Ikiraro gihuza Muhanga na Gakenke cyongeye gutwarwa n’imvura
Imibereho

Ikiraro gihuza Muhanga na Gakenke cyongeye gutwarwa n’imvura

NTAWITONDA JEAN CLAUDE

April 20, 2022

Ikiraro cya Gihira gihuza Akarere ka Gakenke n’aka Muhanga mu koroshya ubuhahirane, cyongeye gutembanwa n’amazi y’imvura yaguye mu ijoro ryo ku wa Kabiri rishyira kuri uyu wa Gatatu taliki ya 20 Mata 2022, nyuma y’iminsi ikabakaba 10 cyari kimaze cyongeye gutahwa.

Iki kiraro cyongeye kuba nyabagendwa guhera taliki ya 11 Mata 2022, nyuma y’igihe cyari kimaze kidakora kubera ko cyari cyarangijwe n’abagizi ba nabi mu ijoro rya Noheli 2021.

Ni ikiraro gihuza Umurenge wa Rongi w’Akarere ka Muhanga n’uwa Ruli mu Karere ka Gakenke, kikaba kigira uruhare rukomeye cyane mu koroshya ubuhahirane bw’Uturere tubiri ndetse n’Intara y’Amajyaruguru n’iy’Amajyepfo.

Mu kugisana cyari cyatwaye akayabo ka miliyoni 185 z’amafaranga y’u Rwanda, ni ku nshuro ya gatatu cyari cyangiritse kikongera gusanwa ku mafaranga ya Leta.

Muri Gicurasi 2021 na bwo ikiraro cya Gahira cyari cyatwawe n’ibiza, hubakwa icyo abaturage bifashishaga mu buhahirane hagati y’Akarere ka Muhanga na Gakenke.

Umuyobozi wungirije w’Akarere ka Muhanga ushinzwe iterambere ry’ubukungu Eric Bizimana, yabwiye itangazamakuru ko igice kinini cyangiritse cy’iki kiraro cya metero zirenga 60 giherereye ku ruhande rw’Akarere ka Gakenke.

Yakomeje agira ati: “Nubwo hari igihombo kinini cyatewe n’iri yangirika, ubufatanye burakomeje hagati y’Uturere twombi ndetse hakaba hanoherejwe ubwato bw’ishami rya Polisi rishinzwe umutekano wo mu mazi burimo gufasha abaturage kwambuka.

Imibare itangwa n’ubuyobozi yemeza ko kuri iki kiraro hambukira urujya n’uruza rw’abaturage basaga 1000 buri munsi, by’umwihariko abarema isomo rya Mbuye baturutse mu Karere ka Muhanga, mu gihe abo muri Muhanga berekeza muri Gakenke ahanini bagiye mu mirimo y’ubucukuzi bw’amabuye y’agaciro.

Bizimana yahishuye ko mu ngengo y’imari y’mwaka utaha hateganyijwe miliyoni 500 zo gukumira ko umugezi utwara iki kiraro wakwibasirwa n’isuri. Ibyo bikorwa byitezweho kuzagabanya umuvumba w’amazi aza agasenya iki kiraro kuko aba yarenze imbibi z’uruzi rwa Nyabarongo.

Hagati aho ubuyobozi bwijeje gukomeza gukorana n’abaturage mu gutunganya ibyangijwe n’imvura yaraye iguye, ari na ko hakomeza gufatwa ingamba zo kwirinda no kurwanya isuri.

Ubushakashatsi bwakozwe mu mwaka wa 2016 bwagaragaje ko ikibaya kinyuramo uruzi rwa Nyabarongo gitakaza toni miliyoni 409 z’ubutaka buri mwaka, bivuze ko ari toni 490 kuri buri hegitari.

Ubushakashatsi bushya bwakozwe hagati y’Ukwezi kwa Mata n’Ukwakira mu mwaka ushize, na bwo bwagaragaje ko kuba hatari ingamba zo gukumira no kurwanya isuri biri mu bitera impamvu ziri ku kigero cya 24.4% by’ibyanduza uruzi rwa Nyabarongo.

Iki kiraro cyambukaho abarenga 1000 buri munsi (Foto: TNT)

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA