Imyaka 2 irihiritse COVID-19 igeze mu Rwanda; intambwe ku yindi y’urugendo ruganisha ku ntsinzi
Amakuru

Imyaka 2 irihiritse COVID-19 igeze mu Rwanda; intambwe ku yindi y’urugendo ruganisha ku ntsinzi

Imvaho Nshya

March 14, 2022

Ijambo COVID-19 cyangwa “Coronavirus” ryatangiye kuvugwa mu bitangazamakuru bitandukanye hirya no hino ku Isi mu mpera za 2019 nk’indwara yibasiye u Bushinzwa mu gace ka Huwan.

Amahanga yatekerezaga ko ari indwara ishobora guhita irangira vuba itanarenze muri icyo gihugu ariko byaje gutandukana n’intekerezo z’abenshi ahubwo ikwirakwira hose iba icyorezo cy’Isi.

Abantu ibihumbi amagana yarabahitanye, abandi barayandura ariko baza gukira ndetse cyabaye icyorezo cyatumye amahanga ahinda umushitsi cyane ko cyadindije ubukungu bw’Isi mu buryo buteye impungenge.

Uretse iyo mu mahanga cyavuzaga ubuhuha, umunsi nk’uyu tariki ya 14 Werurwe 2020 ni bwo mu Rwanda hagaragaye umurwayi wa mbere wa COVID-19 birya byavugwaga n’itangazamakuru mpuzamahanga ndetse n’iryo mu Rwanda biba imbona nkubone ku banyarwanda.

Ubwoba bwabaye bwose ku Banyarwanda bari bamaze kumenya ubukana bwayo n’imibare y’abantu bahitanwaga nayo buri munsi.

Ibi byatumye igihugu nacyo gifata ingamba zitandukanye zigamije kwirinda ko icyo cyorezo gikomeza gukwirakwira hirya no hino mu baturage birimo gukurikirana buri muntu wese waba warahuye n’uwo wagaragaweho COVID-19 bagasuzumwa ndetse bagashyirwa mu kato k’iminsi runaka.

Ibikorwa bitandukanye byahise bihagarikwa birimo amakoraniro n’amateraniro ahuza abantu benshi, ingendo za rusange nazo zirahagarara ndetse n’imirimo inyuranye abakozi bategekwa gukorera mu rugo.

Umwaka wa 2020 wabaye indyankurye ku Banyarwanda ndetse usharirira ab’amikoro make n’abaryaga ari uko baciye incuro n’ubwo Leta y’u Rwanda yagiye ibagoboka.

Ibikorwa by’uburezi na byo byarahagaze nk’ibindi byose kuko byamaze amezi umunani amashuri afunzwe kimwe n’insengero zamaze igihe kitari gito zifunze imiryango nubwo hari izitarafungurwa na magingo aya.

Abana bari ku ishuri bahise basabwa gusubira mu miryango yabo

Ibyemezo nk’ibyo byo guhagarika ingendo zaba iz’imbere mu gihugu no hanze yacyo, inkundura yo kutarenza amasaha n’ibindi byarakomeje mu gushakira hamwe umuti ushobora kugabanya ubukana bw’icyorezo cya COVID-19 cyari gifite mu Rwanda.

Ibi kandi byakurikiwe n’ibihano bitandukanye birimo gucibwa amande ku wabirenzeho, kurara muri sitade zitandukanye hatitawe k’uwo uri we ndetse no gukurwa mu nshingano ku bayobozi batandukanye by’umwihariko ab’Inzego zibanze bagaragaweho no kwica ayo mabwiriza.

Guma mu rugo umuti usharira ariko wa ngombwa

Kimwe n’ahandi ku Isi, ahagaragaraga ubwandu bwinshi mu gihugu hashyirwaga muri guma mu rugo hagamijwe gukurikirana abatuye muri ako gace no guca intege ikwirakwira ryayo mu baturage.

U Rwanda rwagize ibihe bitandukanye bya Guma mu Rugo bitewe n’uburyo COVID-19 yagendaga isa n’iri gukwirakwira mu buryo bwihuse ku rusha ibindi bihe.

Ku nshuro ya mbere tariki 15 Werurwe ni bwo ibikorwa bitandukanye byafuzwe, hanashyirwaho urwego ruhuza inzego zitandukanye za Leta rushingwa by’umwihariko gukurikirana umunsi ku wundi ibikorwa byo kurwanya COVID-19 (National Command Post).

Gahunda ya Guma mu Rugo yagombaga kumara ibyumweru bibiri ariko byaje kugenda byongerwa kugeza hafi ukwezi n’igice.

Nyuma yo kuvanaho Guma mu rugo hagiye hafatwa izindi ngamba zikomeye zirimo Guma mu Karere aho umuturage atari yemerewe kuva mu Karere kamwe ngo agere mu kandi, bihererekanywa na Guma mu Ntara ndetse hari naho byageze imidugudu, utugali n’imirenge bigaragara ko byibasiwe cyane n’icyorezo bigashyirwa mu kato.

Muri Nyakanga 2020 Minisitiri w’Intebe Dr. Ngirente Edouard, yagaragaje ko icyo cyorezo bisaba kugikumira binyuze mu gufata ibyemezo bikomeye cyane ko hari hataramenyekana niba koko gishobora guhagarara.

Yagize ati “Biragaragara ko iyi ndwara ishobora kuzatinda gushira mu Gihugu no ku Isi muri rusange, bikaba bidusaba kumenyera kubana nayo. Ni muri urwo rwego, inzego zibishinzwe zirimo kunoza ingamba zo guhangana na COVID-19 kuva ku rwego rw’Igihugu kugera ku Mudugudu.”

U Rwanda rwakomeje guhangana ndetse n’ibikorwa by’ubuvuzi bihabwa imbaraga kugira ngo abarembye n’abandura bitabweho.

Byageze muri Nyakanga 2020 hashize amezi ane gusa u Rwanda rufite ibigo 17 bivura abarwayi (Treatment centers) bifite ubushobozi bwo kwakira abantu 1.767 n’ibigo 11 bicumbikira abakekwaho uburwayi bwa COVID-19 (quarantine/isolation sites) bifite ubushobozi bwo kwakira abantu 500.

Ibitaro byo mu Rwanda byaba ibya Leta ndetse n’iby’abikorera bifite ubushobozi bwo kwakira no kuvura abarwayi ba COVID-19 igihe byaba byiyambajwe byari bifite ubushobozi bwo kwakira abantu 280 ndetse no mu bice bitandukanye by’Igihugu, hashyizweho Laboratwari 7 zo gupima COVID-19 zirimo Rwamagana, Rusizi, Nyagatare, Rubavu, Kirehe, Ibitaro Bikuru bya Kaminuza i Butare n’Ibitaro Bikuru bya Gisirikare i Kanombe.

Mu bitaro by’Akarere ka Nyarugenge nabyo byahawe umwihariko wo gukurikirana abarwayi ba Covid-19 ndetse n’ibitaro bya Kanyinya mu rwego rwo guhangana n’iyi ndwara.

Ubuvuzi bukoreshejwe ikoranabuhanga

Ubusanzwe nubwo hari hamaze gukorwa byinshi, iterambere ry’ikoranabuhanga naryo ryakomeje kugira uruhare mu guhandana na COVID-19.

Ku bufatanye n’Ishami ry’Umuryango w’Abibumbye ryita ku iterembere UNDP na Guverinoma y’u Buyapani binyuze muri Ambasade yayo mu Rwanda, Minisiteri y’Ubuzima yagiye ishyikirizwa ibikoresho bitandukanye birimo na robots zakifashishwa mu guhangana n’iyi ndwara.

Izi robots zatanzwe mu bihe bitandukanye harimo izafashaga mu gupima Covid-19, gushishikariza abantu kwambara udupfukamunwa neza ndetse n’izindi zatanzwe nyuma zirimo izigamije kwica no gutwika za microbe ku buryo bwihuse.

Ubu buvuzi bwakomeje kubakirwa ubushobozi ndetse ibikorwa byo gupima umuntu biva ku masaha atari make yo kuboneraho ibisubizo bigera ku minota 15 ku wakoresheje uburyo bwa Rapid test, kandi ubu buryo bugezwa no kuri buri rwego uhereye ku kigo nderabuzima.

Urugamba ruhinanye, inkingo zarabonetse

Koronavirusi itaratoranyaga abirabura cyangwa abazungu yari ikomeje kuvuza ubuhuha muri Leta zunze ubumwe za Amerika, u Butaliyani, u Budage, n’ibihugu byo mu Burayi benshi batangiye gutekereza uburyo bwo kubona umuti cyangwa urukingo.

Ikigo cya Biontech gifatanyije na Pfizer byashoboye gukora urukingo rushobora gukingira umuntu Covid-19 bikaba byamufasha kutarembywa nayo ku  buryo yamuhitana ariko bitavuze ko atayandura.

Ibikorwa byo gukingira bimaze umwaka bitangijwe mu Rwanda, abamaze gukingirwa byuzuye barasaga miliyoni 7.9

Ibihugu bikomeye birimo na Leta zunze ubumwe za Amerika byatangiye gukingira abaturage babyo mu Ukuboza 2020 haherewe ku bakora mu nzego z’ubuzima, umutekano, abakozi ba Leta n’abandi bari bari ku ruhembe mu guhashya icyorezo.

Ibihugu byo muri Afurika byakomeje gucungira ku ngunga z’amahanga ariko nabyo byari birajwe inshinga no kubona abaturage babyo babona agahenge.

U Rwanda rwakoze iyo bwabaga abaturage barwo batangira gukingirwa mu 2021 ndetse rwiha intego yo kuba mu 2022 ruzaba rwamaze gukingira nibura 60% by’abagomba gukingirwa.

Perezida wa Repubulika y’u Rwanda Paul Kagame na Madamu we Jeannette Kagame bari mu bikingije mbere mu rwego rwo gutinyura Abanyarwanda na cyane ko hari bamwe bari batangiye kugaragaraza ko batazemera guterwa urukingo.

Inkingo u Rwanda rwakoresheje mu gukingira abaturage barwo harimo Pfizer, Moderna, Astrazeneca, Johnson and Johnson na Sinopharm yo mu Bushinwa.

Nubwo habaye inkundura ikomeye kuri bamwe mu baturage bangaga kwikingiza ndetse hafatwa n’ibyemezo birimo kubahagarika mu mirimo mu rwego rwo kwirinda ko baba imbarutso yo gukwirakwiza Covid-19 benshi baje kuva ku izima bemera gukingirwa.

Kugeza ubu u Rwanda rumaze gukingira abaturage basaga miliyoni 8, 8 bahawe dose ya mbere, miliyoni 7.973.910 bahawe dose ya kabiri mu gihe 2.191.776 bamaze guhabwa dose ishimangira.

Ibitaro bitandukanye byahawe ububasha bwo kwakira abarwayi ba COVID-19

Ubukungu bwarashegeshwe

Birumvikana ko icyorezo cyagize ingaruka ku bukungu bw’Isi n’u Rwanda muri rusange cyane ko bimwe mu bikorwa bibyara inyungu birimo ubucuruzi, ubukerarugendo n’ubwikorezi byagiye bihagarara mu kwirinda ikwirakwira ryacyo.

Ibyo byagize ingaruka zikomeye ku bukungu bw’u Rwanda bwatangaga icyizere cyo kuzamuka nibura ku kigero cya 10% mu 2020.

Uyu mwaka wari uw’icyetegererezo bijyanye no kuba nyinshi mu ntumbere z’igihugu zirimo na VUP, Vision 2020, EDPRS ya kabiri zaragombaga kwerekana umusaruro uhamye muri uyu mwaka byarangiye nawo ubaye mubi kurusha n’indi.

Icyakora mu kwishakamo ibisubizo na cyane ko no mu bihe bya Guma mu rugo abaturage bagobotswe kubona amafunguro, u Rwanda rwatangije ikigega nzahurabukungu kigamije gufasha abagizweho ingaruka na Covid-19 mu bucuruzi bwabo.

Miliyari 100 Frw zashyizwemo kugeza ubu zaranakoreshejwe mu bikorwa byo kuzahura ubukungu ku baturage bagizweho ingaruka by’umwihariko mu bucuruzi bwabo, ishoramari ndetse n’ibindi binyuranye bibabyarira inyungu.

U Rwanda kandi rwagiye rwigomwa imwe mu misoro n’amahoro mu rwego rwo kwirinda ko ibiciro bishobora gutumbagira nko ku ngendo, ibikomoka kuri petiroli, ibikoresho by’isuku n’ibindi.

U Rwanda rwifashishije robots mu guhangana n’icyorezo cya Covid-19

Kugeza ubu ubukungu bw’u Rwanda bukomeje kuzahuka na cyane ko imbogamizi za hato na hato ibikorwa binyuranye byahuraga nazo zagabanyutse cyane ndetse n’imirimo ikaba irimbanyije.

Biteganyijwe ko ubukungu bw’u Rwanda buzazamuka ku kigero cya 6,8% mu 2022 na 8% mu mwaka ukurikiyeho kandi urugamba rwo guhangana na COVID-19 bisa naho u Rwanda ruri kurutsinda cyane ko kuri ubu hashize icyumweru nta murwayi uri mu bitaro muri 45 bayanduye mu minsi irindwi ishize.

Ikindi kigaragaza intsinzi ku Rwanda ni uko ibikorwa byo gukingira bikomeje gushyirwamo imbaraga ku buryo abatarakingirwa byuzuye nabo bakomeje ku byitabira ndetse no kuba amasaha y’ingendo n’ibikorwa yarongerewe bimwe bigasubizwa uko byahoze mbere y’umwaduko wa COVID-19.

COVID-19 yatwaye ubuzimabwa benshi, kugeza ubu baragera ku 1,459 mu Rwanda

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA