Ibyo abashakashatsi bavuga ku mpungenge mu bihingwa bihinduriwe uturemangingo
Amakuru

Ibyo abashakashatsi bavuga ku mpungenge mu bihingwa bihinduriwe uturemangingo

KAMALIZA AGNES

April 16, 2024

Abashakashatsi bavuga ko hari imyumvire ya bamwe itari yo bacyumva ko ibihingwa bihinduriwe uturemangingo (GMO/ Genetic Modified Organism), bitera uburwayi burimo kanseri, gusaza vuba, gupfa amanzaganya n’izindi.

Bemeza ko hari ibihugu bimaze imyaka irenga 50 bikoresha ibihingwa bihinduriwe uturemangingo (GMO), kandi ko nta gihugu na kimwe kiragaragaramo uwapfuye azize ibyo bihingwa bifatwa nk’igisubizo kirambye ku mutekano w’ibiribwa ku Isi yose.

Dr. Athanase Nduwumuremyi, uhagarariye Ishami ry’ubushakashatsi ku bihingwa by’ibinyabijumba n’ibinyamizi mu Kigo cy’Igihugu gishinzwe iterambere ry’Ubuhinzi n’Ubworozi (RAB), avuga ko abagifite impungenge ku bihingwa bihinduriwe uturemangingo bakwiye kumva ko nta burwayi bitera ndetse ko ari byo gisubizo ku buke bw’umusaruro w’ibiribwa.

Ati: “Impungenge nshaka kubamara, ibi bihingwa byose tuba twashyize ku isoko haba ibikozwe mu buryo busanzwe twita ubwo kubangurira cyangwa ari ibikozwe mu buryo bw’ikoranabuhanga (GMO), nta kibazo bifite. Kuko icyo dukora ni ukubyongerera intungamubiri cyangwa tukongera umusaruro wabyo.”

Pacifique Nshimiyimana, Umuyobozi w’Ihuriro ry’Abahinzi, abahanga mu bya siyansi, abacuruzi ndetse n’abandi bantu bafite aho bahuriye n’ubuhinzi, (Alliance for Science Rwanda) , avuga ko abarwanya GMO babiterwa no kutagira amakuru kandi nta muntu uragaragara wapfuye yishwe na yo.

Ati: “Umuntu urwanya GMO mufata nk’udafite amakuru kuko hari n’igihe usanga arwanya GMO kandi azirya. Nta muntu n’umwe wigeze ugaragara avuga ko afite ikibazo cy’uburwayi cyatewe na zo cyangwa ngo zimwice.”

Pacifique Nshimiyimana, Umuyobozi w’Ihuriro ry’Abahinzi

Yongeyeho ko abanenga ibihingwa bihinduriwe uturemangingo babanza bakareba aho iryo koranabuhanga ryakoze kandi ko hari ibihugu bimaze imyaka irenga 30 bibikoresha.

Nubwo bavuga ibi ariko hari bamwe mu baturage barimo n’abakora mu by’ubuhinzi, bagaragaza ko bafite impungenge ku bihingwa bihinduriwe uturemangingo cyane ko bumva byabatera uburwayi.

Mukarugwiro Speciose, ukorera umwuga w’ubuhinzi mu Karere ka Gicumbi, yagize ati: “Njye sinafata inyanya zanjye cyangwa ibindi ngo mbitere izo nshinge kuko ni izinyica. Ibihingwa by’umwimerere ni byo bizima bikwiye kuribwa kuko byo ntibitera indwara.”

Umufasha Fabiola nawe ati: “Ibyo bituburano rwose byadutera indwara no gusaza vuba. Urumva nawe ufashe igihingwa ugashyiramo ibindi bintu kiba gitakaje umwimerere wacyo.”

Kuva u Rwanda rwakwemeza itegeko riha rugari ikinyabuzima cyahinduwe gifite uruvange rw’uturemangingo ndangasano twahinduwe hakoreshejwe tekiniki zigezweho zo guhindura ibinyabuzima hashyirwamo cyangwa hakurwamo uturemangingo, (Biosafety Law), biteganyijwe ko imyumbati ari cyo gihingwa cya mbere kizashyirwa hanze mu 2026.

Ni itegeko ryasohotse mu Igazeti ya Leta N° Idasanzwe yo ku wa 21 Gashyantare 2024,

Ikoranabuhanga rya GMO risanzwe rikoreshwa mu gukora imiti yo kwa muganga ndetse ryanifashishijwe hakorwa urukingo rw’Icyorezo COVID-19 nkuko urubuga rw’Abanyaburayi (EPP Group in Europe Parliament) rubitangaza.

Ni ikoranabuhanga kandi rikoreshwa ku bindi binyabuzima birimo amatungo, kugarura ibiremwa byazimiye ku Isi n’ibindi.

Ubu rikoreshwa mu bihugu birimo Kenya, Nigeria, Afurika y’Epfo, Ghana, Leta Zunze Ubumwe z’Amerika, Brazil, Argentine n’ahandi.

Dr. Athanase Nduwumuremyi, uhagarariye Ishami ry’ubushakashatsi ku bihingwa by’ibinyabijumba n’ibinyamizi muri RAB

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA