Hatangijwe Umushinga w’imirasire y’izuba uzagabanya imyuka ihumanya ikirere
Amakuru

Hatangijwe Umushinga w’imirasire y’izuba uzagabanya imyuka ihumanya ikirere

NTAWITONDA JEAN CLAUDE

May 1, 2022

Hatangijwe umushinga ugamije kugabanya imyuka ihumanya ikirere, hagakoreshwa ingufu zitangwa n’imirasire y’izuba aho gukoresha amashanyarazi.

Minisitiri w’Ibidukikije Dr. Mujawamariya Jeanne d’Arc, yashimiye uwo mushinga watangiye gushyirwa mu bikorwa na MTN Rwanda witwa “MTN Project Zero” ugamije kurengera ibidukikije muri rusange.

Ibinyujije mu mushinga wayo wo kubungabunga ibidukikije, Sosiyete y’itumanaho MTN witwa ‘MTN Project Zero’ yatangije mu 2016, yatangiye gukoresha imirasire ikomoka ku zuba, aho gukoresha amashanyarazi mu rwego rwo kubungabunga ibidukikije.

Minisitiri w’Ibidukikije avuga ko kugabanya ibyuka bihumanya mu kirere, ari umushinga w’icyerekezo u Rwanda rwihaye, ashimira iyo sosiyete y’itumanaho.

Yagize ati: “Ni umushinga w’icyerekezo igihugu cyacu kirimo cyane cyane cyo kugabanya ibyuka bihumanya mu kirere, kugabanya umwuka uhumanya  wa karubone ndetse no kugira ngo tugire rwa Rwanda twifuza, u Rwanda rubungabunga ibidukikije, u Rwanda ruduha umwuka mwiza, u Rwanda ruduka   amazi meza, u Rwanda ruduha ingufu z’amashanyarazi zishobora kubonwa na buri muntu wese”.

Yongeyeho kandi ati: “Uyu munshinga uzagabanya ibyuka bihumanya, bidufashe kugabanya n’indwara ziterwa n’ibyo byuka cyane cyane indwara z’ubuhumekero. Ni ugukomeza twese, mu bigo turimo, dushinzwe, nibura twese tukagabanya ingufu z’amashanyarazi dukoresha, tugakoresha ingufu z’amashanyarazi zikora cyane cyane ko izuba turibonera ubuntu, aho kutwica tuzajya turikoresha turibyaza ingufu z’amashanyarazi”.

Minisitiri w’Ibidukikije Dr. Mujawamariya Jeanne d’Arc mu kiganiro n’abanyamakuru

Umuyobozi ushinzwe ikoranabuhanga muri MTN Rwanda Gakwerere Eugene, yasobanuye ko kugira ngo bageze itunumanaho ku bantu bakoresha umuriro   w’amashanyarazi byagiraga ingaruka ku kirere.

Yagize ati: “Ahangaha cyane cyane dufite imashini nyinshi yaba hano cyangwa i Nyarutarama mwabonye ko twangiza ikirere mu buryo bungana hafi na Toni 3100 kandi byose bituruka ku muriro tugura muri REG”.

Yakomeje kandi avuga ku bijyanye n’Amasezerano y’i Paris, aho bo bifuza kugabanya cyane igipimo cy’imyuka ihumanya ikirere.

Yagize ati: “Kugira ngo dushobore kugabanya uko duhumanya ikirere, amasezerano yabereye i Paris bo bavuga ko bashaka kugabanya kugeza kuri dogere 2, ariko  twebwe turashaka kugabanya kugera kuri dogere 1,5.

Kugira ngo tubikore mbere na mbere ni uko tugomba kugabanya umuriro dukoresha hano mu byuma byacu, ni yo mpamvu rero mwabonye uyu mushinga dushaka gukora kugira ngo ujye udufasha dukoreshe imirasire y’izuba”.

Yongeyeho ko Itegeko rigenwa n’ Ikigo cy’Igihugu gishinzwe kugenzura imikorere y’inzego zimwe z’imirimo ifitiye Igihugu akamaro RURA;  rivuga ko abafatanyabikorwa bigenga badashobora gutanga ingufu z’imirasire y’izuba ku kigero kirenze kilowate 50, kandi ko izo kilowate 50, MTN ivuga ko zingana na 3% by’umuriro wose bakoresha mu nyubako kagabanyije nibura toni 124 MTN yahumanyagaho ikirere ku munsi.

Kugira ngo MTN Rwanda ishyire mu bikorwa uyu mushinga yafatanyije na sosiyete ya SAWA Energy itanga ingufu z’imirasire y’izuba mu gufasha kugabanya imyuka ihumanya ikirere ndetse bigakorwa ku giciro gito ugereranyije n’amashanyarazi.

Umuyobozi wa SAWA Energy, Samuel Kaufman yavuze ku ruhare uwo mushinga ufite mu kubungabunga ibidukikije, hagabanywa imyuka ihumanya ikirere kimwe n’igiciro cy’umuriro kuko imirasire y’izuba ihendutse.

Yagize ati: “Dukorana na za kaminuza, ibigo bibika amakuru, ibigo by’itumanaho, ibitaro ndetse n’ibindi. ubu turimo gukwirakwiza iyi gahunda hirya no hino kuko ntituri gukorana na MTN Rwanda yonyine, turi gukorana n’ibigo bigera muri 60 ndetse turateganya no gutanga Megawate 20 z’ingufu z’imirasire y’izuba mu bice by’ubucuruzi”.

Umuyobozi wa SAWA Energy, Samuel Kaufman

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA