Hatangijwe urugerero rudaciye Ingando, urubyiruko rusabwa kwitwararika
Amakuru

Hatangijwe urugerero rudaciye Ingando, urubyiruko rusabwa kwitwararika

Imvaho Nshya

March 15, 2022

Urubyiruko rutandukanye rwasoje amashuri yisumbuye umwaka wa 2020/2021 rwasabwe kwitwararika no kwirinda kwishora mu ngeso mbi zishobora no kubangiriza ubuzima bw’ejo hazaza.

Ibi byagarutsweho ku wa Mbere taliki ya 14 Werurwe 2022 ubwo hirya no hino mu Gihugu hatangizwaga ku mugaragaro urugerero rudaciye ingando rw’abanyeshuri batandukanye basoje amashuri yisumbuye.

Abayobozi batandukanye bari bari mu Turere tunyiuranye tw’Igihugu aho bifatanyije n’abo banyeshuri gutangiza ku mugaragaro uru rugerero bifatanya no mu bikorwa bitandukanye birimo kubakira abatishoboye n’ibindi bisanzwe bikorwa n’intore ziri ku rugerero.

Minisitiri w’Ubumwe bw’Abanyarwanda n’Inshingano mboneragihugu Dr Bizimana Jean Damascène wifatanyije n’Intore z’Inkomezabigwi zo mu Karere ka Rubavu mu Ntara y’Iburengerazuba yasabye uru rubyiruko kwima amatwi abakwirakwiza ibinyoma ku mbuga nkoranyambaga.

Yakomeje ati: “Abakigambanira igihugu yaba abari mu mashyamba ya Congo n’abakwiza ingengabitekerezo ya Jenoside imbere mu gihugu no hanze ndasaba urubyiruko kubima amatwi.”

Minisitiri w’Uburezi, Dr Uwamariya Valentine, wari uri mu Karere ka Gisagara we yasabye abanyeshuri basoje amashuri yisumbuye kurangwa n’ibikorwa byiza, bakagendera kure ingeso mbi zishobora kubicira ubuzima.

Yakomeje agira ati “Ibi bikorwa bibafasha ubwabo ndetse n’igihugu ariko no kongera kwiyibutsa za ndangagaciro n’ubwo ku ishuri basanzwe bagira itorero ariko noneho baje guhamya ibyo bize, umuco w’ubutore no gukunda Igihugu.”

Yavuze ko uru rubyiruko rukwiye kugira uruhare mu kurwanya abishora mu bikorwa bishobora kwangiza ubuzima bwabo birimo kwishora mu kunywa ibiyobyabwenge n’ibindi.

Ati “Uru rugerero rubaye tubona ibibazo bitandukanye mu rubyiruko, birimo ubuzererezi, kunywa ibiyobyabwenge, gutwara inda zitateganyijwe ari abangavu ndetse hari n’igihe baziterwa n’ingimbi bagenzi babo. Ni umwanya mwiza rero wo kongera kugaruka kuri izo ndangagaciro bakabihugurirwa ndetse bagafata n’umwanya wo kwegera bagenzi babo.”

Insanganyamatsiko y’uyu mwaka igira iti “Duhamye umuco w’ubutore ku rugerero rwo kwigira” igamije gukangurira urubyiruko kwishakamo ibisubizo bibageza ku iterambere badategereje akimuhana ariko bigendanye n’indangagaciro na kirazira.

Minisitiri w’ubutegetsi bw’Igihugu Gatabazi Jean Marie Vianney, we yari ari mu Ntara y’Amajyaruguru mu Karere ka Musanze yibukije urubyiruko ruri ku rugerero ko  ari umwanya wo kuzamura imyumvire ku bibazo bibangamiye urungano rwabo birimo ubuzererezi, ibiyobyabwenge, inda zitateguwe, guta ishuri, n’ibindi binabangamiye umuryango Nyarwanda aho batuye.

Yabijeje kubaba hafi muri iki gihe bari ku rugerero abasaba kuba intangarugero kugira ngo babashe guhindura abandi no gushishikariza abaturage kwikingiza ndetse asaba abayobozi b’Inzego z’Ibanze kubaba hafi kugira ngo urugerero rugende neza.

Minisitiri w’Urubyiruko n’Umuco Rosemary Mbabazi ni we watangije uru rugerero rw’Inkomezabigwi ku nshuro ya cyenda mu Ntara y’Iburasirazuba yasabye uru rubyiruko kurangwa n’indangagaciro z’Umuco Nyarwanda, ishyaka, ubutwari, biranga Abanyarwanda bakunda Igihugu bakanacyitangira.

Biteganyijwe ko urugerero ruzasozwa tariki ya 25 Gicurasi 2022, ubusanzwe gahunda y’Urugerero ishyirwaho n’Itegeko Nshinga rya Repubulika y’u Rwanda ryo mu 2003 ryavuguruwe mu 2015 cyane cyane mu ngingo yaryo ya 48.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA