Iburasirazuba: Tuzakomeza kunenga abacuruzi bakoze Jenoside  bakica n’abari abakiliya babo
Imibereho

Iburasirazuba: Tuzakomeza kunenga abacuruzi bakoze Jenoside bakica n’abari abakiliya babo

NSHIMIYIMANA FAUSTIN

April 19, 2024

Bamwe mu bikorera bo mu Ntara y’Iburasirazuba bavuga ko batazahwema kwamagana abikorera bakoze Jenoside yakorewe Abatutsi mu 1994 bagatera Leta inkunga y’ibikoresho, amafaranga n’ibindi mu gusenya igihugu hagamijwe kwica no gutsemba Abatutsi, bakibagirwa ko umukiliya ari umwami.

Ibi ni ibyagarutsweho mu gikorwa cyo kwibuka ku nshuro ya 30 abikorera bazize Jenoside yakorewe Abatutsi, none tariki ya 19 Mata 2024 ku rwibutso rw’Akarere Rwa Nyagatare.

Umuyobozi w’Urugaga rw’Abikorera mu Ntara y’Iburasirazuba (PSF), Nkurunziza Jean de Dieu yavuze ko abikorera bakoresheje ubushobozi bwabo mu gusenya igihugu

Yagize ati: “Abikorera benshi mu 1994 bishe bagenzi babo b’Abatutsi, abandi barabagambanira. Twavuga ko bakoresheje ubushobozi bwabo mu gusenya igihugu kandi bisenyera.

Abacuruzi benshi batanze imihoro, lisansi yo gutwika Abatutsi n’inzu zabo, ibinyabiziga, imodoka zitunda Interahamwe zigiye kwica n’inzoga zo gushimira abicanyi. Turabanenga ko batazirikanye ko umukiliya ari umwami.”

Yakomeje asaba abikorera gufata iya mbere bakazirikana Abatutsi bishwe n’abikorera bazize Jenoside yakorewe Abatutsi mu 1994 no gusubiza icyizere abarokotse Jenoside no gukora ibikorwa bigamije kububaka.

Yagize ati: “Jenoside yakorewe Abatutsi abikorera bakoze binyuranye n’intego z’abikorera ariyo guharanira inyungu z’ubucuruzi bw’Abanyarwanda no kurebera hamwe uko abikorera bagira uruhare mu iterambere ry’igihugu. Ivangura mu bucuruzi nta handi ryaganisha usibye igihombo no kudindira.”

Mu buhamya bwatanzwe na Mubirigi Elias w’imyaka 79 wakorakaga umwuga w’ubwubatsi mu yahoze ari Komini Muvumba, yagarutse ku rwango n’akaga yahuye nako ubwo yakoraga uyu mwuga kuva 1973 muri Komini Muvumba akorana n’imishinga itandukanye ndetse haba hari ubwo bakora ntibahembwe. Yemeza ko bamwiciye abana babiri n’umugore we nabo mu muryango we.

Yagize ati: “Nakoraga imirimo y’ubwubatsi ariko ntibatubonaga nk’abandi bantu. Barankoresheje ntibanyishyure, Komini ya Karama twayubakiye ubuntu ariko abatarahigwaga barahembwa. Byageze ubwo Jenoside yakorewe Abatutsi iba banyicira umuryango.”

Perezida wa Ibuka mu Karere ka Nyagatare, Bimenyimana Jean de Dieu yavuze ko Kwibuka ari uguha icyubahiro abikorera n’abazize Jenoside yakorewe Abatutsi mu 1994; kuzirikana imiryango basize ndetse no gufata ingamba kugira ngo Jenoside itazongera kubaho.

Guverineri w’Intara y’Iburasirazuba Pudence Rubingisa yavuze ko abikorera bagize uruhare rukomeye mu gutera inkunga Interahamwe mu buryo bw’ikoresho, gutera inkunga amaradiyo yabibaga urwango n’amafaranga, bityo abo muri iki gihe bakwiye gukoresha neza no kubyaza umusaruro amahirwe igihugu cyibaha bamagana abagihembera ingengabitekerezo ya Jenoside n’amacakubiri.

Yagize ati: “Turazirikana ko Abikorera bamwe bateye Inkunga za Radiyo rutwitsi nka RTLM n’ibinyamakuru nka Kangura n’ibindi. Mwe turakomeza kubasaba gukoresha itangazamakuru dufite, imbuga nkoranyambaga zihari mu kwamamaza ibyo mukora, kurata ibyo turusha abandi, gushimangira Made in Rwanda, kwamamaza Visit Rwanda, kwimakaza isuku na Serivisi inoze, ntiduhe urwaho na ruto abamunzwe n’amacakubiri bakorera iyo mu bindi bihugu no ku mbuga rutwitsi bashaka kuturangaza.”

Yakomeje agira ati: “Dukore ku buryo ibikorwa byacu ubwabyo binyomoza amagambo yabo. Ushoye imari, akigira kurangura cyangwa agatumiza ibindi mu mahanga tutaretse n’ibyo yoherejeyo,  bitanga ubutumwa kandi nawe wagiyeyo ubasigira ubundi kuko ugenda kandi ukihutira gutaha, ugakora ukiteza imbere n’umuryango nyarwanda.”

Abagize urugaga rw’Abikorera mu Ntara y’Iburasirazuba (PSF) bifuza ko mu mwaka wa 2025 bazakusanya imyirondo y’Abatutsi bikoreraga bagize uruhare mu guteza imbere Intara bazize Jenoside yakorewe Abatutsi mu 1994 ndetse no kwiyemeza kunenga abacuruzi batazirikanye ko umukiriya ari umwami kugira ngo Jenoside ntizongera kubaho.

TANGA IGITECYEREZO

  • Lg
    April 21, 2024 at 4:19 pm Musubize

    Abantu bicaga abagore babo bakica ba sebukwe nabanyirabukwe abishywa nabaramu babo none ngo bishe abagore bakajyana abana babo
    ngo bicwe abakiriya nabandi bacuruzi babatutsi !!il wose igikomeye nikihe!!abantu bishe niyo wabigisha iki nubu hali ikibaye bakongera bakica hali abigisha se urukundo kurusha abapadri abasenyeri abapastoro mubakoze génocide se ntibalimo abafunzwe bagafungurwa ntibaryamye mubigo byabo aho kwirukana izo za sekibi hanze batunzwe namaturo yacu abacuruzi bamwe bali bafite imbunda kuko bagiye bazigishwa ntanuzi niba barazisubije kwigisha byo umuhate nushyirwe kurubyiruko naho abandi nibabandi nuko ntako bagira

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA