I&M Bank yatanze miliyari 231 Frw z’inguzanyo mu mezi atatu ya 2022  
Amakuru

I&M Bank yatanze miliyari 231 Frw z’inguzanyo mu mezi atatu ya 2022  

Imvaho Nshya

June 2, 2022

Ikigo cy’Imari I&M Bank (Rwanda) Plc gitangaza ko mu mezi atatu abanza y’umwaka wa 2022 cyatanze inguzanyo ingana n’amafaranga y’u Rwanda miliyari 231 ziyongereye zivuye ku kuri miliyari 222 z’amafaranga y’u Rwanda zatanzwe mu mezi atatu asoza umwaka wa 2021, bikaba bivuze ko inguzanyo ziyongereyeho 4%.

Icyo kigo gitangaza ko muri ayo mezi atatu cyinjije miliyari 9.3 z’amafaranga y’u Rwanda yiyongereye ku kigero cya 15% ugereranyije n’igihembwe cya mbere cy’umwaka ushize.

Iryo zamuka ngo ni inyungu zishyuwe ku nguzanyo z’abakiliya zazamutse zikagera ku kigero cya 14% ugereranyije n’igihembwe cya mbere cy’umwaka wa 2021

Iyo banki ivuga ko muri rusange ishoramari ryayo ryiyongereye ku kigero cya 23% rikagera ku mafaranga y’u Rwanda asaga miliyari 112.2 mu gihemwe cya mbere cya 2022 avuye kuri miliyari 91.5 zakozwemo ishoramari mu gihembwe cya nyuma y’umwaka wa 2021.

Amafaranga yabikijwe n’abakiliya ndetse n’ibigo bitandukanye yiyongeyeho ku kigero cya 10% agera kuri miliyari 359 avuye kuri miliyari 327 z’amafaranga y’u Rwanda arimo ikigereranyo cy’inguzanyo yishyuwe kingana na 64%.

Uruhererekane rw’amafaranga muri iyi banki rwageze ku kigero cya 528% mu mpera za Werurwe.  

Ubuyobozi bwa I&M Bank Rwanda Plc buvuga ko mu gihembwe cya mbere cyasoje taliki ya 31 Werurwe 2022, yungutse miliyari 2.96 z’amafaranga y’u Rwanda ataravamo imisoro, bisobanuye ko yiyongereye ku kigero cya 17% ugereranyije n’igihembwe cya mbere cy’umwaka wa 2021.

Imikorere y’iyo banki yagaragariye mu nzego zitandukanye kuko inyungu ku mutungo ku gishoro (ROE) yazamutse ku kigero cya 12.14% ndetse n’iyo ku mutungo rusange (ROA) yiyongera ku kigero cya 1.61%.

Amafaranga yavuye muri komisiyo ndetse n’ubundi bwishyu yazamutseho 4% ugereranyije n’igihembwe cya mbere cy’umwaka ushize kubera uruhare rwo gukoresha ikoranabuhaga mu kunoza serivisi binyuze mu kwifashisha ikoranabuhanga.

Nanone kandi amafaranga banki yakoresheje mu kunoza serivisi yageze kuri miliyari 5.5 akaba yariyongereye ku kigero cya 9% ugereranyije n’umwaka ushize.

Ubuyobozi bw’iyo banki bwemeza ko muri rusange inyungu ya nyuma yo kwishyura imisoro yageze kuri miliyari 1.9 z’amafaranga y’u Rwanda ugereranyije n’umwaka ushize.

Umuyobozi wa &M Bank (Rwanda) Plc, Robin Bairstow, yagize ati: “Twataze umusaruro ushimishije mu gihembwe cya mbere cy’uyu mwaka, bikaba byubakiye ku nkingi zashinzwe mu 2021 ndetse n’ikoreshwa ry’ikoranabuhanga rishya rya iMara 2.0. Umusaruro wavuye mu bugenzuzi uragaragaza imikorere myiza mu nzego zose z’imari muri iyi banki.”

Mu gukomeza kuzamura ikoranabuhanga, hatangijwe serivisi zo gutanga inguzanyo hakoreshejwe telefoni zigendanwa hamwe n’umufatanyabikorwa w’iyi banki witwa SPENN, kugeza ubu iyi serivisi ikaba imaze kugira abayikoresha bakabakaba ibihumbi 500.

Robin Bairstow avuga ko banki yakoze neza kubera ko ubukungu bw’u Rwanda bukomeje kuzahuka, bikaba bikomeje kujyana n’ubwiyongere bw’abakiliya bazamutse bukagera ku kigero cya 24% barimo ab’ubucuruzi buto n’ubuciriritse bari ku kigero cya 70%.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA