U Bufaransa bwatangiye gucyura abaturage babwo babaga muri Isiraheli
Mu Mahanga

U Bufaransa bwatangiye gucyura abaturage babwo babaga muri Isiraheli

Imvaho Nshya

October 12, 2023

U Bufaransa bwatangiye gucyura abaturage babwo ba mbere kuri uyu wa Kane kubera intambara hagati ya Isiraheli na Palestine. Indege ya Air France, kuri uyu wa Kane yatangiye gucyura abenegihugu bagaragaye nk’abatishoboye kurusha abandi b’Abafaransa babaga muri Isiraheli.

Kuri ubu, ibihugu byinshi by’u Burayi byatangiye ibikorwa byo gucyura abaturage babyo bari bari muri Isiraheli.

Bisabwe na Minisiteri y’Ububanyi n’Amahanga y’u Bufaransa ni bwo indege ya Air France yateguye uko gutaha. Iyo ndege ifite imyanya 380.

Irahaguruka ku kibuga cy’indege cya Ben-Gurion i Tel Aviv ijyanye Abafaransa ku isaha ya saa yine n’iminota 40 z’ijoro kuri uyu wa Kane, tariki ya 12 Ukwakira, yerekeje ku kibuga cy’indege cya Paris Charles de Gaulle.

Abagenzi bagaragaye nk’abatishoboye kurusha abandi mu benegihugu b’Abafaransa banyura kandi baba muri Isiraheli, harimo abana bato, abagore batwite, abasaza n’abafite ubumuga cyangwa abarwayi barembye.

Imibare iheruka gutangazwa igaragaza ko abenegihugu b’u Bufaransa bagera ku 62.000 biyandikishije mu Biro by’uhagarariye inyungu z’u Bufaransa i Tel Aviv naho 25.000 biyandikishije mu Biro by’uhagarariye inyungu z’u Bufaransa i Yeruzalemu. Abafaransa benshi bariteguye kandi kuri ubu bahageze. Bivugwa ko abasabye gutaha barenga 4 000.

Indege ya mbere irahaguruka  iri joro. Kuva ejo ku wa Gatanu tariki ya 13 Ukwakira, izindi ndege zidasanzwe zizategurwa hagati ya Isiraheli n’u Bufaransa, nk’uko Quai d’Orsay yabitangaje muri iki gitondo, ariko mu ntangiriro haherewe ku bantu bugarijwe n’ibibazo.

Abafaransa 12 barishwe

Raporo iheruka gutangwa na Minisiteri y’Ububanyi n’Amahanga ivuga ko nibura Abafaransa cumi na babiri bapfiriye muri Isiraheli mu gitero kinini cyagabwe n’umutwe w’abayisilamu bo muri Palesitine naho 17 baburirwa irengero, barimo abana benshi, bishoboka ko bashimuswe.

Umuvugizi wa Minisiteri y’Ububanyi n’Amahanga y’u Bufaransa, Anne-Claire Legendre, yibukije ko kuri uyu wa 12 Ukwakira, u Bufaransa ari cyo gihugu cyonyine cy’u Burayi gifite ikigo mu karere ka Gaza ndetse ko Abafaransa icumi, cyane cyane abakozi bashinzwe ubutabazi, bari muri kariya gace.

Yagize ati: “Turimo kuvugana na buri wese muri bo”. Yakomeje asobanura ko bose badashaka kuva mu karere ka Gaza.

NYIRANEZA JUDITH

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA