Inkuba zishe abantu 20 mu Rwanda guhera muri Mutarama
Amakuru

Inkuba zishe abantu 20 mu Rwanda guhera muri Mutarama

NTAWITONDA JEAN CLAUDE

February 21, 2022

Hirya no hino mu Rwanda, kuva muri Mutarama uyu mwaka, inkuba zahitanye ubuzima bw’abaturage bagera kuri 20 bari kureka amazi, bugamye munsi y’ibiti cyangwa bari mu yindi mirimo.

Iyo mibare yatangajwe na Minisiteri ishinzwe Ibikorwa by’Ubutabazi (MINEMA), ikangurira abaturarwanda kwirinda ibikorwa byatuma bakubitwa n’inkuba muri ibi bihe bikomeje kurangwa n’imvura idasanzwe mu bice byose by’Igihugu.  

Mu butumwa Minema yanyujije ku mbuga nkoranyambaga yagize iti: “[…] Twirinde kandi tubishishikarize abandi.”

Ku rundi ruhande, Ikigo cy’Igihugu gishinzwe Ubumenyi bw’Ikirere (Meteo Rwanda) cyatangaje  ko igice cya gatatu cy’ukwezi kwa Gashyantare 2022 (kuva taliki ya 21 kugeza kuya 28), mu Rwanda hateganyijwe ko imvura izagabanyuka ugereranyije n’igice cya kabiri cya Gashyantare 2022.

Imvura nyinshi iteganyijwe gukomeza kugwa mu bice bimwe by’igihugu kandi ikazaba iri hejuru y’ikigero cy’impuzandengo y’imvura isanzwe igwa mu gice cya gatatu cy’ukwezi kwa Gashyantare mu Rwanda.

Imvura iteganyijwe izaba iri hagati ya milimetero 40 na 160 mu gihe impuzandengo y’imvura isanzwe igwa muri iki gice iri hagati ya milimetero 10 na 50.

Mu Ntara y’Iburengerazuba n’iy’Amajyepfo hateganyijwe imvura nyinshi iruta izagwa ahandi naho imvura nke ugereranyije n’ahandi iteganyijwe mu bice byinshi by’Akarere ka Nyagatare.

Iminsi imvura izagwamo izaba iri hagati y’iminsi ibiri (2) n’iminsi itanu (5) ikazaboneka cyane cyane hagati y’italiki 24 na 28 Gashyantare 2022. Iyi mvura ikazaturuka ku nkubi y’umuyaga iherereye mu gice cy’epfo cy’inyanja y’Abahinde ituma imiyaga ituruka mu ishyamba rya Kongo izana ubuhehere bw’umwuka mu majyepfo y’akarere u Rwanda ruhereyemo.

Abaturarwanda barakangurirwa gukumira Ibiza

Bitewe n’imvura nyinshi imaze iminsi igwa, ubutaka bwamaze kubika amazi menshi. Ahateganyijwe imvura nyinshi n’umuyaga mwinshi hashobora kuba ibiza byiganjemo imyuzure, inkuba n’inkangu.

Meteo Rwanda iragira inama inzego zifite mu nshingano zazo gukumira ibiza n’abatuye ahateganyijwe imvura nyinshi gufata ingamba zo gukumira no guhangana n’ibiza.

Abahinzi n’abafatanyabikorwa mu buhinzi na bo baragirwa inama yo gukomeza ibikorwa by’igihembwe cy’ihinga 2022B banashyira mu bikorwa ingamba zo kurwanya isuri.

Uko imvura iteganyijwe mu gihugu Imvura nyinshi iri hagati ya milimetero 120 na 160 iteganyijwe mu Ntara y’Iburengerazuba n’iy’Amajyepfo ukuyemo Akarere ka Nyabihu, amajyaruguru y’Akarere ka Rubavu n’iburasirazuba bw’Akarere ka Kamonyi.

Imvura iringaniye iri hagati ya milimetero 80 na 120 iteganyijwe mu Mujyi wa Kigali, mu Ntara y’Amajyaruguru ukuyemo iburasirazuba bw’Akarere ka Musanze, mu Turere twa Nyabihu, Bugesera, Ngoma na Kirehe, mu bice bisigaye by’Uturere twa Rubavu na Kamonyi, mu majyepfo y’Uturere twa Rwamagana na Kayonza no mu bice biherereye mu burengerazuba bw’Uturere twa Gatsibo na Nyagatare.

Imvura iringaniye iri hagati ya milimetero 40 na 80 iteganyijwe mu bice bisigaye by’Uturere twa Musanze, Rwamagana, Nyagatare, Gatsibo na Kayonza.

Umuyaga uteganyijwe

Umuyaga uringaniye ushyira umuyaga mwinshi, ufite umuvuduko uri hagati ya metero 4 na 8 ku isegonda ni wo uteganyijwe mu Rwanda mu gice cya gatatu cya Gashyantare 2022.

Umuyaga uringaniye ufite umuvuduko uri hagati ya metero 4 na 6 ku isegonda uteganyijwe mu Mujyi wa Kigali no mu Turere twa Rwamagana, Ngoma, Rutsiro, mu burasirazuba bw’Uturere twa Nyagatare, Bugesera, Gatsibo, Kamonyi na Nyamasheke, mu burengerazuba bw’Uturere twa Karongi na Kirehe no mu majyepfo y’Uturere twa Rubavu na Rulindo.

Ibice byose bisigaye biteganyijwemo umuyaga mwinshi ufite umuvuduko uri hagati ya metero 6 na 8 ku isegonda.

Ubushyuhe buteganyijwe

Mu gice cya gatatu cy’ukwezi kwa Gashyantare 2022, hateganyijwe ubushyuhe bwinshi buri hagati ya dogere Selisiyusi 18 na 28 mu Rwanda.

Intara y’Iburasirazuba, Umujyi wa Kigali, Intara y’Amajyepfo ukuyemo Uturere twa Nyamagabe na Nyaruguru, mu Karere ka Rusizi no mu majyepfo y’Intara y’Amajyaruguru ni ho hateganyijwe ubushyuhe bwinshi ku gipimo kiri hagati ya dogere Selisiyusi 24 na 28 naho mu bice bisigaye by’Intara y’Amajyaruguru, Amajyepfo n’iy’Iburengerazuba ni ho hateganyijwe ubushyuhe buke buri ku gipimo kiri hagati ya dogere Selisiyusi 18 na 24.

Ubushyuhe buteganyijwe buri munsi (ni bucye) y’ikigero cy’ubushyuhe busanzwe bw’ukwezi kwa Gashyantare igice cya gatatu.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA