Hibutswe abakoreraga MININTER, MINIFOP na MINITRASO bazize Jenoside
Amakuru

Hibutswe abakoreraga MININTER, MINIFOP na MINITRASO bazize Jenoside

NTAWITONDA JEAN CLAUDE

April 29, 2022

Minisiteri y’Ubutegetsi bw’Igihugu (MINALOC), iy’Abakozi ba Leta n’Umurimo (MIFOTRA), Minisiteri y’Umutekano, n’ibigo bizishamikiyeho n’Urwego rushinzwe Abinjira n’Abasohoka, bibutse abari abakozi ba Minisiteri zitwaga MINIFOP, MININTER na MINITRASO bazize Jenoside yakorewe Abatutsi mu 1994. Abakozi bamaze kumenyekana ni 25.

Muri iki gikorwa cyabereye i Kigali uyu munsi ku wa 28 Mata 2022, Minisitiri w’Ubutegetsi w’Igihugu Gatabazi Jean Marie Vianney yavuze ko ari ngombwa kwibuka amateka Igihugu cyanyuzemo mu rwego rwo gusobonukirwa ibibi byayaranze no guharanira ko bitazongera.

Ati: “Kwibuka ni ngombwa nk’Abanyarwanda kugira ngo duheshe agaciro abacu bazize Jenoside yakorewe Abatutsi, ni umuti, ni icyomoro kandi ni imbaraga, kwibuka ni umwanya wo kuzirikana amateka yaranze Igihugu cyacu tugasobanukirwa ibibi byayaranze tugaharanira ko bitazongera ukundi. Ni umwanya wo kuzirikana neza ubutwari bw’Inkotanyi n’abandi Banyarwanda mu ngeri zinyuranye bakoze ibikorwa by’ubutwari bakabasha gutabara, bagashobora kurokora Abatutsi bahigwaga”.

Yongeyeho ati: “Amateka tugomba guhora tuyasubiramo kugira ngo adufashe mu byemezo dufata no mu ngamba dufata ku gihugu cyacu uyu munsi n’igihe kizaza”.

Minisitiri Gatabazi yagaragaje ko kuba ibigo na za Minisiteri bifata umwanya wo kwibuka abazize Jenoside yakorewe Abatutsi, bituma bazirikana ko hari abayobozi bishe abakozi bakoreshaga ndetse n’abakozi bishe abayobozi babo. Bigaragaza ko urwango n’amacakubiri byari byarahawe intebe mu kazi kakabaye gahuza abakozi n’abayobozi bakaba umwe mu gukorera Igihugu, bityo bagaharanira kugira ubumwe ibyo ntibizongere ukundi.

Ati: “Iyo twibuka muri gahunda nk’izi ngizi aba ari ugukomeza kwibutsa icyo twahisemo, iyo duhuriye mu kazi tuba tugize umuryango wundi, uko kubana muri kano kazi dusangiye bikwiye kuba intandaro yo kubaka ubumwe bwacu, tukaba inshuti, tukaba abavandimwe, tugatabarana tukajya inama. Muri ubu buzima turimo turasabwa ngo amateka yacu atwibutse anadutoze kubana”.

Yasabye ko kandi gahunda ya Ndi Umunyarwanda yakomeza kuzirikanwa kuko ari umwanya mwiza wo gusangira amateka n’ubuzima.

Mu kiganiro gifite insanganyamatsiko igira iti: “Kwibuka, twahisemo kuba umwe”, Hon Uwacu Julienne Umuyobozi muri MINUBUMWE ushinzwe ibikorwa bikorwa n’abaturage mu kwiyubaka no kudaheranwa n’amateka Igihugu cyanyuzemo (Community Resilience), yagarutse ku mateka mabi yaranze u Rwanda mu bihe bitandukanye, asobanura ibihe by’ingenzi by’isenyuka ry’ubunyarwanda nk’umuzi muremure wagejeje kuri Jenoside yakorewe Abatutsi.

Yavuze ko mbere y’umwaduko w’abakoloni, Abanyarwanda bari babayeho basangiye byinshi nk’ibyo basangiye uyu munsi; basangiye isano, umuco, ururimi babana nk’abavandimwe,

Rusekampunzi Pierre Celestin n’umuvandimwe we batanga ubuhamya

Ati: “Mu 1900 ni bwo umukoloni wa mbere yageze muri iki Gihugu, n’ubwo atahatinze yazunguwe n’undi waje mu 1919, habanje Abadage hakurikiraho Ababiligi ari na bo bahamaze igihe kinini, iyo urebye intwaro zikomeye abakoloni bakoresheje kugira ngo bashobore gutegeka u Rwanda n’ibindi bihugu by’Afurika ni izo gucamo ibice abanegihugu kugira ngo babone uko babategeka”.

Hon. Uwacu yakomeje agaragaza uburyo abakoloni basenye ubumwe bw’Abanyarwanda n’indangagaciro zari zishingiye ku Itorero ryari irerero ry’Igihugu, basenye imiyoborere y’Igihugu n’uburyo umuryango nyarwanda wari wubatse.

Ati: “Mu 1933, abakoloni batangije mu buryo bwanditse ibintu byashoboraga kwifashishwa n’uwo ari we wese kugira ngo amenye ngo uyu ni kanaka; ibyo bise amoko babigereranya n’ibyo basize iwabo babyandika mu gitabo kitwa ibuku gihinduka indangamuntu, ahandikwaga Umuhutu, Umututsi n’Umutwa. Mu by’ukuri ibyari bisanzwe ari ibyiciro by’imibereho bihinduka amoko ndetse babishakira n’igisobanuro bagaragaza uko Umuhutu ateye, uko Umututsi ateye n’Umutwa, babashakira n’inkomoko nk’aho u Rwanda rutagiraga nyira rwo”.

Yongeyeho ati: “Iyo Buku cyangwa indangamuntu yifashishijwe n’abakoze ibara mu bihe bitandukanye muri iki gihugu”.

Nk’uko yakomeje abigarukaho, ayo macakubiri yakomeje gukura kubera ubutegetsi bubi bwariho, bwifashishije inzira zose mu kuyabiba kugeza ubwo habaye Jenoside yakorewe Abatutsi, abarenga miliyoni bicwa mu minsi ijana gusa.

Hazirikanwe ubutwari bw’Inkotanyi zabohoye Igihugu

Inkotanyi zahagaritse Jenoside zikarokora abari bakiriho zikabohora u Rwanda, zongeye kubaka Igihugu ubunyarwanda n’ubumwe bwari bwarasenywe bwongera kwimakazwa ari na yo mpamvu hagiyeho Leta y’Ubumwe bw’Abanyarwanda.

Hon. Uwacu ati: “Abanyarwanda twahisemo kuba umwe kuko ni byo biduha imbaraga, ni byo biduha agaciro, twahisemo kuba umwe kuko kutaba umwe aho byatugejeje twarahabonye”.

Rusekampunzi Pierre Celestin wari uhagarariye imiryango y’ababuze ababo muri Jenoside yakorewe Abatutsi bibutswe uyu munsi, yatanze ubuhamya, agaruka ku mateka mabi yaranze Kivugiza (i Nyamirambo mu Mujyi wa Kigali) aho we n’umuryango we bari batuye, hakunze kurangwa n’ibikorwa byo gutoteza Abatutsi, kugeza ubwo kuva ku italiki ya 7 Mata 1994 habaye ubwicanyi ndengakamere.

Yagarutse ku buryo umubyeyi we (mama we) n’abandi Batutsi bari batuye muri kariya gace 383 bishwe urw’agashinyaguro bakajugunywa mu rwobo.

Yavuze ko urwango ari rwo rwatumye Jenoside ishoboka, bityo Abanyarwanda bakwiye kwimakaza ubumwe n’amahoro bakirinda icyakongera kubacamo ibice.

Ati: “Twibuke twiyubaka duharanira kuba umwe, nituba umwe ntawe uzatunyuramo”.

Muri uru rugendo rwo kwibuka no kwiyubaka, Rusekampunzi yavuze ko imiryango y’ababuze ababo muri Jenoside yakorewe Abatutsi bakoraga muri ziriya Minisiteri bashinze umuryango ubahuza ubafasha guhura bakamenya ibibazo bya buri wese umunsi ku wundi no kurwana ishyaka ry’ababyeyi, abavandimwe babuze.

Yagaragaje ko ariko hakenewe inkunga y’ibitekerezo n’amikoro kugira ngo uyu muryango ushobore gukora.

Mbere ya Jenoside yakorewe Abatutsi mu 1994, MIFOTRA yitwaga MINIFOP (Minisiteri y’Abakozi ba Leta/Ministère de la Fonction Publique). MININTER yari ishinzwe Ubutegetsi bw’Igihugu n’Amajyambere ya Komini. MINITRASO yari Minisiteri y’Umurimo n’Imibereho myiza y’Abaturage (Ministère du Travail et des Affaires Sociales).

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA