Ubuyobozi butegura imikino y’igikombe cy’Isi cy’umupira w’amaguru (FIFA World Cup) bwatangaje urutonde rw’abahanzi bazaririmba mu birori byo gutangiza iyo mikino iteganyijwe muri Kamena 2026 barimo J Balvin, Katy Perry, Future, Alanis Morissette n’abandi.

Abinyujije ku mbuga nkoranyambaga kuri uyu wa 09 Gicurasi 2026, Perezida w’Ishyirahamwe ry’Umupira w’Amaguru ku Isi (FIFA), Gianni Infantino yasangije abamukurikira itangazo rigaragaza uko imihango yo gutangiza imikino y’igikombe cy’Isi cya 2026 (FIFA World Cup 2026) izaba iteye.

Yagize ati: “Aya marushanwa azahuza umuziki, umuco n’umupira w’amaguru mu buryo bugaragaza umwihariko wa buri gihugu ndetse n’ubumwe buranga iri rushanwa.”

Irushanwa rizatangira tariki ya 11 Kamena, hakinwa umukino wo gufungura hagati y’igihugu cyakiriye cya Mexico na Afurika y’Epfo, ukaba uzabera kuri sitade ya Azteca Stadium, muri icyo gihe ikazaba yitwa Mexico City Stadium.

Iryo tangazo rikomeza rigaragaza uko abahanzi bazajya baririmba, aho FIFA yagize iti: “Ibyamamare bikomeye mu muziki ku isi birimo J Balvin, Katy Perry, Future, Alanis Morissette na Michael Bublé bizaririmba muri FIFA World Cup 2026 izabera na Leta Zunze Ubumwe z’Amerika, Mexico na Canada.”

Bakomeza bagaragaza ko abazitabira umuhango wo gufungura irushanwa uzabera muri Mexico City ukazataramamo abahanzi bakomeye bo muri Amerika y’Epfo no muri Amerika yo Hagati, barimo J Balvin, itsinda rya rock ryo muri Mexico rya Maná, Alejandro Fernández, Belinda, Lila Downs, hamwe n’itsinda Los Ángeles Azules.

Canada izakina na Bosnia and Herzegovina tariki ya 12 Kamena, i Toronto. Icyo gihe abazitabira bazataramirwa n’abahanzi barimo Alanis Morissette, Michael Bublé, Alessia Cara, Elyanna, Jessie Reyez na Nora Fatehi.

Mu gihe Mujyi wa Los Angeles muri Leta Zunze Ubumwe za Amerika, hazaba ibirori bizataramamo abarimo Katy Perry, Future, Anitta, Lisa, Rema na Tyla.

Biteganyijwe ko ibirori bitangiza imikino y’igikombe cy’Isi cya 2026 (FIFA Woerld Cup 2026), bizitabirwa n’abanyamuziki bakomeye ku Isi, bagera kuri 22, bikazabera mu mijyi itatu y’ibihugu bizakira ari byo Mexique, Leta Zunze Ubumwe za Amerika na Canada, kuva tariki ya 11 Kamena kugeza ku ya 19 Nyakanga 2026.

Ba uwa mbere mu kumenya amakuru agezweho!!!