Kenya: Umugore wacyuwe n’Umunyarwanda yatunguwe n’umugabo we agarutse nyuma y’imyaka 17
Amakuru

Kenya: Umugore wacyuwe n’Umunyarwanda yatunguwe n’umugabo we agarutse nyuma y’imyaka 17

NTAWITONDA JEAN CLAUDE

August 2, 2023

Umugore wo muri Kenya yirukanye umukunzi we w’Umunyarwanda nyuma y’uko umugabo we atashye nyuma y’imyaka 17 yaraburiwe irengero.

Abaturage bo mu gace ka Lurambi, Intara ya Kakamega yo mu Burengerazuba bwa Kenya, bakubiswe n’inkuba nyuma yo kubona uwo mugabo wari umaze imyaka 17 agarutse mu rugo rwe.

Uwo mugabo w’imyaka 42 yitwa Boniface Moi Muyeshi, yagize atya aba araje atanateguje. Ikinyamakuru Citizen Digital cyatangaje inkuru kigira kiti: “Yavuye mu rugo iwe yerekeza i Nairobi mu 2006. Yasize Umuryango we, guhera icyo gihe kugeza uyu munsi ntiwongera kumuca iryera.”

Akigera iwe hakozwe umuhango wo kumusabira no kumwamururaho umwaku kuko uwafatwaga nk’umwana w’ikirara yari agarutse mu muryango we.

Mu gihe gito, byabaye ibirori aho bamwakiriye mu migenzo ya gakondo ndetse bakica umwana w’intama; ariko byakomwe mu nkokora no kumenyeshwa ko umugore we yabyaranye n’undi mugabo w’Umunyarwanda.

Umuvandimwe wa Munyeshi witwa Fredrick Witumbele, yagize ati: “Twaketse ko yapfuye hagati y’umwaka wa 2007 na 2008 nyuma y’ibibazo byabaye mu gihe cy’amatora.”

Umugore wa Muyeshi witwa Agripina Mulupi wari ameranye neza n’umukunzi we bivugwa ko aturuka mu Rwanda, yavuze ko yashakanye n’Umunyarwanda kubera ko yari agowe no kurera abana batatu yabyaranye n’umugabo we wa mbere.

Yagize ati: “Nemeye gushyingiranwa n’undi muntu kubera ko nari ntakibasha kurera aba bana.”

Yakomeje avuga ko imyaka itanu nyuma y’uko umugabo we aburiwe irengero, yabonye atagishoboye kubaho wenyine ariko nyirabukwe abanza kumubuza kubana n’undi mugabo uwo ari we wese.

Nyirabukwe apfuye ni bwo yahise afata umwanzuro wo gushakana n’undi mugabo. Ibinyamakuru byo muri Kenya bivuga ko uwo mukunzi w’Umunyarwanda yitaye kuri Agripina n’abana be abafasha kwiga amashuri yabo.

Agripina avuga ko kubera ko azi neza ko umugabo we atakwemera kurera umwana w’umukunzi we wa kabiri, yifuza ko yarera abo yemera ko ari abe.

Gusa yavuze ko nyuma y’aho umugabo we wa mbere agarukiye, agomba gusubira ku isoko: “Nagombaga kwirukana umukunzi wanjye kuko nyiri urugo yarugarutsemo. Tuzashaka uko twakomeza gufatanya kurera abana twabyaranye.”

Yakomeje yemeza ko umugabo we w’Umunyarwanda yemeye kugenda mu mahoro, bikaba byitezwe ko azakomeza gufatanya n’uwo mugore kurera abana babyaranye biyongereye ku ba nyiri urugo.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA