Iburasirazuba: Hatashywe  icyumba cy’amakuru gikoresha ikoranabuhanga
Amakuru

Iburasirazuba: Hatashywe  icyumba cy’amakuru gikoresha ikoranabuhanga

NTAWITONDA JEAN CLAUDE

March 28, 2022

Mu Ntara y’Iburasirazuba hizihijwe Umunsi w’Imiyoborere waranzwe no gutaha icyumba kizajya gikusanyirizwamo amakuru  mu buryo bw’ikoranabuhanga no gusesengura ibipimo bishingiye ku mibare bifasha mu igenamigambi no kwihutisha iterambere.

Iki cyumba (Province Data Center) kirimo amakuru yose areba ubuzima bw’Intara haba mu bukungu, imiyoborere myiza n’imibereho myiza. 

Guverineri w’iyi Ntara CG Emmanuel K. Gasana yavuze ko ubu buryo bw’ikornabuhanga buzaba ishingiro mu igenamigambi n’ifatwa ry’ibyemezo byihutisha Iterambere rirambye.

Gutaha iki cyumba byahujwe n’Umunsi w’Imiyoborere muri iyi  Ntara wateguwe n’Urwego rw’Igihugu rw’Imiyoborere (RGB), ufite insanganyamatsiko igira iti: “Imiyoborere myiza, umuturage ku isonga”. Wahuje abayobozi bo ku rwego rw’imidugudu, utugari, imirenge, uturere, intara n’inzego z’umutekano.

Hakozwe n’ inama nyunguranabitekerezo yafatiwemo ingamba zo kurushaho kunoza imiyoborere hagamijwe kuzamura iterambere ry’umuturage, yatanzwemo n’ibihembo ku nzego zitandukanye hamwe n’imidugudu yahize indi mu miyoborere myiza.

Guverineri CG Gasana yagize ati: “Twahisemo kwizihiza uyu Munsi w’Imiyoborere mu Ntara yacu kugira ngo ube uwo gushimira abayobozi mu nzego zitandukanye kubera uruhare barimo kugira mu kwihutisha iterambere ry’Intara n’abaturage, dufate n’ingamba zo gukomeza guharanira kuba indashyikirwa”.

Minisitiri  ushinzwe Ibikorwa by’Ubutabazi Kayisire Marie Solange yasabye abayobozi kuva ku rwego rw’Umudugudu kuzamura, kwimakaza imiyoborere myiza no kwihutisha gahunda za Leta zigamije iterambere ry’umuturage. 

Ibyo bikagendana n’ imitangire ya serivisi inoze, kwegera abaturage bakabakemurira ibibazo, bakabafasha kwihuta mu iterambere kandi bagaharanira kuba indashyikirwa.

Minisitiri  Kayisire yagize ati: “Imiyoborere myiza ni inkingi ikomeye y’iterambere, kuko ibyo wagira byose ukibwira ko bizagufasha kwihutisha iterambere ariko ukaburamo imiyoborere myiza, nta cyo wageraho”.

Yanabibukije  ibijyanye no  kubaka ubudahangarwa ku biza kuko ari ingenzi cyane mu kubaka iterambere rirambye. Bigakorwa binyuze mu gutera ibiti, guca imirwanyasuri, gusibura iyasibye, gufata amazi y’imvura agakoreshwa mu kuhira imyaka ndetse no guhunika imyaka n’ubwatsi bw’amatungo.

Ubutumwa bwo gushyira umuturage ku isonga bwanagarutsweho mu kiganiro kijyanye n’uruhare rw’Ihuriro ry’Abafatanyabikorwa mu Iterambere (JADF) mu miyoborere.

Umuyobozi Mukuru wa RGB Dr Kayitesi Usta watanze iki kiganiro yagize ati: “Mu mahitamo yacu nk’Abanyarwanda, twahisemo gukorera mu mucyo no kubazwa inshingano, ubuyobozi budaheza kandi bushingiye ku muturage, ubutabera buhamye no kuba igihugu kigendera ku mategeko no kwihutisa iterambere rirambye. Kugira ngo tugere aho twifuza, twahisemo kuba umwe no gukorera hamwe. Ihuriro ry’Abafatanyabikorwa (JADF) na ryo ryisanga muri ubu bumwe, kandi rikisanga no muri uyu murongo wo gukorera hamwe”.

Yakomeje agira ati: “Ihuriro ry’abafatanyabikorwa rigizwe natwe twese harimo: imiryango itegamiye kuri Leta(NGOs), abikorera, ibigo n’inzego za Leta bikorera mu karere, ubuyobozi bw’Akarere, imiryango ishingiye ku myizerere, n’imiryango mpuzamahanga itari iya Leta(INGOs)”.

Yasobanuye ko muri gahunda ya Guverinoma y’imyaka 7, iri huriro rifatwa nk’urubuga abafatanyabikorwa bahuriramo bakungurana ibitekerezo hagamijwe impinduka z’iterambere rishingiye ku bukungu, imiyoborere myiza n’imibereho myiza y’abaturage.

Umunyamabanga Mukuru w’Ishyirahamwe ry’Uturere n’Umujyi wa Kigali (RALGA) Ngendahimana Ladislas, yasabye abitabiriye inama  kujya bazirikana icyerekezo cy’Umukuru w’Igihugu, mu byo bakora byose bakareba ko ari cyo barimo gukoreramo.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA