Isomwa ry’urubanza ruregwamo Rusesabagina ryimuriwe ku ya 4 Mata
Amakuru

Isomwa ry’urubanza ruregwamo Rusesabagina ryimuriwe ku ya 4 Mata

Imvaho Nshya

March 21, 2022

Urukiko rw’Ubujurire rwasubitse isomwa ry’urubanza ruregwamo Paul Rusesabagina na bagenzi be 20 rwemeza ko byatewe n’uko iminsi 30 bari bihaye yo kurwandika yarangiye batararangiza kubikora.

Guhera saa tatu za mugitondo (09:00 AM) ni bwo isomwa ry’urubanza rwa Rusesabagina n’abo areganwa na bo ryari riteganyijwe, ariko riza gusubikwa nyuma yo gusoma imyirondoro y’ababurana no kugenzura ko bitabiriye muri iryo somwa ryari gukorwa hifashishijwe ikoranabuhanga.

Umucamanza yagize ati: “Uru rubanza ntirushoboye gusomwa uyu munsi kuko igihe cy’iminsi 30 cyo kurwandika urukiko rwari rwihaye hakurikijwe ibiteganywa n’itegeko No 027/2019 ryo ku wa 19/09/2019 ryerekeye imiburanishirize y’imanza z’inshinjabyaha mu ngingo yaryo ya 138 cyabaye gito ugereranyije n’ubunini bwa dosiye ndetse n’umubare munini w’abaregwa n’abaregera indishyi. “

Uru rukiko rwavuze ko uru rubanza ruzasomwa tariki ya 4 Mata 2022 saa tatu za mugitondo (9:00 AM).

Ku wa 17 Mutarama 20222 ni bwo Urukiko rw’Ubujurire rwatangiye kuburanisha ubujurire mu rubanza ruregwamo Paul Rusesabagina, Nsabimana Callixte ‘Sankara’ na bagenzi babo 19 bahamijwe ibyaha bifitanye isano n’iterabwoba.

Ubujurire bwatanzwe ku ruhande rw’abaregwa n’ubushinjacyaha, bose bagaragazaga ko batishimiye bimwe mu bihano byatanzwe n’Urugereko rwihariye rw’Ukiko Rukuru rushinzwe kuburanisha ibyaha by’iterabwoba n’ibyambuka imipaka.

Rusesabagina, ubushinjacyaha buvuga ko ari mu bahawe ibihano bidakwiranye n’uburemere bw’ibyaha byamuhamye, ntiyitabye iburanisha mu bujurire nk’uko yabigenje mu mwaka ushize ubwo yikuraga mu rubanza avuga ko nta butabera yiteze kubona mu nkiko z’u Rwanda.

Ubushinjacyaha bwasobanuye ko Rusesabagina ufungiwe muri Gereza ya Mageragere yanze gusinya ku nyandiko yahawe n’Ubuyobozi bwa gereza imuhamagaza kuzaburana kuri uyu wa Mbere, aho ngo avuga ko yahamagawe mu buryo bunyuranyije n’amategeko.

Bivugwa ko yahamagajwe mu buryo bwubahirije amategeko, kuko ngo inyandiko yanditswe n’Umwanditsi Mukuru w’Urukiko Rusesabagina yagombaga gushyiraho umukono, yayishyikirijwe tariki 17 Ukuboza 2021.

Urukiko rwanzuye ko urubanza rukomeza, rukaba rwaraburanishijwe muri icyo gihe kigera ku mezi abiri. Kwandika imyanzuro y’uru rubanza bisaba ubushishozi n’ubwitonzi kuko abaregwa ari benshi ndetse n’ingingo zivugwamo zikaba zitandykanye bitewe n’ukoubushinjacyaha, abaregwa n’abaregera indishyi basabaga ibintu bitandukanye

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA