Intumwa za Barbados zaje gutsura umubano n’u Rwanda
Amakuru

Intumwa za Barbados zaje gutsura umubano n’u Rwanda

NTAWITONDA JEAN CLAUDE

May 31, 2022

Nyuma y’uruzinduko Perezida wa Repubulika y’u Rwanda Paul Kagame yagiriye muri Barbados muri Mata 2022, intumwa zoherejwe n’icyo Gihugu ziri mu Rwanda aho zaje kunoza ubutwererane bw’ibihugu byombi. 

Ku wa Mbere taliki ya 30 Gicurasi ni bwo iryo tsinda riyobowe na Minisitiri w’Ubucuruzi Davidson Ishmael, ryakiriwe n’Umuyobozi Mukuru wa RDB Clare Akamanzi, rikaba ririmo gusangira ubumenyi n’inzego zo mu Rwanda. 

Mu biganiro byabaye nyuma yo kwakira abo bashyitsi hibanzwe ku kungurana ibitekerezo mu nzego zitandukanye zirimo guteza imbere ubukerarugendo na serivisi z’imari. 

Barbados ni igihugu giherereye mu Birwa bya Karayibe, kikaba kiri ku mwanya wa 52 mu bihugu bifite Umusaruro Mbumbe (GDP) uri hejuru, ndetse n’ubukungu bwacyo bukaba bushingiye ku bintu bitandukanye.

Raporo ya Banki y’Isi igaragaza ko Barbados ari kimwe mu bihugu 83 bifite ubukungu bwateye imbere ku Isi. 

Iryo tsinda ryasuye u Rwanda rigizwe n’abarimo Umuyobozi w’Ikigo cy’Ishoramari n’Iterambere muri Barbados Mark Hill, n’Umuyobozi w’Ikigo giteza imbere ishoramari (Invest Barbados) Kaye Brathwaite.

Abo bayobozi bahawe ubutumire bwo kuzitabira Inama y’Ubucuruzi izahuza abaturutse mu Muryango w’Ibihugu bikoresha Icyongereza (Commonwealth) yitezwe taliki ya 21-23 Kamena 2022, mu Nama y’Abakuru b’Ibihugu na Guverinoma bo muri Commonwealth (CHOGM2022).

Biteganyijwe ko abo bashyitsi bakomeza guhura n’abandi bayobozi mu nzego zitandukanye z’u Rwanda haba iza Leta no mu rwego rw’Abikorera.

Mu gihe u Rwanda na Barbados byatangiye urugendo rw’ubufatanye mu guharanira iterambere, ibihugu byombi byiteze inyungu ziremereye zigera ku baturage b’ibihugu byombi. 

Icyo gihugu gifite abafatanyabikorwa mu bucuruzi harimo Canada, ibihugu bya Karayibe (by’umwihariko Trinidad na Tobago), u Bwongereza na Leta Zunze Ubumwe z’Amerika. 

Mu gihe ubufatanye n’u Rwanda bukomeje  kongerwamo ikibatsi, isoko ry’abikorera mu Rwanda rizaba ribonye amahirwe yagukiye muri ibyo bihugu. 

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA