Ubuyobozi bw’Ishyaka Riharanira Ubumwe bw’Abanyarwanda na Demokarasi, UDPR, bwatangaje ko tariki ya 4 Nyakanga 1994 ari bwo urugamba rwo guhagarika Jenoside yakorerwaga Abatutsi icyarimwe no kubohora igihugu rwashyizweho akadomo, ari na bwo u Rwanda rwazukiyeho. 

Ishyaka UDPR rishima ibimaze kugerwaho mu myaka 32 u Rwanda rumaze rubohowe n’Ingabo zari iza FPR–Inkotanyi, zinahagarika Jenoside yakorewe Abatutsi mu 1994. Aha ni ho iri shyaka rihera rivuga ko tariki 04 Nyakanga 1994 ari umunsi u Rwanda rwazukiyeho.

Ubutumwa bwa UDPR kuri uyu munsi u Rwanda rwizihiza umunsi wo kwibohora ku nshuro ya 32, bugira buti: “Itariki ya 4 Nyakanga, ni itariki u Rwanda rwazukiyeho, ntikiri itariki gusa kuko yabereye Abanyarwanda bose urwibutso rwo guhitamo umunsi ku wundi kwihesha agaciro, ubumwe, no guharanira ejo hazaza heza h’igihugu cyacu. Umunsi wo kwibohora ni isabukuru y’intsinzi mu mutekano, mu kwibohora politiki ya mpatsibihugu, no kwimakaza iterambere rirambye.”

Ishyaka UDPR ryavuze ko muri Gahunda y’Igihugu yo Kwihutisha Iterambere (NST1, 2017–2024) ibipimo bigaragazaga ko Abanyarwanda bageze kuri byinshi; Ubukungu bw’Igihugu bwiyongereyeho 7% buri mwaka, abaturage bafite amashanyarazi bageze kuri 76.3%, icyizere cyo kubaho ku munyarwanda cyageze ku myaka 69.9, hubatswe  imihanda, amashuri, amavuriro n’inganda n’ibindi. 

Ikiganiro Perezida wa UDPR, Depite Nizeyimana Pie, yahaye ‘Imvaho Nshya’ yagize ati: “Ibi byabaye intangiriro nziza ya Gahunda ya kabiri y’Igihugu yo Kwihutisha Iterambere (NST2, 2024–2029) igamije gushyiraho imirimo myiza kandi itanga umusaruro, kugabanya igwingira n’imirire mibi, kongera ireme rya serivisi zitangwa n’inzego za Leta, kuzamura ireme ry’uburezi no kongera ibyoherezwa mu mahanga. Ibi ni ibimenyetso by’uko kwibohora ari urugendo rukomeje, bityo inshingano za buri munyarwannda ni ukubungabunga ibyagezweho no kubyongera mu bwinshi no mu bwiza.”

Ishyaka UDPR rirashimira Perezida wa Repubulika, Paul Kagame, n’Intwari zose zitanze mu rugamba rwo kubohora Igihugu no guhagarika Jenoside yakorewe Abatutsi mu 1994, rinashimira kandi Ingabo z’u Rwanda (RDF) n’izindi nzego z’umutekano zikomeje kurinda umutekano w’Igihugu n’abaturage. 

Ishyaka UDPR rivuga ko ritewe ishema n’ibikorwa byiza by’Inzego z’umutekano z’u Rwanda zikora, birenga imbibi z’igihugu bikagera mu bindi bihugu byugarijwe n’intambara cyangwa ibiza. Rishimira Abanyarwanda bose buzuza inshingano zabo mu murava n’ubunyangamugayo, bagakomeza kubaka Igihugu mu bumwe n’ubudaheranwa. Uku akaba ari ko kwibohora nyakuri.

Ba uwa mbere mu kumenya amakuru agezweho!!!