Ibyo wamenya ku miheho itangiza ibidukikije
Ubukungu

Ibyo wamenya ku miheho itangiza ibidukikije

NTAWITONDA JEAN CLAUDE

June 15, 2023

Mu Rwanda himakajwe umuco mu kurengera ibidukikije, hacibwa amashashi n’ibindi bikoresho bikoze muri purasitiki, ubu habonetse igisubizo kirambye ku miheha ikozwe mu muceri n’ifu y’ibigori iribwa nyuma yo gukoreshwa.

Mu mwaka w’i 2008 mu Rwanda hashyizweho politiki yo kubungabunga no kurengera ibidukikije, icyo gihe haciwe ikoreshwa ry’amashashi ndetse hanakumirwa ayo ariyo yose yinjizwaga mu gihugu, nabafatanywe bagacibwa amande.

Ni muri urwo rwego Mbonabucya Emmanuel washinze uruganda Amahoro Industries Ltd,  yashatse igisubizo kirambye mu kubungabunga ibidukikije, atekereza uburyo yafasha abanyarwanda gukora imiheha yifashishije umuceri ndetse n’ifu y’ibigori.

Mbonabucya Emmanuel washinze uruganda Amahoro Industries Ltd

Mu kiganiro kirambuye yagiranye n’Imvaho Nshya, yavuze ko yagize iki gitekerezo nyuma y’ubushakashatsi yakoze umwaka wa 2022.

Ati “Nyuma y’ubushakashatsi nakoze nifashishije inzobere mu biribwa, nyuma baza gusanga ko umuceri, ifu y’ibigori n’imyumbati bishobora kuvamo imiheha ushobora gukoresha nyuma yo gukoreshwa ukaba waribwa cyangwa wanatabwa ntube kwangiza ibidukikije kuko ubora.”

Mbonabucya yakomeje avuga ko nyuma yo gukora inyigo, yahise agura imashini zizamufasha mu mushinga we, ubu akaba arimbanije gukora iyo miheha nubwo isoko rikiri rito imbere mu gihugu kuko isoko afite kugeza ubu ni muri Nigeria.

Yagize ati ” Mu gihugu imbere turacyareba uko twamenyekanisha iyi miheha, byanashoboka leta ikadufasha kuyimenyekanisha kuko ubu nitwe ba mbere muri Afurika tugize iki gitekerezo, tubonye ubufasha bwisumbuyeho twatangira no gukora amakaroni.”

Guverinoma y’u Rwanda yashyizeho gahunda zitandukanye zo kubungabunga ibidukikije, zirimo guca burundu ikoreshwa ry’amasashi mu 2008, n’itegeko ribuza ikoreshwa ry’amacupa ya pulasitiki ryashyizweho muri 2019.

Muri 2011, u Rwanda rwari rwihaye intego yo kugabanya imyuka ihumanya ikirere icyoherezwamo ku rugero rwa 38% kugeza mu mwaka wa 2030.

Ku wa 5 Kamena 2023 ubwo u Rwanda rwifatanyaga n’Isi mu kwizihiza umunsi Mpuzamahanga w’Ibidukikije, hanamurikwa ku gahunda ivuguruye yo guteza imbere ubukungu butabangamiye ibidukikije no guhangana n’imihindagurikire y’ibihe ijyanishwa n’icyerekezo 2050.

Minisitiri w’Ibidukije Jeanne d’Arc Mujawamariya yatangaje ko urugendo rwo guca burundu pulasitiki rugomba kugirwa intego kandi bigashyirwa mu bikorwa mu buryo buboneye.

Minisitiri w’Ibidukije, MujawamariyaJeanne d’Arc

Yanavuze ko iyi gahunda ivuguruye ihamya ubushake bwa Leta y’u Rwanda bwo kugabanya imyuka ihumanya ikirere, ndetse no gushyigikira gahunda mpuzamahanga zo guteza imbere ubukungu butangiza ibidukikije no guhangana n’imihindagukire y’ibihe.

Ati “Iyi gahunda igaragaza ubushake bwa Guverinoma y’u Rwanda mu mu gushyira mu bikorwa gahunda yo kugabanya imyuka ya carbone mu kirere bitarenze 2050, ikanerekana uruhare rwa guverinoma mu kugabanya muri rusange imyuka yangiza ikirere yoherezwa mu kirere.”

“Ntidukeneye gutegereza amasezerano mpuzamahanga cyangwa ibyemezo bya guverinoma kugira ngo turandure ikoreshwa rya pulasitiki. Hari ibintu byinshi dushobora gukora nonaha. Dukwiye gutangira gukoresha amacupa y’ibirahure akoreshwa inshuro nyinshi, tukanga amacupa ya pulasitiki aho tujya muri za restaurant. […] Mbere twakoraga nka ba nyamwigendaho ariko ubu hakenewe ubufatanye.”

Kubungabunga ibidukikije Mbonabucya Emmanuel abimaze mo imyaka 12, akaba ari n’umwe mu banze mu Rwanda ibinyabiziga bitangiza ikirere.

Afite intego yo kugira uruganda runini muri Afurika rukora rukanatunganya ibikorwa bifite ireme kandi biri ku rwego mpuzamahanga  bifasha mu gusigasira ibidukikije, dore ko ubu bakora amakarito 120 y’imiheha ku munsi.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA