Ibyo wamenya ku ruzinduko rwa Gen. Kazura mu Bufaransa
Amakuru

Ibyo wamenya ku ruzinduko rwa Gen. Kazura mu Bufaransa

Imvaho Nshya

March 14, 2022

Imwe mu nkuru zikomeje gukwirakwizwa mu bitangazamakuru bitandukanye byo mu Rwanda no mu Bufaransa ijyanye n’uruzinduko rw’Umugaba Mukuru w’Ingabo z’u Rwanda (RDF)Gen Jean Bosco Kazura, agiye kugirira uruzinduko rw’akazi mu Bufaransa ku butumire bw’Umugaba Mukuru w’Ingabo z’iki gihugu, Gen Thierry Burkhard.

Ni uru ruzinduko rw’iminsi itatu, biteganyijwe ko azaba aherekejwe n’abandi basirikare bakuru batatu bo mu ngabo z’u Rwanda barimo Brig. Gen Patrick Karuretwa ushinzwe ubutwererane mpuzamahanga mu Ngabo z’u Rwanda ; Brig Gen Vincent Nyakarundi ushinzwe Ubutasi bwa Gisirikare muri RDF n’uyobora ishami ry’imyitozo n’ibikorwa Col. Jean Chrysostome Ngendahimana.

Aba bayobozi bakuru mu Ngabo z’u Rwanda bagiye kugirira uruzinduko mu Bufaransa guhera kuri uyu wa Mbere taliki ya 14 Werurwe 2022, nyuma y’intambwe yatewe mu kuzahura umubano w’ibihugu byombi, wari warasubijwe inyuma n’uruhare rw’icyo gihugu mu bikorwa byagejeje kuri Jenoside yakorewe Abatutsi nyamara kitari cyarigeze cyemera.

Ibintu byatangiye gusubira mu buryo nyuma y’uko Emmanuel Macron uyobora iki gihugu atowe cyane ko yagiye agaragaza ubushake mu kwemera uruhare rw’igihugu cye no kongera kubyutsa umubano n’u Rwanda.

Ubwo bushake bwagejeje ku ruzinduko Perezida Macron yagiriye i Kigali ku nshuro ye ya mbere muri Gicurasi 2021 aho yamaze iminsi ibiri.

Hari kandi raporo yasohotse yitiriwe ‘Duclert’ yacukumbuye uruhare rw’iki gihugu muri Jenoside yakorewe Abatutsi mu 1994, igahitana ubuzima bw’abarenga miliyoni imwe yagaragaje ko hari amakosa u Bufaransa bwakoze mu gihe cya Jenoside yakorewe Abatutsi.

Ibi byakomeje gushimangira ko umubano w’u Rwanda n’ u Buransa ushobora kuba mwiza ariko bishimangirwa n’uko ubwo yasuraga Urwibutso rwa Jenoside rwa Kigali ruharereye ku Gisozi rushyinguyemo abarenga ibihumbi 250 bazize Jenoside yakorewe Abatutsi yavuze ijambo rikomeye rikubiyemo no kwemera uruhare rw’u Bufaransa.

Bitandukanye n’ibyo abamubanjirije kuyobora u Bufaransa bakunze gutangaza mu myaka 27 y’umwuka mubi hagati y’u Rwanda n’u Bufaransa wanatumye ibihugu byombi bicana umubano, yemeye uruhare rw’igihugu cye anagaragaza ko kurwemera ari ugukomeza gutanga ubutabera.

Icyo gihe yagize ati “Kwemera aya mateka n’uruhare rwacu, ni ikimenyetso kidashidikanywaho. Tubikoze ku bushake, tubyikorera. Ni umwenda ku nzirakarengane nyuma y’igihe kirekire ducecetse.”

Nyuma y’uruzinduko kandi Perezida Macro yahise ashyiraho umuntu ushinzwe gukurikirana abagize uruhare muri Jenoside yakorewe Abatutsi bakidegembya dore ko hari n’abakiri mu bufaransa.

Kugeza ubu umubano w’ibihugu byombi uhagaze neza cyane ko hagiye habaho ibiganiro bitandukanye bigamije gusasa inzobe ku mateka ya Jenoside yakorewe Abatutsi.

U Bufaransa kandi buherutse guhagarika iperereza ryakorwaga ku ihanurwa ry’indege yari itwaye Perezida Habyarimana ndetse n’ibirego byaregwaga bamwe mu basirikare bakuru mu ngabo z’u Rwanda biteshwa agaciro.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA