiga neza bagata ishuri bisubiza inyuma Ireme ry’Uburezi abenshi bavuga ko rigenda ritakara cyane.

Yagize ati: “Njya gutekereza gukora iri koranabuhanga natekereje ku Ireme ry’Uburezi kuko Minisiteri yagiye igaragaza ko guta ishuri no kutiga bisubiza inyuma iri reme ry’uburezi kuko umwana yamaze iminsi atabashije kwigira hamwe”.

Habimana Fabrice ubusanzwe yize amashuri y’Ikiciro cya kabiri cya Kaminuza mu gihugu cya Malaysia ari naho yigiye ibijyanye n’iri koranabuhanga, yize ibijyanye no gukora amashanyarazi, arimo gukora nubwo mu mashuri yisumbuye.

Hamimana yanabashije gushyiraho uburyo bwo gusinya ku bakozi b’Ibigo bitandukanye kandi bikora neza kuko umukoresha amenya neza igihe umukozi yaziye ku kazi n’Igihe umukozi yakaviriyemo.

Yatangarije Imvaho Nshya ko kugera ubu afite ibigo bisaga ibihumbi 2 byamaze guhabwa uburyo bugezweho bwo kumenyesha isaha ya mwalimu urimo kwigisha isomo ko mminota yagenewe umwarimu irangiye, bityo bikarinda umunyeshuri gutakaza iminota ajya kuvuza icyuma abenshi bazi nka “Kadende” kandi abandi barimo kwiga.

Yatanze umukoro ku rubyiruko rusanzwe rufite ibitekerezo byo kuzamura impano zabo mu mishinga y’ikoranabuhanga ko bakwiye gukomeza kuzamura impano zabo mu ikoranabuhanga.

Mu mibare igaragazwa na Minisiteri y’Uburezi mu Rwanda igaragaza ko abana bafite imyaka iri hagati 7-12 bagabanyutse bava kuri 98.9% muri 2020-2021 bagera kuri 95,2% mu mwaka wa 2021-2022.

Gusa ubu bushakashatsi kandi bwerekanye ko urebye ku bana bitabira ishuri barenga 141,5% bivuze ko hari abana baje ku ishuri batarageza imyaka cyangwa bakaza barengeje imyaka yo kujya ku ishuli.

Iyi raporo kandi igaragaza ko mu mwaka wa 2019 -2020 mu mashuri abanza 9,5% bari barataye ishuri naho mu mwaka wa 2020-2021 abagera ku 7,1% nabo bataye ishuri.

Mu mashuri yisumbuye mu mwaka wa 2019-2020 abasaga 10,3% bataye ishuri naho mu mwaka wa 2020-2021 abagera ku 9,2% bataye ishuri ariko muri rusange abahungu ni bo benshi bataye ishuri.

Muri Raporo yashyizwe hanze n’Ishami ry’Umuryango w’Abibumbye rishinzwe Uburezi, Ubumenyi n’Umuco (UNESCO)
rigaragaza ko mu mwaka wa 2022 abana bari hagati y’imyaka 6-18 bagera kuri miliyoni 244 batari bari ku ishuri cyangwa ngo babe bari mu kazi ndetse abenshi basangwa mu bihugu byo munsi y’Ubutayu bwa Sahara n’iyo Hagati no mu Majyepfo y’Aziya ari natwo dufite umubare mwinshi.

TANGA IGITECYEREZO

  • D E
    January 20, 2024 at 12:52 pm Musubize

    Big up bro! Igihugu gikeneye abantu nkawe!

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA