Hitezwe byinshi ku masezerano u Rwanda rwasinyanye na Guinea Bissau
Amakuru

Hitezwe byinshi ku masezerano u Rwanda rwasinyanye na Guinea Bissau

NTAWITONDA JEAN CLAUDE

March 7, 2022

Kuri uyu wa Mbere taliki ya 7 Werurwe 2022, Leta y’u Rwanda n’iya Guinea Bissau byasinyanye amasezerano y’ubufatanye mu rwego rw’ubukungu n’ubucuruzi, mu burezi, ubukerarugendo, inama z’ubucuruzi no kubungabunga ibidukikije. Ayo masezerano yitezweho guhidura byinshi mu butwererane ibihugu bisanzwe bifitanye mu nzego zitandukanye.

Ayo masezerano yashyizweho umukono mu gihe Perezida wa Guinea Bissau Umaro Sissoco Embaló, ari mu ruzinduko rw’iminsi itatu ari na rwo rwa mbere agiriye mu Rwanda.

Perezida Umaro Embaló Embaló ari kumwe na Perezida wa Repubulika y’u Rwanda Paul Kagame, ni bo bahagarariye umuhango wo gushyira umukono kuri ayo masezerano wakozwe na ba Minisitiri b’Ububanyi n’amahanga b’ibihugu byombi.

Perezida Kagame yashimye mugenzi we wa Guinea ku bw’uru ruzinduko we n’itsinda ryamuherekeje bagiriye mu Rwanda, abizeza ko na we yiteguye kuzabishyura mu bihe biri imbere.

Yakomeje avuga ko ubu bufatanye bushimangira amahirwe atangwa n’Isoko Rusange ry’Afurika (AfCFTA), ndetse akaba ari n’umuyoboro wo kwishakamo ibisubizo birambye ku bibazo byambukiranya imipaka ndetse n’ibya buri gihugu cyihariyeho ubwacyo.

Yagize ati: “Isoko Rusange ry’Afurika ritanga amahirwe menshi yo gukorana mu buryo bwubaka. Na none kandi ibibazo byinshi biba byambuka imipaka, ugasanga biragira ingaruka kuri twe twese. Guhuza imbaraga no kugira ibyo buri umwe yigira ku wundi bishobora kutugira abanyembaraga.”

Perezida Umaro Sissoco Embaló, na we yashimangiye ko ubu bufatanye buziye igihe, cyane ko ibihugu byombi bikeneye guhanahana ubunararibonye n’ubumenyi mu guharanira ineza y’ababituye.

Yavuze ko Guinea yiteguye gusangira ubumenyi n’ubunararibonye mu nzego zasinyiwe amasezerano ndetse n’izindi zose ibihugu byombi bizaba byemeranyijweho nk’uko bigaragara mu itangazo ryahyizweho umukono naba Minisitiri w’Ububanyi n’Amahanga.

Yavuze ko ibihugu byombi bizungukira kuri aya masezerano agira ati: “Nk’uko mubizi, muri Guinea turi Igihugu kizobereye mu bucuruzi, ariko iyo tugeze mu bijyanye n’urwego rw’uburezi turacyahura n’imbogamizi zimwe na zimwe dushobora kurenga kubera ubunararibonye bw’u Rwanda.

Nizera ko hari byinshi dukwiye gukorana na Repubulika y’u Rwanda cyane cyane ku bunararibonye bwanyu; rimwe na rimwe hari ubwo twibwira ko iteka ryose tugomba kujya gushaka ibisubizo mu bihugu bikize mu gihe ubutwererane bw’ibihugu bikiri mu nzira y’amajyambere bufite inyungu zirenze izo tubakuraho, kuko buroroshye kandi bwabangukira ababukora.”

Yakomeje avuga imyato Perezida Kagame, agaragaza uburyo adahwema kumuratira abo mu gihugu cye ndetse n’urungano kuko ari umuyobozi w’umunyafurika ugendera ku bifatika kandi akaba aharanira iterambere n’ineza y’umugabane w’Afurika muri rusange.

Guinea-Bissau ni igihugu giherereye mu Burengerazuba bw’Afurika kikaba gifite ibirwa ndetse ubwacyo kikaba gikora no ku Nyanja y’Atlantique. Ni igihugu kizwiho kugira Pariki z’igihugu z’akataraboyeka n’urusobe rw’ibinyabuzima rwahogoje amahanga.

Perezida Kagame na mugenzi we babanje kugirana ibiganiro mbere yo gushyira umukono ku masezerano y’ubufatanye

Iki gihugu kandi gifite amateka akomeye cyane kuko cyahoze mu Bwami bwa Kaabu (Kaabu Empire) bwari bukomeye mu kinyejana cya 16 ndetse igice kinini cy’ubwo bwami cyagejeje mu kinyejana cya 18.

Ni igihugu gifite amahirwe menshi y’ubukerarugendo bushingiye ku byiza nyaburanga, ku muco ndetse no ku mateka, ashobora kunganirana n’ay’u Rwanda bigatanga umusaruro ukomeye mu bijyanye no gukurura amadovize aturuka hanze y’Umugabane w’Afurika.

Nko ku kurinda urusobe rw’ibinyabuzima, iki gihugu gifite icyanya gikomye cya Bijagós kikaba ari uruhurirane rw’ibirwa biri mu Nyanja y’Atlantika. Ikirwa kinini muri byo cyitwa Bubaque, kigize Pariki y’Igihugu ya Orango, cyiberamo imvubu zikunda kuba mu mazi y’umunyu. Ku Butaka bunini ari na bwo burimo Umurwa Mukuru Bissau, ni icyambu gifite inyubako za gikoroni z’Abaporutigali mu mujyi rwagati.

Muri iki gihugu kujya mu ishuri ni itegeko by’umwihariko ku bana hari hagati y’imyaka 7 na 13 ndetse abana bari hagati y’imyaka itandatu n’itatu bakaba biga ikiburamwaka igihe ababyeyi babo babifiye ubushobozi.

Hari ibyiciro bitanu  by’amasomo umwana agomba kwiga: Ikiburamwaka, amashuri abanza, ayisumbuye, amashuri y’imyuga n’ay’uburezi ndetse na kaminuza.

Mu bijyanye n’ubucuruzi ndetse n’ubukungu, iki gihugu gifite amateka maremare muri uru rwego ahera mu myaka 1450 ubwo abashakashatsi bo muri Portugal bageraga kuri ubu butaka bwa mbere bagatangira gukora ubucuruzi n’abaturage b’icyo Gihugu cyaje guhinduka ubwami bukomeye muri icyo gihe.

Nubwo iki gihugu cyabaye mu bya mbere byakolonijwe na Portugal, ariko ntabwo bahise bacyinjirira nk’ibindi bihugu bageragamo. Nubwo cyari kimwe mu bihugu byari bifite agace keza kagurishirizwagaho abacakara ku nkombe z’inyanja, ubwami ntabwo bwabemereye kwinjira mu gihugu imbere, ahubwo baheze ku kirwa.

Kugeza n’ubu icyo gihugu kirakataje mu bucuruzi mpuzamahanga nka kimwe mu bihugu bikora ku njyana ndetse kikaba kinafite ubukungu bushingiye ahanini ku musaruro w’ibikomoka ku buhinzi burimo ubunyobwa, cashew nuts, n’ibindi. Ibyo bijyana n’uburobyi ndetse n’ubundi bworozi bw’amatungo atandukanye, ari na byo bigize ibyo icyo gihugu cyohereza mu mahanga.

Amafoto: Village Urugwiro

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA