Ibyagoye Umulisa Joselyne nyuma yo kurokoka Jenoside yakorewe Abatutsi
Amakuru

Ibyagoye Umulisa Joselyne nyuma yo kurokoka Jenoside yakorewe Abatutsi

MUTETERAZINA SHIFAH

April 12, 2024

Umulisa Joselyne wakinnye mu ikipe y’Igihugu ya Tennis avuga ko urugendo rw’ubupfubyi yatangiye nyuma ya Jenoside yakorewe Abatutsi mu 1994 rutari rworoshye, kugeza ubwo yari agiye gushinga urugo ibikomere  bikarushaho kwiyongera.

Ibi yabigarutseho mu kiganiro yagiranye na kimwe mu bitangazamakuru bikorera kuri YouTube mu Rwanda cyagarukaga ku rugendo rwe rwo kwiyubaka no gukira ibikomere yatewe na Jenoside yakorewe Abatutsi mu 1994.

Avuga ko rwari urugendo rutoroshye, kuko ahereye ubwo yari agiye gukora ubukwe yatekereje gukodesha abantu bari bwicare ku ruhande rw’umuryango we.

Ati: “Sinigeze ngira ubwoba bw’amafaranga ngo nitwerereze nk’abandi, ahubwo nari mfite ubwoba bw’abantu bari bwicare ku ruhande rwanjye. Nageze n’aho mbwira umwe muri bake nari mfite ngo nareke dukodeshe abantu bicara ku ruhande rwanjye, nari mfite ubwoba ku buryo numvaga ikanzu itajyamo, ubundi nkanibaza ese nibanaboneka ni nde mubyeyi wo gushimira ko yareze neza.”

Kubura abakuru bo kumugira inama byamubereye umutwaro, kuko uwajyaga gushinga urugo mu bo bahuje ikibazo wisangaga mu rugo n’umugabo mwenyine.

Ati: “Nyuma ya Jenoside twisanze mu bigo by’imfubyi turi mu myaka imwe, ku buryo wasangaga uwajyaga gushyingirwa inama z’uko azubaka azihabwa n’abo bangana kandi babikoraga uko bashoboye ntibyari byoroshye.”

Akomeza avuga ko kuba bataragize amahirwe yo kubona impanuro z’ababyeyi byashoboraga kuba byanabasenyera.

Ati: “Wibuke ko ni abantu babiri bagiye kubana badahuje amateka cyangwa bayahuje, ariko buri wese afite ibye bikomere, kugira ngo umugabo azajye kukumva akwihanganire biba bigoye, wibuke ko turi za mfubyi zireze.

Ntawatweretse uko bateka, basasa, bita ku mugabo, uko bonsa, nta watweretse uko baheka umwana, ibintu byose byari bishya mu maso yacu, kuko babatuvukije tukiri ibibondo bigikeneye kurerwa, kwerekwa inzira.

Ndibuka ikintu cyambayeho ntashobora kwibagirwa, nkimara gutwita hari ibintu byitwa imigendo bimbayeho sinashoboraga kumenya uwo ndibuyibaze. Nagiye kwa muganga iyo migendo yaje, byari bivuze ko nashoboraga kubyarira mu rugo nkagira ikibazo cyangwa  umwana akagira ikibazo.”

Uyu mubyeyi w’imyaka 38, avuga ko we atibuka muri Mata gusa, ahubwo yibuka buri munsi kuko buri kintu abonye kimwibutsa ubuzima bwe, ahubwo muri Mata yifatanya n’abandi Banyarwanda Kwibuka Jenoside yakorewe Abatutsi.

Avuga ko igihe umwana we ashobora kumubaza impamvu atajya asura sekuru ahita yibuka ko atabagira kandi bazize Jenoside yakorewe Abatutsi.

Nubwo byari bimeze bityo ariko, Umulisa avuga ko yahisemo gushinga umuryango uzamura impano z’abakiri bato mu mukino wa Tenis mu rwego rwo kusa ikivi cy’abe yabuze ndetse no kwishyura umwenda yumvaga afitiye igihugu cye.

Uretse kuba yarakiniye ikipe y’Igihugu ya Tenis akanashinga umuryango ufasha mu kuzamura impano z’uwo mukino mu gihugu, Umulisa ari no mu bagize Urugaga Mpuzamahanga rw’Umukino wa Tenisi ku Isi.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA