Ibiti bya kawa miliyoni 30 bigiye gusazurwa
Amakuru

Ibiti bya kawa miliyoni 30 bigiye gusazurwa

ZIGAMA THEONESTE

March 20, 2024

Ikigo cy’Igihugu gishinzwe guteza imbere iyoherezwa mu mahanga ry’ibikomoka ku buhinzi n’ubworozi (NAEB), gitangaza ko kiri muri gahunda yo gusazura no gusimbuza ingemwe nshya, ibiti bya kwa bishaje bisaga Miliyoni 30, kuko bituma umusaruro wayo ukomeza kugabanyuka.

NAEB ivuga ko kuba igiti gishaje bituma kitera uko bikwiye, kandi bikagira n’ingaruka ku musaruro wa kawa muri rusange.

Umuyobozi ushinzwe kongerera agaciro Kawa muri NAEB, mu kiganiro n’itangazamakuru yatangaje ko gusazura Kawa byitezweho kongera umusuro mwinshi ugereranyije n’uboneka muri iki gihe.

Yagize ati: “Gusazura igiti cya Kawa bituma umusaruro wiyongera aho byitezweko hazajya hasarurwaho ibilo  biri hagati ya 7-10 ku giti kimwe, mu gihe kuri ubu imibare igaragaza ko ku giti hera ibilo 2 gusa.”

Ikigo cy’Igihugu gishinzwe Ubuhinzi n’Ubworozi mu Rwanda (RAB) kivuga ko gusimbuza ibiti bya kawa bishaje biri mu rwego rwo kongera umusaruro uyikomokaho, ikaba ari na gahunda y’igihugu yo gutera ingemwe nshya za kawa nk’imwe mu ngamba zo kongera umusaruro.

N’ubwo bimeze bityo ariko hari abahinzi bagiseta ibirenge mu kuba bakwemera gusimbuza ibiti bya bishaje ingemwe nshya.

Musengimana Anathalie umwe mu bagize Koperative Dukunde Kawa Musasa yo mu Karere ka Gakenke yagize ati: “Abahinzi ba kawa benshi bafite ibiti bishaje, barazwe n’ababyeyi babo na ba Sekuru. Turabizi ko gusimbuza ibiti bishaje ibishya byongera umusaruro wavaga ku giti, ariko abahinzi bamwe ntibarabyiyumvisha”.

Kwanga gusimbuza ibiti bishaje bya kawa mo ibishya, Musengimana yongeraho ko biterwa n’uko bavuga ko kugira ngo igiti cya kawa gitewe cyongere kwera hashira  igihe kirekire.

Ubushakashatsi bwakozwe n’Ishuri ryigisha ubukungu muri London mu Bwongereza bwerekana ko abahinzi bo mu Rwanda 86% bwakoreweho, bavuze ko biteguye gutera ibiti bishya 30% bya kawa yose bafite mu gihe baba babitewemo inkunga.

Minisitiri w’Ubucuruzi n’Inganda, Prof Ngabitsinze Jean Chrysostome yavuze ko kugira ibiti bya kawa bishaje ari imbogambizi ku nganda zitunganya umusaruro wazo.

Yavuze ko kuba ibyo biti bishaje bibangamiye gahunda igihugu cyihaye yo kongera ingano ya kawa yoherezwa mu mahanga.

Yagize ati: “Turabizi, ibiti bya kawa 26% mu Rwanda bimaze imyaka 30, mu gihe ibirenga 44%, bimaze imyaka 20% bisarurwa.”

Imibare yo mu 2022 igaragaza u Rwanda rufite ibiti bya kawa miliyoni 100.

Ni imibare kandi igaragaza ko 40% by’ibiti biri mu gihugu hose, ari iby’abahinzi bimaze imyaka 60.

Gusazura ibiti bya kawa bishaje bishobora kuzamura umusaruro w’ibyoherezwa mu mahanga bitewe n’uko mu Rwanda umusaruro w’ibihingwa byoherezwa mu mahanga wagabanyutseho 4% mu 2023.

Ni igabanyuka ryatewe by’umwihariko  n’umusaruro muke w’icyayi n’ikawa, nk’uko amakuru aheruka gutangwa n’Ikigo cy’Igihugu cy’Ibarurishamibare mu Rwanda (NISR) abigaragaza.

Umuyobozi Mukuru ushinzwe ibikorwa muri NAEB Urujeni Sandrine, yatangaje ko Guverinoma y’u Rwanda ifite intego yo kongera ingano y’umusaruro wa kawa isarurwa ku giti, ikava ku mpuzandengo y’ibilo 2,8 iriho ikagera ku biro 4 ku giti nk’uko na gahunda y’igihugu y’imyaka irindwi yo kwihutisha iterambere NST1, ibiteganya.

N’ubwo bimeze bityo ariko iyo ntego ntishobora kugerwaho kubera ko kugeza ubu ku giti kimwe cya kawa y’u Rwanda habarwa ko heraho ibilo 2,6 bitewe n’uko ibyinshi mu biti bya kawa y’u Rwanda bishaje, bikaba bitera neza.

Mu kiganiro na RBA, Urujeni yagize ati: “Turimo guteza imbere ubuhinzi buhangana n’imihindagurikire y’ibihe, dukangurira abahinzi ba kawa gusimbuza izishaje mo inshya. Ingamba twafashe harimo gusazura ibiti bya kawa mu buryo bwo kugira ngo zibashe guhangana  n’ingaruka z’imindagurikire y’ikirere.”

NAEB itangaza ko kugeza ubu ibiti bya kawa miliyoni 30 ari byo bishaje ndetse ko bikeneye gusimbuzwa ingemwe nshya.

Ni mu gihe kandi NAEB yatangije umushinga wa miliyoni 62,89 z’amadolari y’Amerika, ugamije gufasha abahinzi bato ba kawa n’Icyayi bo mu Turere 14 tw’u Rwanda, basanzwe bohereza umusaruro wabo hanze y’u Rwanda.

Ni umushinga witezweho gusazura ibihingwa by’ikawa, icyayi n’imboga bihinze kuri Hegitari 8,242. Ku ikawa, inkunga ikubiyemo kubaka hangari zo gukusanya kawa yasaruwe, uburyo bwo kumisha kawa hisunzwe ikoranabuhanga kandi bitangiza ibidukikije, ibikoresho byo gutunganya imyanda,  byo ku rwego rwa koperative, hamwe no kubaka ahantu ho kurongera kawa.

NAEB ihamya kuba umusaruro wa kawa waragabanyutse byatewe no kubura ifumbire ku bahinzi kubera ingaruka z’icyorezo cya COVID 19, cyatumye ifumbire itaboneka ndetse  n’ibonetse ikaza ihenze.

Guverinoma y’u Rwanda irimo gushaka umuti urambye kuri iki kibazo.

Urujeni ati: “Muri iki gihe, umubare muto w’abahinzi ni wo umaze kumva akamaro ko kwigurira ifumbire. Iyo duha abahinzi ntabwo ihagije; dukoresha gusa 40% y’ifumbire ikenewe ku bihingwa. Turimo gukora ubukangurambaga mu bahinzi ngo bakangukire kuyigurira.”

Guverinoma ikomeje kongera ingufu zigamije mu gukemura iki kibazo cy’imwe mu mirima yarumbye hagamijwe kuzamura umusaruro w’abahinzi, gushyirwaho imbaraga zihamye zo guhangana n’imihindagurikire y’ibihe kugira ngo bigabanye igihombo abahinzi bahura na cyo, no kuzamura ireme ry’ikawa yoherezwa mu mahanga.

Urujeni yavuze ko NEAB irimo gufasha abagura kawa mu Rwanda kubona amasoko atandukanye yo kuyohereza mu mahanga.

Ati: “Mu bihe byashize twibandaga cyane mu kuyohereza ku mugabane w’u Burayi n’Amerika. Ubu turimo kwagura aho twajya twohereza, tugashyiramo n’u Bushinwa, Leta Zunze Ubumwe z’Abarabu, no mu bindi byerekezo by’Isi.”

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA