IRONMAN 70.3 Rwanda 2023: Abakinnyi barenga 300 ni bo biyandikishije kuzitabira irushanwa
Amakuru

IRONMAN 70.3 Rwanda 2023: Abakinnyi barenga 300 ni bo biyandikishije kuzitabira irushanwa

Imvaho Nshya

August 2, 2023

Taliki 05 Kanama 2023 mu Karere ka Rubavu mu Ntara y’Iburengerazuba hazabera irushanwa ryo ku rwego mpuzamahanga mu mukino wa Triathlon “IRONMAN 70.3 Rwanda 2023”.

Muri iri rushanwa rigiye kuba ku nshuro  ya kabiri abazitabira bagomba guhatana mu mikino itatu ikomatanyije  ari yo Koga “Swimming”, Kunyonga igare “Cycling” no Kwiruka n’amaguru “Running” aho basoza bakoze intera  ya kilometero 113 zirimo kilometero 1,9 (Koga), kilometero 90 (Kunyonga igare) na kilometero 21.1 (Kwiruka n’amaguru).

Umuyobozi mukuru wa Global Events Africa itegura iri rushanwa, Mutoni Bonita atangaza ko    irushanwa riheruka ryari ribaye ku nshuro ya mbere ryagenze neza  akaba yizeza ko uyu mwaka rizagenda neza kurushaho kuko imyiteguro  irimo kugenda neza.

Ubwo iri rushanwa ryabaga ku nshuro ya mbere umwaka ushize taliki 14 Kanama 2022 ryitabiriwe n’abakinnyi basaga 200 bari baturutse mu bihugu 37. Muri uyu mwaka nk’uko bitangazwa na Mutoni Bonita ubu abiyandikishije  barasaga 300.

Iri rushanwa kandi rihuzwa n’ubukerarugendo kuko uretse guhatana, abitabiriye yaba abakinnyi   ndetse n’ababaherekeje bafata umwanya bagasura ibyiza bitandukanye bitatse u Rwanda.

Umuyobozi ushinzwe Ubukerarugendo no kurengera ibidukijije mu Rwego rw’Igihugu rw’Iterambere “RDB”, Kageruka Ariella bishimira gufatanya n’inzego zitandukanye mu gutegura iki gikorwa gihuza abantu benshi kuko biri muri gahunda bihaye yo guteza imbere ubukerarugendo bushingiye kuri Siporo.

Mu bazahatana muri “IRONMAN 70.3 Rwanda 2023” harimo n’abakinnyi b’u Rwanda basanzwe bakina umukino wa Triathlon.

Perezida w’ishyirahamwe ry’umukino wa Triathlon mu Rwanda “RTF”, Mbaraga Alex avuga ko abakinnyi baserukira u Rwanda ari 20 kandi bamaze iminsi bitegura bakaba bizera ko bazitwara neza nk’uko byagenze mu irushanwa riheruka.

Mbaraga atangaza ko kwakira neza irushanwa nk’iri bikagenda neza biha u Rwanda amahirwe yo kuzakira shampiyona y’Isi.

Berber Kramer wegukanye irushanwa mu bagore

Umuyobozi w’agateganyo w’Akarere ka Rubavu, Nzabonimpa Deogratias agaragaza ko biteguye kwakira  neza abazaza babagana bose  anashimira kandi abategura iri rushanwa  kuba baratekereje ko ryabera i Rubavu kuko ni hamwe mu hari ibyiza nyaburanga bikurura ba mukerarugendo nk’ikiyaga cya Kivu n’ibindi.

Umunyamabanga Uhoraho muri Minisiteri ya Siporo ” MINISPORTS”,  Niyonkuru Zephanie  agaragaza  ko iterambere ry’uyu mukino rifite uruhare mu bukungu bw’igihugu ndetse no muri siporo by’umwihariko.

Akomeza avuga ko ari umwanya mwiza ku bakinnyi b’u Rwanda kwerekana impano zabo ndetse no guhatana kuko iri rushanwa ritanga itike yo kuzitabira shampiyona y’Isi muri 2024.

Uko isigamwa rizagenda

Abazitabira irushanwa rya “IRONMAN 70.3 Rwanda 2023” bazabanza gusiganwa mu Koga “Swimming” mu Kiyaga cya Kivu mu ntera ya kilometero 1,9. Nyuma bazakurikizaho gusiganwa ku igare “Cycling” mu ntera ya kilometero 90 aho bazahera kuri Kivu Beach-Gorilla Hotel- ku Karere Ka Rubavu- Ihuriro rya Merez- Tam Tam- – Brasserie- Kigufi- Gaz Methane (Guhindukira) bazakora inshuro 4.

Nyuma yo gusiganwa n’igare bazasoza basiganwa ku maguru mu ntera ya kilometero 21.1 aho bazava Kivu Beach – Gorilla Hotel – Nyanja- Grande Barrière – La Corniche – CSS- Pariquet- RRA (bagaruke ) aha bazahazenguruka inshuro 3.

Iri rushamwa ritegurwa na Global Events Africa ifatanyije na RDB binyuze muri gahunda ya Visit Rwanda bakaba bafatanya kandi na MINISPORTS, Akarere ka Rubavu, RCB, RCT, RTF naho abaterankunga ni  Bralirwa binyuze mu kinyobwa cyayo ” Cheetah Energy, Inyange Water, Purifayaa na Winnaz.

Ubwo iri rushanwa riheruka muri 2022, mu bagabo, Ilya Slepov ukomoka mu Burusiya ni we witwaye neza  yegukana iri siganwa aho muri ibi bice byose yasoje akoresheje amasaha 4, iminota 25 n’amasegonda 24.

Muri iki cyiciro, abakinnyi b’Abanyarwanda bitabiriye ni 9 aho Tuyisenge Samuel ukinira ikipe ya CS Karongi ari we witwaye neza kuko yasoreje ku mwanya wa 7 akoresheje amasaha 4, iminota 54 n’amasegonda 2.

Mu bagore, Berber Kramer ukomoka mu Buholandi ni we wegukanye umwanya wa mbere aho yakoresheje  amasaha 5, iminota 8 n’amasegonda 52.  Umukinnyi w’Umunyarwanda, Uwineza Hanani yasoreje ku mwanya wa  8 aho yakoresheje amasaha 6, iminota 13 n’amasegonda 24 .

Umunyamabanga Uhoraho muri MINISPORTS”, Niyonkuru Zephanie
Umuyobozi w’agateganyo w’Akarere ka Rubavu Nzabonimpa Deogratias
Perezida wa RTF, Mbaraga Alexis

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA