Imikino y’Igikombe cya 2026 yakinwe mu ijoro ku wa Kabiri no mukerera rwo kuri uyu wa Gatatu, yasize ibihugu bya Norvège, u Bufaransa na Mexico byitwaye neza bikatisha itike yo gukina imikino ya 1/8 cy’irangiza.

Umukino wabimburiye indi, Ikipe y’Igihugu ya Norvège yatsinze Cóte d’Ivoire ibitego 2-1. Ibitego bya Norvège byatsinzwe na Antonio Nusa, naho icya Cóte d’Ivoire gishyirwamo na Amad Diallo.

Erling Haaland yahise agira ibitego 60 mu mikino 53 amaze gukinira Ikipe y’Igihugu ya Norvège, bituma yuzuza igitego cya gatanu muri iri rushanwa, aho akurikiye Lionel Messi na Kylian Mbappé bamaze gutsinda ibitego bitandatu muri iri rushanwa. 

Ni ku nshuro ya gatatu iyi kipe igeze muri iki cyiciro yaherukagamo mu 1998, ndetse ikaba itarakirenga. Muri 1/8, Norvège izahura na Brésil mu mukino uteganyijwe ku Cyumweru tariki ya 5 Nyakanga. 

Kylian Mbappé yatsinditse amateka mashya u Bufaransa busezerera Suède

Rutahizamu Kylian Mbappé yanditse amateka yo kuba umukinnyi umaze gutsinda ibitego byinshi mu mikino y’Igikombe cy’Isi yo gukuranamo, aho yafashije u Bufaransa gusezerera Suède muri 1/16 buyitsinze ibitego 3-0. Igitego cya mbere cyabonetse ku munota wa 45, Kylian Mbappé ku mupira Ousmane Dembélé yamuhaye.

Mu gice cya kabiri u Bufaransa bwaje bushaka igitego cy’umutekano, ku munota wa 53 Bradley Barcola agishyiramo ku mupira Michael Olise yamuhaye mu gihe ku munota wa 74, Kylian Mbappé yatsinze igitego cya gatatu ahawe umupira na Michael Olise.

Ibitego bya Kylian Mbappé byatumye  ageza ibitego 10 mu mikino yo gukuranamo mu Gikombe cy’Isi, mu gihe yahise anganya  ibitego bitandatu na Lionel Messi muri iri rushanwa ry’Igikombe cy’Isi cya 2026.

Muri 1/8, u Bufaransa buzahura na Paraguay mu mukino uteganyijwe ku wa Gatandatu, tariki ya 4 Nyakanga. Undi mukino, Mexico yageze muri 1/8 cy’Igikombe cy’Isi nyuma yo gutsinda Ecuador ibitego 2-0 byinjijwe na Julian Quiñones na Raul Jimenez.

Ba uwa mbere mu kumenya amakuru agezweho!!!