Kayonza: Gusezerana mu mategeko birema icyizere mu bashakanye bakiteza imbere
Amakuru

Kayonza: Gusezerana mu mategeko birema icyizere mu bashakanye bakiteza imbere

NSHIMIYIMANA FAUSTIN

April 4, 2024

Abaturage bo mu Murenge wa Rwinkwavu mu Karere ka Kayonza bavuze ko batangiye gutera imbere nyuma yo kwiyemeza guca ukubiri n’amakimbirane mu miryango bagahitamo kubana mu buryo bwemewe n’amategeko.

Umuryango wa Ntirungwa Andereya w’imyaka 58 na Mukankomeje Annonciata w’imyaka 58, ni umwe mu miryango yasezeranye mu mwaka w’i 2000 uri mu Karere ka Nyagatare.  Uyu muryango wemeza ko kubana mu buryo bwemewe n’amategeko bituma batishishanya hagati yabo kandi bagahuriza hamwe imihigo n’ibitekerezo bifasha mu iterambere ry’umuryango.

Uyu muryango uvuga ko washakanye mu 1985 ndetse ukaba ufitanye abana barindwi, aho mu mwaka wa 2008 baje kwimukira aho batuye mu Kagari ka Nkondo mu Murenge wa Rwinkwavu bakorera ibikorwa by’ubuhinzi n’ubworozi.

Ntirungwa Andereya yavuze ko kuba babana barasezeranye byabafashije kwimakaza ihame ry’uburinganire n’ubwuzuzanye bakabana mu bwisanzure n’ubwumvikane, bombi bakaba bagira uruhare rungana mu bikorwa by’iterambere ry’umuryango.

Yagize ati: “Gusezerana mu mategeko byatubereye byiza cyane kuko byadufashije kubana tudasesagura umutungo w’urugo. Dukoresha agatabo ko kwizigamira kamwe ku buryo iyo twemeranyije kubitsa cyangwa kubikura amafaranga, buri wese ajyayo. Ibikorwa byose tubikora twabiganiriyeho kandi n’amafaranga twayazana tukayakoresha icyo twayageneye.”

Mukankomeje Annonciata nawe yagize ati: “Twasezeranye ariko twari dusanzwe tubana. Gusa nabonye harajeho akandi karusho kuko umutungo wose tuwuhuriyeho kandi dukorera hamwe kugira ngo turusheho guteza imbere urugo rwacu byongera kandi n’umubano wacu.”

Yongeraho ati: “Ibi byose byadufashije kurihira abana bose amashuri kandi biga neza kuko umuto ukiga ari mu mwaka wa kabiri w’amashuri yisumbuye. Abandi bana twarabashyingiye kandi usanga urukundo twaberetse, na bo ubwabo badusura n’imiryango yabo bakaduha abuzukuru kuko batwizera kuba tubanye neza.”

Umuryango wa Munyamagaju Jean Damascene na Dusabimana Godelieve utuye mu Kagari ka Mukoyoyo mu Murenge wa Rwinkwavu wari umaze imyaka 24 babana badasezeranye, basezeranye vuba, abana babo bababazaga impamvu babana badasezeranye, bavuga ko icyo gikemutse kandi ko gusezerana byubatse kuzuzanya no gusenyera umugozi umwe.

Munyamagaju yagize ati: “Tugiye kujya dufatira umwanzuro hamwe mu mahoro n’umutekano, ntawufashe umwanzuro ku giti cye. kuko hari igihe njye nafataga umwanzuro ntamubajije.”

Dusabimana nawe yagize ati: “Abana bacu tugiye kubaha uburere bwiza kuko ntawuzongera kujya yibaza impamvu tutasezeranye. Iterambere ry’urugo rigiye kwihuta kuko ubu bibaye kubishimangira kandi mu mibanire yacu bigiye gutuma dushyira hamwe.”

Umuyobozi w’Inama Njyanama y’Akarere ka Kayonza, Basiime Kalimba Doreen yavuze ko zimwe mu mpamvu zituma bashyira imbaraga mu kwigisha imiryango ihame ry’uburinganire n’ubwuzuzanye, no kwigisha imiryango kubana yarasezeranye bigira inyungu ku miryango ikabana itishishanya, bigira inyungu ku bana ndetse no kuri Leta.

Yagize ati: “Iyo imiryango ibana itarasezeranye baburirana icyizere ku buryo baba bazi ko bashobora gutandukana mu gihe icyo ari cyose kuko bumva nta tegeko ribagenga. Nta mbaraga nyinshi bashyira mu gukorera urugo ngo babone ibibatunga. Ariko iyo bamaze gusezerana buri wese aba azi ko nta muntu wundi uzarumukuramo bakarukorera mu buryo bubateza imbere nta rwikekwe.

Ni uburenganzira bw’abana mu buryo bwa buri munsi kuko iyo abana bavutse ku babyeyi basezeranye baba ari abana itegeko rigenga mu buryo bw’izungura n’ibindi byose bigenerwa umwana, kandi icyo gihe umwana aba atekanye kuko icyo ababyeyi bakora baba bakimukorera nk’umwana.”

Yakomeje agira ati: “Ku ruhande rwa Leta, usanga abenshi mu miryango bapfa ibintu bidafite amategeko abiyobora, baba bapfa imitungo badafite uko bayigabana umwe akayicura undi bakaba bagirirana nabi, ariko iyo harimo itegeko riberekera uko bagomba kuyikoresha Leta nayo iratuza. Uko umuryango urushaho kuba mwiza niko na Leta irushaho kugira abaturage bakorana imbaraga bakiteza imbere n’igihugu.”

Mu kurushaho gushimangira imibanire myiza, ku itariki ya 02 Mata 2024, imiryango 108 yo mu Murenge wa Rwinkwavu yahisemo kubana mu buryo bwemewe n’amategeko ndetse biyemeza kurushaho gutera imbere.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA