Inyungu z’ubucuruzi mu bufatanye bw’u Rwanda na Tanzania 
Amakuru

Inyungu z’ubucuruzi mu bufatanye bw’u Rwanda na Tanzania 

ZIGAMA THEONESTE

March 16, 2024

Guverinoma y’u Rwanda n’iya Tanzania baherutse kwemeranya ubufatanye butajegajega mu guteza imbere ishoramari mu nzego zitandukanye zirimo ubuhinzi, ubucuruzi, mu ikorabuhanga n’itumanaho n’izindi.

Ni nyuma y’uruzinduko rw’iminsi 4 Minisitiri w’Ububanyi n’Amahanga n’Ubutwererane bw’Afurika y’Iburasirazuba January Makamba aheruka kugirira mu Rwanda.

Minisitiri w’Ubuhinzi n’Ubworozi mu Rwanda Dr. Musafiri Ildephonse, yavuze ko ibihugu byombi bigiye gushyiraho uburyo buhamye bwo gufatanya mu iterambere.

Dr Musafiri mu kiganiro n’itangazamakuru yagize ati: “Iki ni igihe cyo gukora cyane. Twe nk’ibihugu bibiri dushobora gushyiraho komisiyo ihoraho ishinzwe kugenzura ishyirwa mu bikorwa ry’igenamigambi twihaye.”

Yatangaje kandi ko hari amasezerano ari mu ngeri eshatu yasinywe agamije guteza imbere urwego rw’ubuhinzi mu bihugu byombi akaba amwe akiri mu mishinga itaratangira.

Ati: “Ayo masezerano arabisobanura neza. Dufite amahirwe yo gukora ubushakashatsi bugamije guteza imbere ibintu byinshi muri uru rwego nk’uburyo bwo gutubura imbuto, ndetse no kumenya umuceri wera cyane kandi ibi bizagira inyungu ku Rwanda.”

Minisitiri Dr Musafiri yakomeje avuga ko icyo bisaba ari ukwihutisha ishyirwa mu bikorwa ry’ayo masezerano ibihugu byombi byasinyanye, ndetse hakanashyirwamo imbaraga zihagije zishingiye ku gusangira ubumenyi by’umwihariko ku bijyane n’inganda zitunganya umusaruro w’amata.

Yagize ati: “Bafite (Tanzania) ubutaka bunini, ariko ubuhinzi bwabo ntabwo buratera imbere. Dushobora gushingira kuri ibyo tukanafasha kompanyi z’ubucuruzi kububyaza umusaruro”.

Rwanda na Tanzania bikomeje kwimakaza ubufatanye mu bucuruzi, by’umwihariko Tanzania ni igihugu kinini kandi gikora ku Nyanja mu gihe gihana imbibi n’ibihugu bidakora ku nyanja muri byo harimo n’u Rwanda.

Ibicuruzwa byinshi byinjizwa mu Rwanda biva mu mahanga binyuzwa ku cyambu cya Tanzania. U Rwanda ni igihugu cya gatatu mu bihugu byakira ibicuruzwa byinshi binyuzwa ku cyambu cya Dar Es Salaam cyo muri Tanzania gikora ku nyanja.

Imizigo isaga 80% yinjizwa mu Rwanda, iba yanyujijwe kuri icyo cyambu.

Minisitiri w’Ububanyi n’Amahanga wa Tanzania, Makamba ubwo yasozaga uruzinduko rwe mu Rwanda, tariki ya 14 Werurwe 2024, yatangaje ko nyuma yo guhura na Perezida Paul Kagame bakaganira, bizeye ubufatanye buzageza igihugu cye ku iterambere.

Yagize ati: “U Rwanda ni igihugu cya kabiri mu bihugu bikomeye by’abafatanyabikorwa ba Tanzania mu bucuruzi. Twizeye tudashidikanya ko kigiye kuza ku mwanya wa mbere. Tugiye kugira icyo tubikoraho.”

Minisitiri Makamba yaje mu Rwanda ayoboye itsinda ry’Abaminisitiri muri Minisiteri za Tanzania zirimo Ikoranabuhanga, Ubucuruzi, Ingufu n’Ubuhinzi n’izindi.Uretse guhura na Perezida Kagame yanahuye na ba Minisitiri b’u Rwanda b’Ububanyi n’Amahanga, Ubucuruzi n’Inganda, Ikoranabuhanga na Inovasiyondetse n’Iy’Ubuhinzi n’Ubworozi.

Kuba u Rwanda ari urwa kabiri mu bihugu bifatanya cyane na Tanzania mu by’ubucuruzi bituma habaho amahirwe menshi yo kwihutisha no koroshya ubucuruzi buhuriweho. Mu rwego rw’ubuhinzi, ubukerarugendo, itangazamakuru n’itumanaho, bakorana mu rwego rwo kwihutisha ibikorwa byo muri izo nzego, bikorwa n’abaturage b’ibihugu byombi.

Ni ibihugu bimaze igihe kirekire bikorana mu by’ubucuruzi, aho Kompanyi ya Bakhresa Grain Milling yo muri Tanzania, imaze imyaka isaga 15 ikorera mu Rwanda, hari na guhanda yo gutangiza METL Group ikora ibijyanye no gutunganya amafunguro no kuyapfunyika hagamijwe kongera ubucuruzi bwambukiranya imipaka hagati y’ibihugu byombi.

METL ni Kompanyi y’ubucuruzi y’Umuherwe w’Umunyatanzania Mohammed Dewji akaba afite inganda zitandukanye, yamaze gutangaza ko agiye kuyitangiza mu Rwanda.

Inkindi Philbert, umuyobozi ushinzwe ubucuruzi muri Kompanyi ya  Dubai Ports World Rwanda,yavuze ko gufatanya na Tanzania bizafasha ibihugu byombi gukora ubucuruzi bwambukiranya imipaka mu buryo bworoshye.

Inkindi ahamya ko ubutaka u Rwanda rwahawe na Tanzania bwa Isaka buzakoreshwa nk’ibyambu byo ku butaka bifasha u Rwanda mu rwego rw’ibikorwa remezo byoroshya ubucuruzi.

Yavuze ko kandi bizagabanya ikiguzi cyo gutwara ibicuruzwa ndetse n’amafaranga atari ngombwa yagenderaga mu bikoresho byifashishwaga mu gupakurura ibicuruzwa, mu gihe bigeze ku cyambu cya Dar Es Salaam akaba yavaho.

Ati: “Ubu gutwara ibicuruzwa ni ikiguzi cy’amadolari 3,800 yo gutwara umuzigo umwe uwuvanye ku cyambu cya Dar Es Salaam uzanye i Kigali. Ni mu gihe umuzigo uvanwa ku cyambu cya Isaka ugezwa i Kigali ku kiguzi cy’amadolari 2000.

U Rwanda na Tanzania bemeranyije gufatanya kubaka umupaka mushya wa Kyerwa, uzubakwa mu burusirazuba bw’u Rwanda, mu rwego rwo koroshya urujya n’uruza rw’ibicuruzwa n’urw’abaturage.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA