Polisi ya Kenya yafunze imihanda y’ingenzi yinjira mu Murwa Mukuru wa Nairobi mu rwego rwo guhangana n’imyigaragambyo iteganyijwe kubera hirya no hino mu Gihugu igamije kwibuka imyaka ibiri ishize habaye indi myigaragambyo yari iyobowe n’urubyiruko rw’aba-Gen Z yaranzwe n’urupfu rw’abigaragabyanga 127.

Muri Kamena 2024, ni bwo ibihumbi by’Abanyakenya bigaragambije bamagana umushinga wo kongera imisoro wari ugiye gushyirwa mu bikorwa.

Abigaragambije icyo gihe binjiye ku ngufu mu nyubako z’Inteko Inshinga Amategeko, bituma Leta isubika uwo mushinga.

Kuri uyu wa Kane, inzego z’umutekano zashyize bariyeri ku mihanda minini yose yinjira rwagati mu Mujyi wa Nairobi, ibintu byatumye ingendo z’abaturage zihagarara ndetse bamwe babura uko bagera ku kazi no ku mashuri.

Imihanda yafunzwe harimo Thika Super Highway, umuhanda wa Mombasa, uwa Nairobi-Namanga, Kenyatta Avenue, Waiyaki Way na Jogoo Road, ndetse abaturage n’ibinyabiziga byinshi babujijwe kugera mu gice cy’ubucuruzi cyo hagati mu mujyi.

Iyi myigaragambyo yateguwe binyuze ku mbuga nkoranyambaga n’urubyiruko rwiganjemo abo mu cyiciro cya Gen Z, ikaba iteganyijwe kubera i Nairobi, Mombasa no mu yindi mijyi ikomeye ya Kenya.

Abateguye imyigaragambyo bavuga ko bashaka ubutabera ku bantu barenga 80 bishwe ndetse n’abandi benshi bakomerekeye mu myigaragambyo yabaye mu mwaka wa 2024 no mu bikorwa byo kwibuka iyo myigaragambyo byabaye nyuma yayo.

Perezida wa Kenya, William Ruto, aherutse kuvuga ko abaturage bafite uburenganzira bwo kwigaragambya mu mahoro, ariko yihanangiriza abashobora kwangiza ibikorwa remezo cyangwa guteza imvururu ko batazihanganirwa.

Mu cyumweru gishize, Perezida Ruto yatangaje ikigega cya miliyoni hafi 15 z’Amadolari ya Amerika kigamije gufasha abantu hafi 2 000 bavuga ko bahohotewe cyangwa bakagirwaho ingaruka n’inzego z’umutekano hagati ya 2017 na 2025.

Icyakora, imiryango iharanira uburenganzira bwa muntu yanenze iki cyemezo ivuga ko hari abahohotewe batashyizwe ku rutonde rw’abagomba guhabwa indishyi ndetse ko uburyo bwakoreshejwe butarimo gukorera mu mucyo.

Hagati aho, uwahoze ari Visi Perezida wa Kenya, Rigathi Gachagua, yasabye urubyiruko kutajya mu mihanda, ahubwo arusaba kuguma mu ngo zarwo nk’uburyo bwo kugaragaza ko rutishimiye imiyoborere iriho.

Iyi myigaragambyo ibaye mu gihe Perezida William Samoei Ruto akomeje guhura n’igitutu cya politiki mbere y’amatora ya Perezida ateganyijwe mu mwaka wa 2027, aho bamwe mu baturage bamushinja kutubahiriza bimwe mu byo yabijeje igihe yiyamamazaga, mu gihe we akomeza kuvuga ko Guverinoma ayoboye imaze gushyira mu bikorwa byinshi mu byo yemereye abaturage.

Ba uwa mbere mu kumenya amakuru agezweho!!!