Ikigo cyitiriwe Ellen DeGeneres mu Rwanda cyafunguwe ku mugaragaro
Amakuru

Ikigo cyitiriwe Ellen DeGeneres mu Rwanda cyafunguwe ku mugaragaro

NTAWITONDA JEAN CLAUDE

February 2, 2022

Ubuyobozi bw’Ikigega The Ellen Fund cyashinzwe n’Umuherwe w’Umunyamerika Ellen DeGeneres, mu kiganiro cye gikurikirwa n’amamiliyoni y’abaturuka mu mpande zose z’Isi, yatangaje ko afunguye ku mugaragaro Ikigo Ellen Campus kigamije kubungabunga ingagi zo mu birunga by’u Rwanda nyuma y’imyaka ine kimaze gitangajwe.

Ellen DeGeneres yatangaje ko icyo kigo gifunguwe ku wa Kabiri taliki ya 1 Gashyantare 2022, kikaba kizakomeza gukorana n’umushinga “Dian Fossey Gorilla Fund” watangijwe na Dian Fossey benshi bamenye ku izina rya Nyiramacibiri.

Uyu mugore washatse undi mugore witwa Portia, yagize ati: “Uyu munsi, nyuma y’imyaka ine, nishimiye gutangaza ifungurwa ku mugaragaro rya “Ellen DeGeneres Campus of The Dian Fossey Gorilla Fund.” Iki kigo kizaba ari agahebuzo, gifunguriye buri wese wifuza kugisura. Ni ikigo cyubatswe mu buryo bw’ubugeni bufasha abashakashatsi kubona amakuru bakeneye mu bya siyansi n’amateka aho baba baturuka hose ku Isi, bagamije gushyigikira kubungabunga ubuzima bw’ingagi.”

Muri Gashyantare 2020 ni bwo icyo kigo cyatangiye kubakwa mu Murenge ra  Kinigi mu Karere ka Musanze, mu mushinga uhagaze miliyoni imwe y’amadolari y’Amerika (amafaranga y’u Rwanda asaga miliyari imwe).

Icyo kigo kizaba kigizwe n’Ishuri ryigishirizwamo siyansi, isomero, ububiko bw’amafoto n’inyandiko zivuga ku kurengera urusobe rw’ibinyabuzima, inzu mberabyombi yerekanirwamo amashusho y’ingagi ndetse n’igice cyahariwe ubushakashatsi ku nyamaswa.

Ni impano EllenDeGeneres yahawe n’umugore we Portia DeRosi tariki ya 20 Mutarama 2018, ubwo yizihizaga isabukuru y’amavuko y’imyaka 60 yari amaze avutse.

Ubwo yahaga impano Ellen bashyingiranywe bahuje igitsina (Lesbian), Portia de Rossi yamubwiye ko iyo mpano ikomeye kandi igaragaza uburyo yamaze igihe agerageza guharanira inzozi ze, cyane ko Ellen yakunze cyane ubutwari bwa Dian Fossey bushingiye ku rukundo yakunze ingagi  zo mu Rwanda kugeza n’ubwo azitangiye.

Ellen Degeneres ati: “Nakuze intwari yanjye ari Dian Fossey kubera ibyo yakoze mu guharanira uburenganzira bw’ingagi zo mu misozi. Ndibuka nkurikira amakuru kuri National Geographic nkabona Dian Fossey, uwo mugore wabaga mu ishyamba yibanira n’ingagi, nkavuga nti ‘Mana yanjye uyu mugore ni agatangaza!’ Nari mfite imyaka 12 y’amavuko, ibyo nabyibazaga mbitekerezaho gusa.”

Yakomeje avuga ko Igihe yahuraga bwa mbere na Portia, yamubwiye ko kwita ku buzima bw’ingagi ari byo yari gukora iyo aza kuba atari umunyarwenya n’umunyamideli w’icyamamare. Umugore we yarabizirikanye amuha impano yamunyuze yo kubaka Ikigo cy’ubushakashatsi mu Rwanda  gikomeza imirimo ya Dian FOssey.

Yakomeje agira ati: “Kubona izina ryajye rikurikiranye n’irya Dian Fossey kuri icyo kigo twubatse mu Rwanda, ni iby’agaciro gakomeye kuri njye. Ndashaka ko umurage Dian yasize wo gukomeza gufasha Ingagi zo mu Gihugu Rwanda, nk’Igihugu cyiza cyane wakomeza, kuko yankoze ku mutima ubwo nari nkiri umukobwa muto. Nizeye ko nanjye nzagira abakiri bato bandeberaho mu guharanira impinduka, atari ku ngagi gusa ahubwo no ku zindi nyamaswa zibasiwe. Ndifuza ko mwazagira amahirwe yo kugera mu Rwanda, mukajya kureba icyo kigo mugasura n’ingagi kuko ni ubunararibonye buhindura ubuzima.

Dian Fossey bitaga Nyiramacibiri yavukiye i San Francisco muri California mu mwaka wa 1932. Yakuze akunda inyamaswa, kugeza ubwo ava mu ishuri ry’ibijyanye n’ubucuruzi se yari yaramuhitiyemo, agakomereza mu bijyanye n’inyamaswa aho yabonye impamyabushobozi mu buvuzi bw’amatungo mu Ishuri Rikuru rya California.

Mu 1963 ni bwo  Dian Fossey yafashe amafaranga yabitse, asaba n’inguzanyo mu mabanki, atangira urugendo rwa mbere muri Afurika, azenguruka muri Pariki nyinshi zo ku mugabane. Yageze mu Rwanda yibanira n’ingagi zo mu Birunga, aho zari zaramufashe nk’umuryango nubwo yazikoragaho ubushakashatsi.

Agendeye ku bushakashatsi bwakozwe n’Abanyamerika, mu 1959 ku ngagi zo mu misozi miremire, yiyemeje na we gukora ubundi. Ni umwe mu bantu bakoze ibikorwa bikomeye byo kubungabunga ingagi zo mu Rwanda, ari na yo mpamvu nyuma ye hashinzwe Ikigo cyamwitiriwe.

Leta y’u Rwanda yashimishijwe cyane n’ibikorwa bya Ellen DeGeneres i Musanze kuko bishyigikira gahunda z’Igihugu zo kubungabunga urusobe rw’ibinyabuzima no guteza imbere ubukerarugendo.

Foto: Dian Fossey Gorilla Fund
Foto: MASS Design Group
Portia de Rossi, Dr Tara Stoinski, na Ellen DeGeneres (Foto The Ellen Fund)

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA