Indege yari gukura abimukira muri UK yahagaritswe ku munota wa nyuma
Amakuru

Indege yari gukura abimukira muri UK yahagaritswe ku munota wa nyuma

NTAWITONDA JEAN CLAUDE

June 15, 2022

Ku wa Kabiri taliki 14 Kamena ubwo indege yagombaga kuzana mu Rwanda abimukira n’abasaba ubuhungiro yaburaga amasaha abiri ngo ihaguruke i London, Urukiko rw’i Burayi ruharanira uburenganzira bwa muntu (European Court of Human Rights/ECHR) rwategetse ko urwo rugendo rusubikwa by’agateganyo.

Ni icyemezo cyafashwe nyuma yo kwemeza ikirego cy’umwe mu bimukira ukomoka muri Iraq udashaka koherezwa mu Rwanda, cyatumye haboneka n’abandi bari mu bagiye koherezwa bamwe bandika basaba kutoherezwa nk’uko ibitangazamakuru binyuranye byabigarutseho.

Mu gihe indege yari yateguye gutwara abantu bagera ku 130 ku wa Kabiri, n’ubundi yahagaritswe abasigaye bagombaga kugezwa i Kigali bageze kuri barindwi. Ni mu gihe ibirego bya batanu muri bo byari byaramaze guteshwa agaciro n’inkiko zo mu Bwongereza.

Nyuma ni bwo ECHR yavuze ko nta mwimukira n’umwe ukwiye koherezwa mu Rwanda mu gihe cy’ibyumweru bitatu kugira ngo urukiko rubanze rusezumane ubwitonzi ibirego byatanzwe n’abimukira anyuranye.  

Umunyamabanga wa Leta ushinzwe Polisi, Itangazamakuru no kwakira abinjira mu Bwongereza Priti Patel, yavuze ko yashwenguwe cyane no kuba indege ya mbere itabashije guhaguruka arahirira gukurikirana iyo gahunda igashyirwa mu bikorwa mu maguru mashya.

Yagize ati: “Ntabwo tuzabuzwa gukora igikwiye no gushyira mu bikorwa gahunda zo kugenzura imipaka y’Igihugu cyacu. Itsinda ryacu ry’abanyamategeko ririmo gusuzuma ibyemezo byose byafashwe kuri iyi ndege kandi imyiteguro y’indege itaha yahise itangira.”

Yakomeje asobanura byimbitse ubufatanye u Rwanda n’u Bwongereza byashyizeho umukono mu bijyanye no gukemura ikibazo cy’abimukira giherewe mu mizi, biciye mu guhangana n’ubusumbane mu mahirwe aboneka, butuma abimukira bahunga ibihugu byabo.

Yavuze ko ayo masezerano yasinywe mu mezi abiri ashize hagamijwe gushyira iherezo ku bwimukira bushyira ubuzima bw’ababukora mu kaga, icuruzwa ry’abantu rikorerwa mu nzira banyuramo ndetse no guha amahirwe ababikwiye bari muri abo bambuka.  

Ati: “Kubona sitati y’ubuhunzi mu Bwongereza bikwiye kuba iby’ababikwiriye, atari abafite ubushobozi bwo kwishyura ababafasha kwambuka. Umutwaro byikoreza Guverinoma, ikiguzi cy’imisoro y’abaturage, ndetse n’ihohoterwa bikomeje kwiyongera, Abongereza bamaze kubirambirwa.”

Yakomeje avuga ko uretse kuba yababajwe n’icyemezo cy’urwo rukiko, yanatunguwe no kubona rwitambika mu gihe inkiko zo mu Bwongereza zose zaregewe zarasanze abimukira nta shingiro bafite, zikanzura ko nta mpamvu Igihugu kitafata inzira yo kwishakamo ibisubizo.

Umuvugizi wa Guverinoma y’u Rwanda Yolande Makolo, na we yashimangiye ko ibyabaye bidashobora guca intege gahunda y’Igihugu yo guharanira ko buri wese yabona uburenganzira busesuye bwo kubaho afite amahirwe asesuye.

Yagize ati; Natwe ntitwacibwa intege n’ibyabaye. U Rwanda ruracyiyemeje guharanira ko ubwo bufatanye bwashyirwa mu bikorwa. Ibihe by’abantu bakora ingendo zishyira ubuzima bwabo mu kaga ntibishobora gukomeza kuko bitera imibabaro itavugwa kuri benshi. U Rwanda rwiteguye kwakira abimukiraigihe cyose bazahagerera kandi bazabona umutekano, umutuzo n’amahirwe mu gihugu.”

Mu kiganiro n’abanyamakuru cyabaye ku wa 14 Kamena, Yolande makolo yashimangiye ko u Rwanda rufite ubunararibonye buhagije mu kwakira impunzi, abimukira n’abasaba ubuhungiro, aho boroherezwa kubona imibereho ibahesha ishema mbere y’uko berekeza mu bindi bice by’Isi bihitiyemo bikaba byemera kubakira.

Yavuze ko u Rwanda rumaze kwakira by’agateganyo abimukira n’abasaba ubuhungiro bagera ku 1,000 babagaho mu buzima buteye ubwoba muri Libya, kuri ubu bamaze kwakirwa n’ibindi bihugu bitandukanye.

Uretse n’abo, mu Rwanda habarurwa n’izindi mpunzi zisaga ibihumbi 120,000 zicubikiwe mu bice bitandukanye by’Igihugu, na zo zikaba zibona amahirwe azifasha kubaho zikoresha ubushobozi bwazo mu kwiteza imbere no gukorana n’imiryango baturanye mu guharanira iterambere ry’Igihugu.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA