Icyo Leta igamije si ugusenyera abaturage – Min. Musabyimana

Icyo Leta igamije si ugusenyera abaturage – Min. Musabyimana

Imvaho Nshya

August 18, 2023

Minisitiri w’Ubutegetsi bw’Igihugu MINALOC Jean Claude Musabyimana, Minisitiri  ushinzwe Ibikorwa by’Ubutabazi Marie Solange Kayisire, Umuyobozi Mukuru wa Polisi y’u Rwanda IGP Felix Namuhoranye, Umunyamabanga wa Leta muri MINALOC Ingabire Assumpta, n’abandi bayobozi  baganiriye n’abaturage bafite imitungo mu nkengero z’umugezi wa Sebeya mu rwego rwo kubasobanurira uko gahunda yo kwimura abari ahashyira ubuzima bwabo mu kaga iteye.

Ubutumwa bahawe bwagarutse ku kubabwira ko Leta itagamije gusenyera abaturage.

Muri iyo nama, Minisitiri Musabyimana yavuze ko Leta ikomeje gushakisha uburyo abo baturage batuzwa, n’abakiri hafi aho ku nkengero za Sebeya bigaragara ko bashobora kuba bagerwaho n’ingaruka  mu gihe yaba yongeye kuzura, abizeza ko Leta irimo gushaka uburyo ubuzima bwabo butajya mu kaga.

Yagize ati: “Icyo Leta igamije si ugusenyera abaturage ahubwo icy’ibanze ni ugukura mu kaga ubuzima bw’abaturage bashyirwa mu kaga na Sebeya”.

Yongeyeho ko Leta ikomeje gushakisha uko yabatuza ahadashyira ubuzima bwabo mu kaga kandi ko hagati aha izakomeza kuba ikomeje kubishyurira ubukode.

Ati: “Leta irimo gushakisha uburyo yakubakira  abaturage bakuwe mu byabo n’ibiza, nta muturage uzimurwa ku ngufu, cyangwa ngo ategekwe gusenya inzu ye igihe ntaho azaba yerekezwa. Abakodesherezwaga batarabona aho gutura, Leta izakomeza kubakodeshereza kugeza ubwo bazabona aho gutura”.

Abaturage basobanuriwe ibyiza byo gutura ahantu heza hatabateza akaga

IGP Felix Namuhoranye yagize ati: “Muhumure u Rwanda ruratekanye. Iyi gahunda yo kubakura ahantu hashyira ubuzima bwanyu mu kaga na yo iri mu rwego rwo gusigasira ubuzima n’umutekano wanyu, ntabwo Leta yahagurukijwe no kubasenyera cyangwa kubahombya ahubwo ni ukurengera ubuzima bwanyu”.

Minisitiri Kayisire na we yagize ati: “Hari ibikorwa birimo gukorwa mu rwego rwo kubungabunga umugezi wa Sebeya uhereye mu bice iturukamo ariko birajyana no kurengera abo ishobora gushyira mu kaga”.

Umwe mu baturage  yavuze ko bashimishijwe nuko Leta ikomeje kubitaho, hashakwa ibisubizo birambye.

Yagize ati: “Twabyakiriye neza cyane,  twishimye dufite ubuyobozi bwiza bureberera abaturage. Impungenge twari dufite zashizekuko twabonaga amezi ashize tukibaza aho tuzakura andi mafaranga yo kwishyura ubukode, ariko baraduhumurije kuko batubwiye ko bazaduha andi mafaranga yo kudukodeshereza mu gihe hagishakishwa uburyo burambye”.

Abayobozi batandukanye basobanuriye abagizweho ingaruka n’ibiza ko Leta ntawe izimura ku ngufu

Abazimurwa bakajya gutuzwa ahandi si ngombwa kuzubahiriza za metero 10 cyangwa 50 uvuye ku nkengero, hazarebwa niba byateza akaga ku buzima, hazakorwa isesengura ribigaragaza. Si buri nzu yose izasenywa hazakorwa isesengura no kuba iyaba iri  muri metero zirenze ziriya byashoboka kuko hazarebwa icyaramira ubuzima bw’abaturage.

Abagomba kwimurwa nta ngurane bazahabwa ndetse kwimurwa byagiye bitinzwa nuko bagenda bakuraho ibikorwa byabo byari bihari, nta muturage uzasenyerwa, ntawuzimurwa ku ngufu.

Aba baturage barimo gushakirwa uburyo batuzwa heza ni abahuye n’ibiza batejwe n’umugezi wa Sebeya ubwo wabasatiraga mu ijoro ryo ku  itariki ya 2 rishyira iya 3 Gicurasi 2023, ugahitana abarenga 130, ndetse hakangirika n’ibindi bikorwa birimo n’inzu.

Yanditswe na NYIRANEZA JUDITH

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA