Ibyishimo, umunezero no kwizihirwa byari byose ku bitabiriye igitaramo cyo gusingiza Intwari z’Igihugu.

Ni igitaramo cyateguwe n’Umujyi wa Kigali n’abafatanyabikorwa bawo kiba mu ijoro ry’itariki 31 Mutarama 2026, mu ihema rya Camp Kigali.

Ahagana saa kumi n’ebyiri z’umugoroba ni bwo abanyamakuru Scovia Mutesi na Fisto Felix Habineza bageze ku rubyiniro nk’abashyushyarugamba b’igitaramo batanga ikaze ndetse baruvaho basimbuwe n’itorero Indatirwabahizi ry’Umujyi wa Kigali.

Indatirwabahizi baserutse ku rubyiniro mu ndirimbo ‘Ubutwari bw’Inkotanyi’ ya Mariya Yohana, bakurikijeho umukino ugaragaza uko Abanyarwanda bakuraga babatoza ubutwari ari na ko babyina indirimbo zitandukanye iz’umudiho, umushagiriro n’izindi zafashije abitabiriye gususuruka.

Nyuma y’aho Itorero ry’Igihugu Urukerereza baserutse mu murishyo, ikondera ritsikimba, bakurikijeho indirimbo yitwa Zarwaniyinka bayikoresha bavuga amacumu y’uko urugamba rwo kubohora Igihugu rwagenze bagenda bavuga abarwanaga icyo gihe mu byivugo babahaye.

Uwatangiye yagize ati: “Ku kamuhinda ni kwa Rwemerakurinda, nabanje uw’icumu ribanza urugamba gukira nubwo yaritaye mu nshuro ntiyarigereka amakuza…”

Aho bagaragaza uko urugamba rwatangiye n’uko barurwanye bakomeza kumvikanisha n’uko rwakomeje.

Yakomeje agira ati: “Yaraje Umugobokarugamba, Yaraje umugobokarugamba Yaraje uwa Rwantarindwa yeee! Akaba umunyakabu yakabuye injunga, yakabuye injunga mu ngurane za Juru ese nyamibwa weee…!”

Byari bigoye ko uwitabiriye icyo gitaramo ataha atanyunzwe dore ko hahise hakurikiraho Army Band maze bakaririmba indirimbo zabo zikunzwe bitewe n’umurindi wazo zirimo Ngabo z’u Rwanda’ Ntwari zacu mwarakoze, Turi Intare n’izindi nyinshi zanyuze abitabiriye.

Ibintu byahinduye isura ubwo Kitoko yari ageze ku rubyiniro yeretswe urukundo aho yaririmbye indirimbo zose afashwa n’abitabiriye igitaramo kugeza aho hari n’aho yabasanze bakabyinana.

Kitoko wari umaze igihe kinini mu Bwongereza akaba yaragarutse mu Rwanda yaririmbye izirimo Isi n’abantu, Rurabo, Agakecuru, ageze kuri Si byo yafatanyije na Meddy urubyiruko rujya mu bicu barabyina biratinda.

Igitaramo cyasoje ahagana saa tatu z’ijoro ni bwo Bwiza yagiye ku rubyiniro na we aririmba izirimo ‘Iyo twicaranye’, Ready, Ahazaza, ageze hagati yasabye Army Band ko bamusanga ku rubyiniro baririmbaga indirimbo yitwa Intwari yaririmbanye na Memo, Best Friend ageze kuri Ogera abantu bose barahaguruka bacinya akadiho.

Icyo igitaramo cyitabiriwe n’abayobozi batandukanye barimo Umuyobozi w’Umujyi wa Kigali Samuel Dusengiyumva, Intebe y’Inteko Amb. Robert Masozera, Minisitiri Dr Bizimana Jean Damascène n’abandi.

Igitaramo cyo kwizihiza Intwari z’Igihugu cyateguwe hagamijwe gususurutsa abatuye Umujyi wa Kigali no kwibutsa urubyiruko ko ubutwari ari umurage wa buri Munyarwanda wese.

U Rwanda n’inshuti zarwo barazirikana Intwari z’Igihugu ku nshuro ya 32 ku nsanganyamatsiko igira  iti: ‘Ubutwari n’Ubumwe bw’Abanyarwanda, inkingi z’Iterambere’.

Ba uwa mbere mu kumenya amakuru agezweho!!!