Impamvu Zimbabwe ihakana ibyo gukingira ikibaba Protais Mpiranya
Amakuru

Impamvu Zimbabwe ihakana ibyo gukingira ikibaba Protais Mpiranya

NTAWITONDA JEAN CLAUDE

May 16, 2022

Protais Mpiranya wishwe n’igituntu yivuje yitwa “Sambao Ndume”, anashyingurwa muri ayo mazina.

Amaze imyaka isaga 28 mu mitwe y’Abanyarwanda by’umwihariko abarokokeye Jenoside yakorewe Abatutsi mu Mujyi wa Kigali no mu nkengero zawo, akaba amaze imyaka ibarirwa muri 16 ashakishwa ku rwego mpuzamahanga kandi atakiri mu Isi y’abazima.

Imiryango Iharanira uburenganzira bw’abarokotse Jenoside yababajwe n’uko uyu mugabo yapfuye bikagirwa ibanga, ikirenze ibyo akaba yaranavuye mu mubiri ataryojwe ibyaha ndengakamere yakurikiranwagaho imbere y’ubutabera.

Protais Mpirannya ni umwe mu bo Umuryango w’Abibumbye washyiriyeho intego ya miliyoni eshanu z’amadolari y’Amerika (asaga miliyari eshanu z’amafaranga y’u Rwanda) yari kwegukanwa n’uwari gutanga amakuru y’aho aherereye.

Nyuma y’imyaka ikabakaba 20 ashakishwa, iperereza ryakozwe n’Urwego Mpuzamahanga Rwashyiriweho Gukora Imirimo y’Insigarira y’Inkiko Mpanabyaha (IRMCT) ryamaze kwemeza ko ubu ashyinguwe mu irimbi riherereye hanze y’Umujyi wa Harare muri Zimbabwe.

Igitangaje ni uko no kumushyingura byakozwe mu buriganya kuko no ku mva ye hariho amazina mahimbano, bikaba byarakozwe n’umuryango we mu gukomeza kuyobya uburari nubwo wari uzi neza ko akiri mu bashakishwa mu ruhando mpuzamahanga.

Mu mpera z’icyumweru gishize, Leta ya Zimbabwe yamaganye amakuru akomeje gucicikana mu bitangazamakuru bitandukanye ashimangira ko icyo gihugu cyagize uruhare mu gukingira ikibaba uyu mugabo washakishwaga uruhindu kubera ibyaha bya Jenoside n’ibyibasiye inyoko muntu yari akurikiranyweho n’ubutabera mpuzamahanga.

Umubiri wa Protais Mpiranya wari umuyobozi w’itsinda ry’abasirikare barindaga Perezida mu gihe cya Jenoside yakorewe Abatutsi, wamaze imyaka utwikiriwe n’ibuye ry’urwibutso ryanditsweho amazina mahimbano nk’uko yagaragaraga ku gishushanyo cyatahuwe kuri mudasobwa yafashwe n’abagenzacyaha ba Loni.

Icyo gishushanyo cyari icyashushanyijwe n’intoki, kikaba kigaragaza imiterere y’ibuye ry’urwibutso rwashyizwe ku mva ya Mpiranya bikozwe n’umuryango we wari waragize ubwiru iby’urupfu rwe muri iyi myaka yose ishize.

Mu kwezi gushize ni bwo umubiri we wataburuwe bisabwe n’abagenzacyaha ba IRMCT, ku wa Kabiri w’icyumweru gishize akaba ari bwo ibizamini byafashwe ku turemangingo ndangasano (ADN) byashimangiye ko washyinguwe mu izina rya “Sambao Ndume”.

Minisitiri w’Ububanyi n’Amahanga wa Zimbabwe Frederick Shava, yavuze ko ubuyobozi bw’icyo Gihugu butigeze bukingira ikibaba Mpiranya mu buryo ubwo ari bwo bwose.

Yagize ati: “Nk’Igihugu kigendera ku mategeko, Zimbabwe ntizigera ikingira ikibaba abanyabyaha bityo ikaba yarakiriye neza ibyavuye mu bipimo bya DNA byafashwe.”

Yakomeje ashimangira ko Leta ya Zimbabwe yagize uruhare mu korohereza abagenzacyaha ba Loni kugira ngo bagere ku makuru bifuzaga kumenya.

Ati: “Leta ya Zimbabwe yifuza gutanga umucyo ku bihwihwiswa mu itangazamakuru ko Guverinoma ya Zimbabwe yahishiye Umunyarwanda washakishwaga cyane, Protais Mpiranya, umurambo we watahuwe muri Zimbabwe ku izina ry’irihimbano rya Ndume Sambao.”

Yakomeje agira ati: “Kuva ku munsi wa mbere, Zimbabwe yakoranye bya hafi n’itsinda ry’abagenzacyaha ryakoraga iperereza. Abyobozi ba Zimbabwe ntibahwemye gutanga amakuru no kubahiriza ibisabwa mu mategeko mpuzamahanga byose.”

Umushinjacyaha mukuru wa IRMCT Serge Brammertz, wari uyoboye urugendo rw’iperereza kuri Mpiranya, yavuze ko ari we wari usigaye mu bahoze ari abayobozi bakekwaho Jenoside yakorewe Abatutsi bikaba bitanga ihumure ry’uko adashobora guteza izindi ngorane.

“Yahungiye muri Zimbabwe akingiwe ikibaba n’abasirikare”

Uyu mugabo ushinjwa uruhare mu bwicanyi bwatwaye abasaga ibihumbi by’Abanyarwanda barimo n’abari abanyapolitiki batavugaga rumwe na Leta yakoraga Jenoside, yaguye i Harare mu kwezi k’Ukwakira 2006 azize indwara y’umutima yari ishamikiye ku burwayi bw’igituntu bwari bwaramuzahaje.

Yapfuye afite imyaka 50, ariko urupfu rwe rugirwa ibanga rikomeye nk’uko ubuzima bwe bwo guhunga ubutabera bwari bumeze. Mpiranya yabaye muri Zimbabwe imyaka myinshi agendera ku mazina y’amahimbano ndetse na Leta y’icyo Gihugu ikavuga ko ntawe bacumbikiye.

Iperereza ryamukorwagaho ryaje kumusanga mu irimbi ry’ahitwa Granville mu majyepfo y’inkengero z’Umujyi wa Harare. Iryo perereza ryanagaragaje ko yageze muri Zimbabwe azanywe n’indege ya gisirikare y’icyo Gihugu kandi yanakoranye kenshi n’abayobozi batandukanye bo muri icyo gihugu cyari kiyobowe na Robert Mugabe.

Abayobozi bose bari bamuzi nk’umwe mu basirikare bakomeye (yari afite ipeti rya Majoro) wari umwe mu barasaniye ku ruhembe rumwe mu ntambara ya kabiri yo muri Congo mu mwaka wa 1998 kugeza mu 2003.

Umwe mu bayobozi bari muri iryo perereza yagize ati: “Abanyazimbabwe, cyane cyane abari abayobozi, bari bazi neza ko ari i Harare. Ndetse yanagiye akorana inama n’abayobozi ba Zimbabwe. Mu by’ukuri yageragezaga guhisha umwirondoro we muri rubanda, ariko impamvu nyamukuru yagiye muri Zimbabwe ni umubano yari afitanye n’icyo gihugu.”

Mpiranya yari umwe mu bari barihishe indebakure y’ubutabera cyane ko ari mu bo  urukiko Mpuzamahanga Mapanabyaha rwashyiriweho u Rwanda (ICTR) rwarinze rufungwa rutaraca iryera nubwo rwari rwaratanze impapuro zo kumuta muri yombi ashinjwa ibyaha umunani birimo ibya Jenoside n’ibyaha byibasiye inyoko muntu.

Nyuma y’aho IRMCT ifatiye inshingano zo gukurikirana imanza zimaze iminsi, yakoze iperereza ryari rigamije gukurikirana bamwe mu bari baraburiwe irengero na we arimo.

Ahagana saa moya zo mu gitondo cyo ku wa 7 Gashyantare 2022, ni bwo abari bagize itsinda rishinzwe iperereza bageze ku gituro cya Sambao Ndume cyarengewe n’ibyatsi byinshi. Byasabye amasaha abiri n’igice kugira ngo abo bagenzacyaha bagere ku cyo bifuzaga. Ni igituro gifite ibuye ry’ubwibutso ryatnditseho amazina ya Sambao Ndume amataliki ye y’amavuko yahuraga neza n’aya Mpiranya (taliki 30 Gicurasi 1956).

Umwe mu bari muri iryo tsinda, yagize ati; “Igihe cyarageze umwe muri bagenzi banjye aravuga ati: “Ndakibonye! Twese twaramusanze duhagarara iruhande rwacyo tucyitegereza. Cyari kimeze nk’uko twakekaga ko kizaba kimeze neza neza. Akazi kenshi gakomeye twakoze, rimwe tukananirwa ubundi tukihangana, twari tugeze ku byo twashakaga.”

Icyo gituro cyari cyanditsweho amagambo y’Igifaransa agira ati: “Aha haruhukiye uwakunze igihugu cya se, abaturage be n’umuryango we kurusha uko yikunda. Munsi y’igituro hari igishushanyo cy’umurwanyi ufite umuheto afora umwambi handitseho amagambo agira ati “Dad RIP”.

Urugendo rwo kugera ku mva ya mpiranya ntirwari rworoshye kuko hari abantu bamwe na bamwe bo muri Afurika bavugaga ko bamubonyeho kugeza mu mwaka ushize ubwo abagenzacyaha batangiye kwizera ko ashobora kuba acyihishe muri Zimbabwe hamwe na bagenzi be barwananye urugamba muri Congo.

Muri Gicurasi 2020, Mpiranya ni we wari uwa nyuma mu bakomeye 93 bakurikiranyweho ibyaha bya Jenoside na ICTR, akaba ari mu bakekwaho ibyaha ndengakamere bashakishwaga ku Isi.

Ni we wari ayoboye Umutwe w’Ingabo zarindaga Perezida Habyarimana, akaba yarahaye urutonde abasirikare yayoboraga abategeka kwica Abatutsi n’imiryango yabo. Yatoje Interahamwe ndetse anaziha intwaro, akaba ari na we wohereje abasirikare n’Interahamwe kuri za bariyeri zitandukanye mu Mujyi wa Kigali ahiciwe ibihumbi by’Abatutsi.

Itsinda ry’Abasirikare b’Abajepe ni na ryo ryishe Agathe Uwilingiyimana wari Minisitiri w’Intebe ariko akaba yaritandukanyije n’umugambi wa Jenoside. Icyo gihe yiciwe rimwe n’abasirikare b’Ababiligi bari boherejwe kumurinda.

Nyuma yo gufata ubutegetsi kwa RPF-Inkotanyi, Mpiranya ari mu bihumbi by’abahungiye mu bihugu by’Afurika aho yamaze imyaka ine muri Cameroon kugeza ubwo icyo gihugu cyatangaje ko kitazongera gucumbikira abakekwaho Jenoside.

Yimukiye muri Repubulika Iharanira Demokarasi ya Congo (RDC), afatanya n’inyeshyamba za FDLR ndetse n’ingabo za Zimbabwe mu kurwanirira Perezida Laurent Desire Kabila, mu rugamba rwavuzwemo ingabo z’u Rwanda n’iza Uganda.

Mpiranya bivugwa ko yigaragaje cyane muri urwo rugamba kurusha n’abasirikare b’Abazayirwa barwanaga muri urwo rugamba, bituma agirana umubano wihariye n’abasirikare ba Zimbabwe mu gihe cy’intambara.

Umwe mu bagenzacyaha yagize ati: “Baramwubahaga. Yari Umuyobozi mwiza, umunyamwuga, yarumvaga, akabaza ibibazo ndetse agafata n’imyanzuro mu gihe gikwiye. Ni umuntu wari asobanukiwe ibijyanye n’umutekano, bituma akurura abasirikare ba Zimbabwe kurusha abandi bakoranaga.

Ubwo yashyirirwagaho impapuro zimuta muri yombi muri Nzeri 2002, inshuti ze n’abamwemeraga muri Zimbabwe bamufashije kwambuka umupaka. Abatangabuhamya bavuga ko yavuye ahitwa Mbuji-Mayi muri RDC yerekeza i Harare atwawe n’indege ya Gisirikare.

Icyo gihe ngo yari kumwe n’Abandi bayobozi b’Ingabo za EX-FAR, ahita anatangira ubucuruzi mu myirondoro y’imihimbano. Yatangiye ubucuruzi muri serivisi zo gutwara abantu aho yari afite imodoka ndetse ebyiri bivugwa ko yaziguze mu mafaranga yakuye muri Diyama yasahuye muri RDC.

Diyama yasahuye muri RDC zamugize umuherwe imyaka mike

Abatangabuhamya bavuga ko Mpiranya yari umuhanga cyane mu gutanga amabwiriza mu bya gisirikare, ariko iby’ubucuruzi ngo ntibyamuhiriye kuko nyuma y’imyaka ine ashoye imari yarahombye, ubuzima butangira kumunanira.

Yatangiye umwaka wa mbere atuye mu nyumba (villa) y’ikibatashwa, ariko umuryango we ugenda wimukira mu nzu ziciriritse mu Mujyi kugeza ubwo wisanze mu nkengero za Harare.

Icyo gihe ntibari bagikoresha abashoferi batwara za modoka, ahubwo byabaye ngombwa ko batangira kuzitwarira. Igihe cyarageze izo modoka zombi zikora impanuka babura amafaranga yo kuzikoresha. Bivugwa ko indi mitungo myinshi yatikiriye mu ihungabana ry’ubukungu ryabaye muri icyo Gihugu icyo gihe.

Igihe Mpiranya yarwaraga Igituntu ntiyari agifite n’urwara rwo kwishimisha ku buryo yashobora kwiyishyurira ikiguzi cy’ububuvuzi, bityo umugore we wabaga mu Bwongereza yatangiye kumwoherereza inkunga. Igihe yuzuzaga inyandiko zimwemerera guhabwa ibitaro ni bwo yiyise Sambao Ndume ari na yo mazina yashyinguwemo.

Abagenzacyaha ba Loni bahamya ko umuryango  n’inshuti ze ari bo bagize ubwiru ibijyanye n’urupfu rwe kugira ngo badaca intege inyeshyamba za FDLR zaterwaga morali no kumva ko akiriho kandi yari umujyanama mwiza mu bijyanye n’Igisirikare n’urugamba.

Mu myaka mike ishize ni bwo itsinda ryakoraga iperereza ryongeye gutangira kumukurikirana risubiramo amakuru ryakusanyije, kubaza abatangabuhamya batandukanye, kugenzura amakuru n’impuha n’ibyashoboraga kubayobya bivuye mu mitwe yabo bishingiye ku makuru babonye mu 2002.

Batangiye kubaka bundi bushya buri makuru yose arebana n’ubuzima bwa Mpiranya, imyumvire ye ndetse n’abamuhoraga hafi.

Ibishya byabonetse muri Nzeri 2021 ubwo hafatwaga mudasobwa n’ibindi bikoresho byafatiwe muri kimwe mu bihugu by’i Burayi. Nyuma yo kugenzura amakuru atandukanye ni bwo baguye kuri emeyili zifite umutwe ugira uti “ku muntu witabye Imana”, n’izindi zifite umutwe ugira uti “Umusaza”.

Bagenzuye ingendo za bamwe mu bagize umuryango wa Mpiranya, bahereye kuri viza bagiye batererwa n’ibihugu byiyemeje gufatanya na Loni muri iryo perereza, basanga izo ngendo zose zirahurira muri Zimbabwe mu Kwezi k’Ukwakira 2006.

Nyuma yo kunyura mu mafoto menshi yahererekanywaga ku ikoranabuhanga, babonyemo amafoto yafashwe mu kiriyo arimo ay’umurambo waririrwaga usa na Mpiranya, ukaba wari wambitswe ikositimu ari na yo abakoraga iperereza basanze mu gituro cya Ndume.

Nyuma baje kugwa ku ifoto y’ishusho y’igituro yashushanyijwe n’intoki yoherejwe n’umwe mu bavandimwe be, bikaba byarakozwe mu rwego rwo guha ishusho abagombaga guconga ibuye ry’urwibutso i Harare.

Abayobozi ba Zimbabwe bemereye abagenzacyaha gutaburura umubiri w’uwo mugabo wiyise Sambao Ndume bikorwa ku ya 27 Mata hari n’abagenzacyaha batatu bo muri Zimbabwe.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA