Igihango afitanye na Perezida Kagame cyatumye amwandikaho igitabo
Imibereho

Igihango afitanye na Perezida Kagame cyatumye amwandikaho igitabo

MUTETERAZINA SHIFAH

April 20, 2024

Umwanditsi w’ibitabo Hategekimana Richard avuga ko igihango afitanye na Perezida wa Repubulika Paul Kagame cyatumye amwandikaho igitabo kigaruka ku bikorwa by’indashyikirwa yakoreye u Rwanda.

Kimwe mu gihango avuga ko afitanye n’Umukuru w’Igihugu ni uko yamufashije kuba yarize neza amashuri ye yose.

Aganira n’Imvaho Nshya Hategekimana, yavuze ko ibikorwa bya Perezida Paul Kagame nyuma ya Jenoside yakorewe Abatutsi mu 1994 na mbere yayo byamuteye gufata ikaramu akamwandikaho igitabo yise Paul Kagame Imbarutso y’Ubudasa bw’u Rwanda.

Ikindi kandi  ngo ibyo amaze kugeraho n’abavandimwe be ni we babikesha.

Ati: “Reka mvuge ko njyewe ndi umwana wa Mzee Paul Kagame, kubera ko kugira ngo mbashe kwiga uyu munsi mbe ndi uwo ndi we, ni uko byose mbikesha Umukuru w’Igihugu cyacu biri mu mpamvu nyamukuru zituma mukunda, kandi mfitanye nawe igihango. Ubwo yazaga gushyira ibuye ry’ifatizo ku ishuri rya Rusumo High School, badusabye ko tujya ku murongo nk’abaturage bafite ibibazo, icyo gihe nigaga mu mwaka wa mbere w’amashuri abanza.”

Yongeraho ati: “Mugezaho ikibazo nari mfite cyo kwiga no kubaho nabi, kuko umubyeyi wanjye yari yarapfiriye muri Tanzania, dutahana n’umwe kandi na we adufite turi batandatu, ibintu bitari bimworoheye na gato, birangira avuze ko ngomba gufashwa kuri buri kimwe cyose sinzongere kugira ikibazo na kimwe mu buzima, kuko icyo gihe twarabwirirwaga tukaburara, tukiga nabi n’abavandimwe banjye, byari ibihe bitoroshye.”

Avuga ko Umukuru w’Igihugu amaze kuvuga iryo jambo ubuzima bwabo mu rugo bwahise buhinduka, akaba ari yo mpamvu kuri we abona ibitabo amaze kumwandikaho ari bike, kuko yumva yahora amwandikaho ari wenyine, kubera ko kuba yigisha muri Kaminuza abayeho neza hamwe n’abavandimwe be, bitewe n’ubufasha yahawe na Perezida Kagame bituma ashobora  kwita ku bavandiwe be.

Kuri ubu Hategekimana amaze kwandika ibitabo bibiri bivuga kuri Perezida Kagame, aho icyo aheruka gushyira ahagaragara cyitwa Paul Kagame Imbarutso y’Ubudasa bw’u Rwanda, avuga ko gikubiyemo uburyo Umukuru w’Igihugu yihariye ugerereranyije n’abandi bigeze kuyobora u Rwanda.

Ati: “Kirimo amakuru menshi ay’Igihugu n’ay’Umukuru w’Igihugu muri rusange, ariko igikomeye kirimo buri wese agomba kumenya hari ibikorwa yakoze bitangaje by’ubudasa bikomeye bitigeze bikorwa n’abandi.”

Hategekimana avuga ko afitanye igihango n’Umukuru w’Igihugu kubera ibikorwa by’indashyikirwa yakoreye u Rwanda

Akomeza agira ati: “Urugero nyuma ya Jenoside yakorewe Abatutsi mu 1994 hari abana b’Inkotanyi bari bafite imbunda basanze ababyeyi n’abavandimwe babo bishwe n’Interahamwe ababuza kwihorera, kuba yarabashije gutanga uwo murongo ni ikintu gikomeye, abana bafite ababyeyi muri FDLR yabigishije za Kaminuza ubu barimo bariga hirya no hino mu bihugu byo hanze binyuze mu kwishyurirwa n’Ubuyobozi bukuru bw’Igihugu (Presidential Scholarship).”

Uretse ibyo ngo harimo no kuba yarashoboye guhuriza hamwe ingabo zatsinzwe n’izari zimaze kubohora Igihugu, bose bagahabwa amahirwe angana, bigaragaza ubudasa n’umwihariko we, ugereranyije n’u Rwanda rwo hambere, ibintu avuga ko byatumye yumva afite inshingano yo kwandika ku Mukuru w’Igihugu.

Bwa mbere Hategekimana yandika ku Mukuru w’Igihugu byari mu 2016, ubwo yari avuye muri Leta Zunze Ubumwe z’Amerika, aho yari amaze kubona ukuntu abaho bakunda kwandika kuri Perezida wabo, ibyatumye yibaza impamvu mu Rwanda nta we uramwandikaho kandi yarazuye Igihugu, bituma afata umwanzuro wo kwandika igitabo yise Intwari Mpinduramatwara Paul Kagame, igitabo avuga ko gikubiyemo ibigwi bye n’uko yahinduye amateka y’u Rwanda.

Ngo asanga Umukuru w’Igihugu ari ikirezi cyera Abanyarwanda bambaye kandi bakwiye kumenya, bikabafasha gushyira hamwe bagakora ibyo bakwiye gukora kandi neza.

Ati: “Hari amagambo tujya tuvuga ngo arasobanutse kandi arashoboye ntituzamutererana mu guteza u Rwanda rwacu imbere, bikwiye no gushyirwa mu bikorwa, twese tumufashe kubaka Igihugu kuko imitekerereze n’imikorereye ye ni yo yatumye Igihugu kizuka, tumufashe kugira ngo bikomeze birusheho kuba byiza, buri wese ku giti cye, urubyiruko, abakuze n’abandi aho uri hose ku ruhembe urasaniraho ukabikora neza.”

Tujya tuvuga ngo Intore ni umurinzi w’ibyagezweho ntawabisenya ireba, ni ukuvuga ngo ibyo Umukuru w’Igihugu yatugejejeho kubera kudutoza byinshi byiza bitandukanye, dufite umukoro wo kubirinda no kubyubakiraho, ibindi bikorwa byinshi kandi byiza, tugakunda u Rwanda tukarwitangira, twirinde amagambo atagira ibikorwa, ikindi twihute twirinde kuzarira mu byo dukora, turangwe n’ishyaka no kudatatira igihango dufitanye nawe.”

Uretse igitabo Kagame Paul Imbarutso y’Ubudasa bw’u Rwanda, Hategekimana yananditse ibindi bigaruka ku gukunda igihugu n’ibikenewe ku Banyarwanda harimo igihango n’Inkotanyi, Urubyiruko Dufitanye Igihango, Sinzatesha Agaciro Uwakansubije n’ibindi.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA