I Kigali hateraniye inama ihuje Abametodisite baturutse mu bihugu 105
Imibereho

I Kigali hateraniye inama ihuje Abametodisite baturutse mu bihugu 105

Imvaho Nshya

October 27, 2023

Mu Mujyi wa Kigali hateraniye inama ihuje abaturutse mu bihugu 105 bo mu Itorero rya Eglise Méthodiste Libre isanzwe iba rimwe mu myaka 4 ikabera mu bihugu bitandukanye.

Dr Usta Kaitesi, Umuyobozi Mukuru w’Urwego rw’Igihugu rushinzwe imiyoborere (RGB), witabiriye iyi nama, atangaza ko bifuza ubufatanye mu kugera ku ntego z’amadini n’amatorero.

Insanganyamatsiko igira iti ‘Ubufatanye mu ivugabutumwa kugira ngo twongere abakizwa’.

Ni inama yatangiye ku munsi w’ejo ku wa Kane tariki 26 Ukwakira 2023 mu Mujyi wa Kigali. Ni ku nshuro ya mbere iyi nama yakiriwe n’Itorero ‘Eglise Méthodiste Libre au Rwanda (EMLR).

RGB yavuze ko ari iby’agaciro kuba abaturutse mu bihugu 105 b’abametodisite ku Isi bateraniye mu Rwanda bakamenya igihugu ko cyakira abantu neza.

Dr Kaitesi avuga ko itorero rya EMLR rifite abanyarwanda bariteraniramo basaga ibihumbi 400.

Ati “Abo banyarwanda kuba bateranira muri iryo torero bikwiriye kubabera inzira y’uko baniteza imbere, ntibibe iyobokamana gusa ahubwo hakazamo no kurwanya ubukene, kurwanya igwingira no kugira ubuzima bufite agaciro ni cyo dutegereje mu matorero yose”.

Avuga ko iri torero rifite Kaminuza, Ingo Mbonezamikurire (ECD), amashuri y’ibanze n’ayisumbuye, bafite ibitaro, ibigo nderabuzima n’ibindi. Ngo ni abafatanyabikorwa mu bikorwa by’iterambere.

Perezida w’Itorero rya Metodisite ku Isi, yavuze ko amahirwe yo kuvuga ku bumwe atari ko bayafite hose ku Isi.

Yagize ati “Kuba turi hano tuganira ku bufatanyabikorwa, ni ukwamamaza ubutumwa”.

RGB yo ivuga ko ari ubudasa bw’u Rwanda, kuba ibihugu abitabiriye inama baturukamo ingingo y’ubumwe itajya ikunda kuganirwaho.

Umuyobozi Mukuru wa RGB, yagize ati “Icyo bakwigiraho ni aya mahitamo yacu yo guharanira ubumwe.

Guharanira ubumwe mu byo dukora, mu kubazanya inshingano no guharanira ubumwe kugira ngo umuturage wacu tumuhindurire ubuzima”.

RGB isaba amatorero ko umutungo bakura muri rubanda bakwiriye kuwusubiza muri rubanda kugira ngo batere imbere.

Musenyeri Kayinamura Samuel uyoboye EMLR mu Rwanda asobanura ko abenshi mu bitabiriye inama basuye Urwibutso rwa Jenoside rwa Gisozi, bamaze kumenya aho igihugu cyavuye n’aho kigeze.

Ngo batangajwe n’uburyo igihugu cyiyubatse nyuma ya Jenoside yakorewe Abatutsi ukurikije uko cyari cyarasenyutse.

Ashimangira ko muri iyi nama ari ivugabutumwa barimo gukora no kumenyekanisha igihugu by’umwihariko n’itorero EMLR mu Rwanda.

Yavuze ko bazaganira cyane ku bumwe mu rwego rwo kongera abakizwa bityo abanyabyaha bagende bagabanuka ku Isi.

Icyitezwe muri iyi nama ngo n’uko imyanzuro izayivamo izaba ishingiye ku bumwe.

Agira ati “Turashaka kubaka ubumwe. Ubumwe mu Rwanda murabizi ko tubukomeyeho, Abanyarwanda byo bazabyumva kurusha abandi”.

EMLR ikorera mu nkingi zitandukanye zirimo Uburezi, Ubuzima n’ibindi.

Itorero EMLR ryatangiye 1860 kandi ngo rizaguma ku cyo ryemera kuko ngo ntiryemera gushyingirwa kw’abahuje igitsina.

Musenyeri Kayinamura Samuel, Umuyobozi w’Itorero EMLR mu Rwanda

KAYITARE JEAN PAUL  

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA