Iburasirazuba: Abarokotse Jenoside 100   bongeye kwatsa igicaniro
Imibereho

Iburasirazuba: Abarokotse Jenoside 100   bongeye kwatsa igicaniro

NSHIMIYIMANA FAUSTIN

April 20, 2024

Aborokotse Jenoside yakorewe Abatutsi mu 1994 bo hirya no hino mu Ntara y’Iburasirazuba borojwe inka nyuma yuko izo bari batunze zasahuwe n’interahamwe zikabagira aboro, barishimira ko igicaniro cyongeye kwaka bemeza ko zigiye kurushaho kubafasha kugira imibereho myiza no kongera umusaruro ukomoka ku buhinzi.

Hari mu gikorwa cyo kwibuka ku nshuro ya 30 abikorera bo mu Ntara y’Iburasirazuba bazize Jenoside yakorewe Abatutsi, ku wa Gatanu tariki ya 19 Mata 2024, igikorwa cyabereye ku Rwibutso rwa Jenoside rwa Nyagatare.

Uwarokotse Jenoside yakorewe Abatutsi mu 1994, Zungize Mariko ufite imyaka 68 utuye mu Murenge wa Nyagatare, yavuze ko yaherukaga gutunga inka mbere ya Jenoside yakorewe Abatutsi mu 1994 ariko abayobozi ba Leta n’interahamwe bakigabiza izo yari atunze n’iz’umuryango we agasigara iheruheru.

Yagize ati: “Mbere ya Jenoside yakorewe Abatutsi mu 1994 na nyuma yayo, Abatutsi bajyanye n’amatungo bari boroye. Mperuka korora icyo gihe.”

Zungize yavuze ko inka yagabiwe igiye kumufasha kurushaho guteza imbere umuryango we.

Yagize ati: “Ndabyishimiye cyane, nshimiye n’igihugu cyacu n’abikorera bongeye gutuma igicaniro mu rugo cyaka. Ubu ngiye korora nkore ku mabere y’inka; izampa amata, abazukuru n’’bana banjye izabatunga.”

Avuga ko asanzwe ari umuhinzi bityo ko ifumbire azayikoresha mu gutuma imyaka ahinga yera neza akaba agiye kongera umusaruro.

Ibi bishimangirwa na Mbateyimbabazi Margaret w’imyaka 57, yagize ati: “Iyi nka yanejeje cyane kandi ndashima Ubuyobozi Bukuru bwacu na bo bakorana badusuye bakamenya imibereho yacu. Mu rugo rwanjye twahoze tworoye barazitwara ariko nongeye kwishimira ko noroye inka yanjye kandi zizaba nyinshi.”

Umuyobozi wa Ibuka mu Karere ka Nyagatare, Bimenyimana Jean de Dieu yashimye inkunga yo korozwa Abarokotse, yizeza ko bazakomeza gufata neza inka bahawe no kubyaza umusaruro cyane ko ari ikimenyetso cy’urukundo.

Yagize ati: “Igikorwa bakoze turagishimira kuko gisobanura urukundo. Tuzarushaho kuzifata neza ndetse tunabafashe kuzibyaza umusaruro no kuzitaho.”

Umuyobozi w’urugaga rw’abikorera, PSF mu Ntara y’Iburasirazuba Nkurunziza Jean De Dieu avuga ko Inka batanga nk’abikorera ari inka y’ubumwe n’ubudaheranwa ndetse ko ibyo bakora babikesha umutekano uri mu gihugu.

Yagize ati: “Inka iremerwa Abarokotse Jenoside yakorewe Abatutsi batishoboye; ni inka y’urukundo, inka y’ubumwe, ni umusanzu ku budaheranwa kandi no gukomeza kwiyubaka.”

Bimenyimana asaba abikorera gukomeza kwirinda icyatuma Jenoside yongera kubaho anashimira inkunga bahabwa n’abikorera.

Guverineri w’Intara y’Iburasirazuba Pudence Rubingisa yavuze abikorera bagira uruhare mu gufasha abarokotse Jenoside yakorewe abatutsi mu 1994 mu guhindura imibereho yabo no guteza imbere abafite intege nke.

Yagize ati: “Abagize urugaga rw’abikorera turabashimira ko mukomeje kugaragaza ubu bufatanye na Leta mu guteza imbere imibereho myiza y’abaturage no mu iterambere, ni umwihariko n’ubudasa bwacu bwa Ndi Umunyarwanda.

Yakomeje agira ati: “Iki gikorwa cyo Kwibuka no kuremera abarokotse Jenoside ni ikimenyetso gifite igisobanuro cyumvikana ubwacyo kandi ni igikorwa tuzajya dufatanya twese hamwe n’abo dufatanya umunsi ku wundi ndetse no gukurikirana ubuzima n’imibereho y’abaturage dukomeza kuremera.”

Umwaka ushize wa 2023 urugaga rw’abikorera muri iyi Ntara rwaremeye abarokotse Jenoside yakorewe Abatutsi inka 100, ni mu gihe no muri uyu mwaka hatanzwe inka 100 zifite agaciro ka 9 360 000.

Muri uyu mwaka wa 2024, Abagize urugaga rw’abikorera (PSF) batanze Inka 100 ku barokotse Jenoside yakorewe Abatutsi mu 1994 batishoboye batuye mu Mirenge yose igize Intara y’Iburasirazuba.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA