Iburasirazuba: Hateguwe ibiterane by’ibitangaza n’umusaruro
Amakuru

Iburasirazuba: Hateguwe ibiterane by’ibitangaza n’umusaruro

NTAWITONDA JEAN CLAUDE

July 1, 2023

Igiterane kizabera mu Karere ka Nyagatare kuva taliki 07 kugera 09 Nyakanga no mu Karere ka Bugesera taliki 14 kugera kunl ya 16 Nyakanga 2023 mu Ntara y’Iburasirazuba, Pasiteri Dr Ian Tumusime asobanura ko ari igiterane cy’ibitangaza n’umusaruro.

Ni igiterane cyateguwe n’Umuryango w’ivugabutumwa ‘A Light to the Nations Africa Ministries’ uyoborwa muri Afurika na Pasiteri Dr Tumusime usanzwe ari Umuyobozi w’Itorero Revival Palace Church (RPC) muri Bugesera.

Biteganyijwe ko ibiterane byombi, Umuvugabutumwa w’Umunyamerika Dana Morey azabibwirizamo.

Pasiteri Rugambwa Emmanuel uyobora itorero rya EENR Nyamata ndetse akaba aribereye Umuvugizi Wungirije, ni we ushinzwe ibikorwa byo gutegura igiterane cya Ev Dana Morey i Bugesera.

Mu kiganiro yahaye itangazamakuru yagize ati: “Abantu bose by’umwihariko abaturage ba Bugesera bitege kubona gukora k’Umwami w’Abami Kristo Yesu ndetse no kubona abantu benshi bakira Umwami Yesu mu bugingo bwabo.

Abantu bitege ububyutse bwinshi no kugarura isura y’itorero rya Kristo”. 

Abahanzi bazafasha abazitabira igiterane ni abahanzi bazwi mu guhimbaza Imana mu Karere k’Afurika y’Iburasirazuba, barimo Rose Muhando wo muri Tanzaniya na Theo Bosebabireba.

Muri ibi biterane byombi hazatangwamo inka, moto, televiziyo, amagare n’ibindi. Kujya mu banyamahirwe, bisaba kuzahagera kare saa munani z’amanywa ugahabwa itike y’ubuntu izakwemerera kujya muri tombola.

By’umwihariko mu Karere ka Bugesera hazakorwa isiganwa ry’amagare ku basanzwe bakora umwuga wo gutwara abantu ku igare, aho uzitwara neza azahembwa moto.

Mu Karere ka Nyagatare hazakorwa urugendo rwo Kwibohora. Mbere yuko iki giterane kiba, hakozwe ibikorwa binyunye “muri make si uguterana gusa, tunagira uruhare mu buzima bw’umuturage”.

Umuvugabutumwa Dana Morey ni muntu ki?

Dana Morey n’abavandimwe be batangije ikompanyi yitwa ‘The Morey Corporation’, kikaba ari ikigo gifitanye amasezerano n’uruganda rukora ibikoresho bikoresha ikoranabuhanga ruherereye i Woodridge muri Leta ya Illinois muri Leta Zunze Ubumwe z’Amerika.

Dana kandi ni umwe mu bantu bakora ubucuruzi akaba yaratangije imiryango y’ivugabutumwa harimo Christ for all Nations and Caring for Kids.

Yanatangije gahunda yo kugaburira abana bo mu miryango itishoboye muri Mexico.

Umuhamagaro we wa mbere ni ugukora umurimo w’ivugabutumwa ariko cyane cyane akibanda ku Mugabane w’Afurika, mu Buhinde, no mu Burasirazuba bw’u Burayi.

Mu 1986 ni bwo yashakanye na Karman, mu 1989-1993 aba umushumba mu Itorero ‘A Light to the Nations Church’.

Mu 2001 – 2006 Dana Morey afatanyije na Slavik Radchuk, batangije gahunda yo kwita ku bana b’imfubyi batagira aho baba. Icyo gihe mu kigo cy’imfubyi batangije harimo abana 28.

Kuva kandi mu 2015 kugeza ubu, Dana ni we uyoboye ikompanyi yitwa ‘The Morey Corporation’.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA