Imikino ya League Phase muri UEFA Champions League yongeye gukinwa, yasize Rutahizamu w’Ikipe y’Igihugu y’u Rwanda, Joy-Lance Mickels akoze amateka yo kuba Umunyarwanda wa mbere watsinze igitego na ho Manchester United itsindwa na Atlético Madrid ibitego 2-0.

Mu ijoro ryo ku wa Kabiri, tariki ya 13 Ukwakira 2026, ku bibuga bitandukanye hakinwe imikino y’irushanwa rihuza  amakipe yitwaye neza mu bihugu byayo i Burayi.

Umukino wari utegerejwe n’Abanyarwanda ni uwa Sabah Baku yo muri Azerbaijan ikinamo rutahizamu w’Ikipe y’Igihugu y’u Rwanda ‘Amavubi’, Joy-Lance Mickels na SK Slavia Prague yo muri Repubulika ya Tchèque.

Uyu mukinnyi yanditse amateka yo gutsinda igitego cya mbere muri UEFA Champions League, anafasha ikipe ye ya Sabah FK yo muri Azerbaijan, gutsinda SK Slavia Prague yo muri Czech ibitego 2-0.

Ni igitego yatsinze ku munota wa 88, cyiyongera ku cya Kaheem Parris, cyagiyemo ku munota wa 49, bahesha ikipe yabo amanota atatu ya mbere mu mikino ya League Phase.

Uyu mukinnyi yakoze amateka yo kuba umukinnyi wa mbere w’Umunyarwanda utsinze igitego mu mikino ya UEFA Champions League.

Joy-Lance Mickels wanabaye umukinnyi mwiza w’umukino, yashimiye bagenzi be bamufashije kugera ku gihembo yahoze arota kuzabona mu rugendo rwe rw’umupira w’amaguru.

Imikino wakinywe ku wa kabiri, yasize Manchester United y’abakinnyi 10 itsinzwe na Atlético Madrid ibitego 2-0 byatsinzwe na Pablo Barrios na Ademola Lookman, mu gihe Leny Yoro yeretswe ikarita itukura ku munota wa 74.

Uko indi mikino yakinwe ku wa Kabiri:

Arsenal 3-0 Lille

Galatasaray 1-4 FC Barcelone

Viking 3-3 Bayern Munich 

Inter Milan 3-4 Club Brugge

RB Leipzig 1-0 PSV Eindhoven 

Villarreal 3-1 Napoli

Sabah FC 2-0 Slavia Praha 

Lens 0-2 Sporting CP

Ba uwa mbere mu kumenya amakuru agezweho!!!