Ikipe y’Igihugu ya Brésil yasezerewe mu Gikombe cy’Isi cya 2026 itarenze muri 1/8, nyuma yo gutsindwa na Norvège ibitego 2-1 mu mukino wakiniwe kuri Metlife Stadium, ku Cyumweru tariki ya 5 Nyakanga.  

Muri uyu mukino Brazil ni yo yatangiye neza ndetse ku munota wa 14 yashoboraga gufungura amazamu kuri penaiti yatewe na Bruno Guimarães, umupira ukurwamo neza n’umunyezamu Orjan Nyland. Igice cya mbere cyarangiye amakipe yombi anganyije ubusa ku busa.

Igice cya kabiri cyatangiranye impinduka ku ruhande rwa Norvège, Oscar Bobb na Andreas Schjelderup basimbura Alexander Sorloth na Antonio Nusa.

Umutoza wa Brésil, Carlo Ancelotti, yakoze impinduka ya mbere ku munota wa 58, Matheus Cunha asimburwa na rutahizamu Endrick wafashije Igihugu cye gusatira birushijeho ndetse ahusha uburyo bwiza ku mupira yacomekewe na Vinícius Júnior akawutera ku ruhande.

Ku rundi ruhande, Kristoffer Ajer na Andreas Schjelderup baremye uburyo butandukanye ku ruhande rwa Norvège, ariko Haaland ntabashe kububyaza umusaruro.

Byasabye gutegereza umunota wa 80, Norvège ifungura amazamu ku gitego cyatsinzwe na Erling Haaland n’umutwe nyuma yo gusumba myugarior Gabriel, ku mupira Andreas Schjelderup yari ahinduye imbere y’izamu. 

Ku munota wa 90, Erling Haaland yatsindiye Norvège igitego cya kabiri na bwo nyuma yo guhabwa umupira na Andreas Schjelderup, aritonda atera ishoti rikomeye Alisson Becker ananirwa kuwukuramo ujya mu rushundura.

Mbere y’uko umukino urangira umusifuzi wa Kane yongeyeho iminota irindwi y’inyongera.

Ku munota wa 90+7, Brazil yabonye igitego cy’impozamarira kuri Penaliti yinjijwe neza na Neymar. 

Hari nyuma y’ikosa ryakorewe kuri Casemiro wakubiswe inkokora mu rubuga rw’amahina.

Umukino warangiye Brésil itsinzwe na Norvège ibitego 2-1, ihita isezererwa mu Gikombe cy’Isi itarenze muri 1/8, ibyaherukaga kuyibaho mu 1990.

Ni mu gihe Norvège yageze muri 1/4 cy’Igikombe cy’Isi ku nshuro ya mbere mu mateka.

Ibitego bibiri Erling Haaland yatsinze muri uyu mukino byatumye anganya ibitego birindwi na Kylian Mbappé na Lionel Messi mu bamaze kwinjiza byinshi mu irushanwa ry’uyu mwaka.

Ba uwa mbere mu kumenya amakuru agezweho!!!