Kayonza: Guhumbika imbuto byabakuye mu bushomeri
Amakuru

Kayonza: Guhumbika imbuto byabakuye mu bushomeri

Imvaho Nshya

July 10, 2023

Urubyiruko rwo mu Karere ka Kayonza rugaragaza ko kuba rukora mu buhumbikoro bw’imbuto ziribwa, byatumye rwunguka ubumenyi birufasha no kwiteza imbere.

Ubwo buhumbikiro bugirwamo uruhare n’umushinga ugamije kuhira no kubungabunga amabanga y’imisozi mu Karere ka Kayonza (KIIWP), uterwa inkunga n’Ikigega Mpuzamahanga gishinzwe iterambere ry’ubuhinzi n’ubworozi (IFAD), ukorera muri Minisiteri y’Ubuhinzi n’Ubworozi, mu Kigo kiyishamikiyeho cyo guteza imbere ubuhinzi n’ubworozi RAB.

Niyonkuru Sammuel ukora mu buhumbikoro bw’imbuto avuga ko byamuteje imbere.

Yagize ati: “Mbere yo kubona akazi hano ubushomeri bwari bumumereye nabi, nirirwaga ku isanteri mpazerera, ari ugutembera gusa, ariko aho akazi kabonekeye naratinyutse nza mu bandi ndakorwa, mbasha kwiteza imbere.

Mvuye ku isantere nageraga mu rugo singire icyo nkora, nkimenya, kuza hano nahungukiye inama zo gukora, ubumenyi ndetse no kwizigama. Igihe nabaga ndimo nirukanka ntacyo nabaga mfite, nacunganaga n’imyenda yo kwambara none ubu ndayifite hari igihe ntayo nabaga mfite, ariko ubu  mba nshungana. Mfite intego yo kubaka”.

Mukandayisenga Claudine utuye mu Murenge wa Rwinkwavu, yavuze ko gukora mu buhumbikiro byamufashije kwiteza imbere akaba yarabashije kwigurira itungo.

Ati: “Gukora hano njye nk’umukobwa mpari mu buryo bwo kwiteza imbere n’abakobwa dushoboye gushaka amafaranga, dushobora kuba twakwiteza imbere. Mu mafaranga mpwmbwa hano naguzemo ihene”.

Singirankabo Theogene umutekinisiye mu buhumbikiro buherereye mu Murenge wa Mwiri, mu Mudugudu wa Gasarabwayi, yasobanuye ko umushinga KIIWP waje kuhategurira ingemwe z’imbuto ziribwa hagamijwe guhangana n’imirire mibi ndetse no kwiteza imbere.

Ati: “Umushinga KIIWP waje kuhategurira ingemwe z’imbuto ziribwa kugira ngo bazazikwirakwize mu bahinzi hagamijwe kurwanya imirire mibi no kuzamura umurynago muri rusange. Uruhare rw’umushinga wabahaye ubumenyi, umaze kubaha ubumenyi ubaha akazi, amafaranga bahawe bakayashyira mu bikorwa by’iterambere.

Twatangiranye cyane cyane n’urubyiruko, muri rusange mu iterambere ryabo hari byinshi bimaze kubagezaho, amafaranga bagenda bahembwa hari abaguzemo amatungo, abaguzemo imashini zidoda banakuyemo ubumenyi, ku buryo nyuma ashobora kuba nawe yakora ubwe buhumbikiro akaba yacuruza izi mbuto, kuko ku isoko zirakenerwa cyane”.

Mukandayisenga Claudine utuye mu Murenge wa Rwinkwavu, yavuze ko bahari mu buryo bwo kwiteza imbere bagaragaza ko n’abakobwa bashoboye gushaka amafaranga, dushoba kuba twakwiteza imbere.

Iyo babona nta mafaranga ufite baratangira bagashaka kugushora mu ngeso mbi, hari ababa bashobora kugushukisha amafaranga nko bakugurira inkweto, amavuta ariko ubu turabyiha bitewe n’akazi ko mu buhumbikiro.

Nshimyumuremyi Alexis, umaze imyaka 4 akora mu mushinga wa KIIWP akora umurimo wo kubangurira mu buhumbikiro, na we avuga ko kuba hari urubyiruko rudafite akazi biterwa no kutamenya.

Ati: “Mfasha bagenzi banjye kugira ubumenyi bwo kubangurira, mbere sinatekerezaga ko umuntu yafata igiti ngo agicomeke mu kindi ngo kize kumera.

Ubushomeri buba ku rubyiruko rutarasobanukirwa ko hari imirimo itandukanye umuntu yabyazamo inyungu. Ariko wabashije kugira ibyo utegura muri ibingibi byagufasha kuva muri ubwo bushomeri. Buri wese yakora kandi akagira icyo ageraho”.

Meya w’Akarere ka Kayonza John Bosco Nyemazi yavuze ko imishinga itandukanye yazanye impinduka zagiye zigaragara mu baturage mu kwiteza imbere.

Ati: “Gahunda yo guteza imbere urubyiruko no kurwanya ubushomeri kurufasha kugera aheza na bo bagafasha urundi rubyiruko.

Koko iyi mishinga icya mbere iratanga akazi ku rubyiruko ariko ikindi irongerera ubumenyi urubyiruko. Amahirwe arimo kuri twebwe nk’Akarere ni ukubona ibyo tumaze kuvana mu mishinga kugira ngo bibe ibikorwa biramba”.

Yakomeje asobanura ko umushinga Leta yahaye Akarere urimo gushyirwa mu bikorwa ari amahirwe akomeye, dukomeza gukangurira urubyiruko no gushyiraho ingamba zituma n’ibyo tumaze kubona biturutse mu mishinga bishobora gutanga n’undi musarurono mu gihe kiri imbere.

Ubwo buhumbikiro buteganya gutegura ibiti bisaga 100 000, harimo avoka 90 000, imyembe 6000, ipapayi 2 000 n’amatunda 2 000, hakoramo urubyiruko 25, harimo abakobwa 9 n’abahungu 16.

Yanditswe na NYIRANEZA Judith

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA