Hatangijwe iyubakwa ry’uruganda rw’inkingo n’imiti mu Rwanda
Amakuru

Hatangijwe iyubakwa ry’uruganda rw’inkingo n’imiti mu Rwanda

NTAWITONDA JEAN CLAUDE

June 23, 2022

Kuri uyu wa Kane taliki ya 23 Kamena 2022,  Perezida wa Repubulika y’u Rwanda Paul Kagame yifatanyije n’abayobozi batandukanye mu gushyira ibuye ry’ifatizo ahagiye kubakwa uruganda rwa mbere rubanziriza uruhererekane rw’inganda zikora inkingo zo mu bwoko bwa mRNA muri Afurika.

Ni umuhango witabiriwe na Perezida wa Ghana Nana Akufo-Addo, Umuyobozi Mukuru w’Ishami ry’Umuryango w’Abibumbye ryita ku Buzima (OMS) Dr. Tedros Adhanom Ghebreyesus, Perezida wa Guyana Irfaan Ali, Umuyobozi Mukuru w’Ikigo cy’Abadage BioNTech Uğur Şahin, Perezida wa Komisiyo y’Umuryango w’Afurika Yunze Ubumwe Moussa Faki Mahamat, n’abandi banyacyubahiro batandukanye.

Umuhango wo gushyira ibuye ry’ifatizo ahazashyirwa urwo ruganda wabereye Masoro mu cyanya cyahariwe inganda cya Kigali (KSEZ).

Perezida Kagame yagize ati: “Uyu muhango wo gushyira ibuye ry’ifatizo ahubakwa uruganda ni intambwe ikomeye itewe mu kugera ku buringanire bwo kubona inkingo muri Afurika. U Rwanda rurateganya kubakira kuri iri shoramari rushyiraho ingamba zikurura abandi banyengana n’abahanga udushya.”

Yakomeje avuga ko u Rwanda rushyigikiye ukwiyemeza kw’Ikigo BioNTech cyateguye ikoranabuhanga rigezweho ry’urwo ruganda ruzakoresha ingufu zitangiza ibidukikije ruzaba rwuzuye i Kigali bitarenze mu mpera z’uyu mwaka.

Ati: “Tuzakorana bya hafi kugira ngo ibyo bigerweho. Ubu butaka ni bwo bwahariwe gukorerwaho imiti n’inkingo. U Rwanda ruzakorana n’Ikigo Mpuzamahanga cy’Imari (IFC) n’abandi bafatanyabikorwa barimo Banki y’Ishoramari y’i Burayi (EIB) mu gutegura gahunda yo guteza imbere uru rwego.”

Uğur Şahin yavuze ko nta gushidikanya ko byari bikwiye kubona inkingo n’indi miti yifashishwa mu buvuzi butandukanye, bigenewe Abanyafurika kandi bikorewe ku mugabane w’Afurika.

Ati: “Icyo ni na cyo gitekerezo cy’ingenzi kigenga amahame yacu agenga imikorere y’inkingo n’imiti. Umuhango w’uyu munsi utangiye indi ntambwe igana ku iterambere.”

U Rwanda, Senegal, na Ghana ni byo bihugu byateguriwe kubona iryo koranabuhanga rigezweho rizagezwa ku mugabane w’Afurika ziteranyijwe mu buryo bwa kontineri (BioNTainers), bigatwara igihe gito cyo kuzitunganyiriza ahabugenewe no gutangira kuzibyaza umusaruro.

Buri ruganda muri zo ruzaba rufite ubushobozi bwo gukora doze zigera kuri miliyoni 50, kandi izo nganda ntizizakora inkingo za COVID-19 gusa kuko zizajya zikora n’inkingo z’izindi ndwara zirimo Malaria, VIH/SIDA n’Igituntu.

Ubuyobozi bwa BioNTech buvuga ko BioNTainers zizaba zageze i Kigali, ahagiye gutangira gutunganywa, bitarenze mu mpera z’umwaka wa 2022 nk’uko bigaragara mu itangazo ryashyizwe ahagaragara kuri uyu wa Kane taliki ya 9 Kamena.

Icyo kigo, cyakoze inkingo zakoreshejwe mu bihugu byinshi byo mu Burengerazuba bw’Isi ku bufatanye na Pfizer, mu ntangiriro z’uyu mwaka ni bwo cyatangije gahunda yo gufasha Ibihugu by’Afurika kwikorera inkingo n’indi miti ariko kigakomeza gukurikirana imikorere y’izo nganda zizajya zitanga umusaruro ufite ibirango by’uko wakorewe muri Afurika.

Ubuyobozi bwa BioNTech bwizeye ko izo nganda nizimara kuzura zizatanga umusaruro ufite ireme ryizewe mu ruhando mpuzamahanga, bikazafasha guhaza ubusabe bw’inkingo n’indi miti bikenerwa mu bihugu by’Afurika buri mwaka.

Byitezwe ko buri ruganda ruzaba rwubatswe ku buso bwa metero kare 800 aho ruzashyirwa hose, rukaba rugizwe na kontineri 12 zigabye mu byiciro bibiri: ahatunganyirizwa imiti n’ahatunganyirizwa inkingo.

Umushinga wo guharanira ukwigira kw’Afurika mu rwego rw’ubuvuzi, watangiye nyuma y’aho icyorezo cya COVID-19 kigaragaje ubusumbane n’ukwikubira bikabije byagaragaye mu kubona no gukwirakwiza inkingo z’icyo cyorezo, ku birebana n’inkingo zatinze kugera muri Afurika kugeza n’ubu umubare w’abamaze gukingirwa ku mugabane ukaba ukiri hasi cyane.

Gusa na none impuguke mu rwego rw’ubuzima rusange bavuga ko ubwitabire bwo kwikingiza no kwirinda icyorezo cya COVID-19 bwanabangamiwe n’ibihuha byagiye bisakara ku mbuga nkoranyambaga, ubushobozi budahagije no kuba abaturage benshi batarabihaye agaciro gakomeye bigatuma n’izo babonye zibapfira ubusa.

Kubaka inganda zikora inkingo n’indi miti ku mugabane w’Afurika bibonwa nk’intambwe ikomeye igiye guhindura mu rwego rw’ubuzima rusange, bityo u Rwanda rwiyemeje gusigasira ubu bufatanye no gutanga umusanzu warwo mu guharanira ko butanga umusaruro ku Mugabane w’Afurika mu buryo burambye.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA