Ellen DeGeneres na Portia DeRossi bashimiwe kwita ku hazaza h’ingagi mu Rwanda
Amakuru

Ellen DeGeneres na Portia DeRossi bashimiwe kwita ku hazaza h’ingagi mu Rwanda

Imvaho Nshya

June 8, 2022

Ku wa Kabiri taliki ya 7 Kamena 2022, Minisitiri w’Intebe Dr. Edouard Ngirente yahagarariye Perezida Kagame mu muhango wo gutaha ku mugaragaro Ikigo cy’ubushakashatsi ku kubungabunga ingagi kizwi nka ‘Ellen DeGeneres Campus of the Dian Fossey Gorilla  Fund’ giherereye mu Murenge wa Kinigi, mu Karere ka Musanze.

Icyo kigo kigiye gukomeza gukorana n’umushinga “Dian Fossey Gorilla Fund” watangijwe na Dian Fossey benshi bamenye ku izina rya Nyiramacibiri, witangiye kubungabunga ingagi zo mu misozi kugeza ku mwuka we wa nyuma.

Ni impano umuherwe w’Umunyamerikakazi Ellen DeGeneres yahawe n’umugore we Portia DeRosi taliki ya 20 Mutarama 2018, ubwo yizihizaga isabukuru y’amavuko y’imyaka 60 yari amaze avutse.

Minisitiri w’Intebe yagaragaje ko itahwa ry’icyo kigo, cyatangiye kubakwa mu mwaka wa 2020 kikadindizwa n’impamvu zirimo icyorezo cya COVID-19, ari uw’agaciro kandi ari kimwe mu bihamya by’imbaraga zishyirwa mu kubungabunga urusobe rw’ibinyabuzima mu Rwanda by’umwihariko aho Leta ifatanya n’abafatanyabikorwa banyuranye mu kubungabunga ubuzima bw’ingagi zo mu misozi.

Yagize ati: “Kubungabunga urusobe rw’ibinyabuzima ni inkingi ya mwamba ya gahunda y’ubukerarugendo mu Rwanda. Ni na yo mpamvu kubungabunga ingagi zo mu misozi ari wo mutima wa gahunda zacu z’ibanze. Binyuze mu mirimo y’iki kigo tuzabona iterambere ry’ubushakashatsi ku ngagi n’imiturire yazo.”

Yakomeje agira ati: “Mu izina rya Guverinoma y’u Rwanda n’abaturage, ndabashimiye Ellen na Portia kuba mukunda u Rwanda ndetse n’urukundo rurambye mufitiye gahunda zo kubungabunga ingagi zo mu misozi musigasira umurage wasizwe na Dian Fossey. Iki kigo kizaharanira ahazaza heza h’ingagi zo mu misozi no kubaka umuryango w’abahanga n’abashakashatsi mu kubungabunga urusobe rw’ibinyabuzima hano muri Kinigi.”

Ellen DeGeneres yagaragaje ko atewe ishema no gukabya inzozi yakuranye kuva afite imyaka 12 aho yakurikiranaga ibikorwa bya Nyiramacibiri mu Birunga. Avuga ko na we yahoranaga ubushake bwo gukora ibikorwa nk’ibye, akaba abigezeho agejeje ku myaka 64 y’ubukuru.

Yasabye buri wese, yaba abashakashatsi n’abandi bifuza kumenya byinshi ku ngagi zo mu misozi, kujya basura icyo kigo, bagahabwa amakuru n’ubumenyi byimbitse mu birebana no kwita no kubungabunga urusobe rw’ibinyabuzima.

Umuyobozi mukuru w’Ikigo cy’Igihugu cy’Iterambere (RDB), Clare Akamanzi, yavuze ko icyo kigo kiri ku rwego mpuzamahanga kije gikenewe, kugira ngo gifashe abakenera amakuru yimbitse mu birebana n’ubuzima bw’ingagi n’urundi rusobe rw’ibinyabuzima, bikazafasha gushyigikira urwego rw’ubukerarugendo.

Icyo kigo cyubatswe ku bufatanye n’abafatanyabikorwa batandukanye bivugwa ko cyuzuye gitwaye akayabo k’amafaranga y’u Rwanda asaga miliyari 14 (miliyoni 14 z’amadolari y’Amerika). Amafaranga menshi yagiye mu mifuka y’Abanyarwanda babonyemo akazi mu mirimo yo kubaka no gukorera icyo kigo cyatangiye imirimo yacyo muri Gashyantare uyu mwaka.

Icyo kigo kizengurutswe n’amashyamba yatewe ku buso bwa metero kare 48,562.3 (12 Acre), aho kuri ubu na byo bikururira urundi rusobe rw’ibinyabuzima nk’inyoni, ibikeri n’izindi nyamaswa nk’uko bishimangirwa na Ellen DeGeneres urimo guteganya no kuzaza gutura mu Rwanda.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA